ရွေးကောက်ပွဲအလွန် မြန်မာစစ်တပ်နှင့် အာဆီယံအကြား ထိုင်းနိုင်ငံက ‘ပေါင်းကူးတံတား’ အဖြစ် ဆောင်ရွက်ပေးမည်ဟု ထိုင်းနိုင်ငံခြားရေးဝန်ကြီး ပြော

ရွေးကောက်ပွဲ အလွန် မြန်မာနိုင်ငံကို အာဆီယံထဲ ပြန်ဝင်လာရေး ကူညီဖို့ အသင့်ရှိကြောင်း ထိုင်းနိုင်ငံခြားရေးဝန်ကြီး ပြောကြား
ဖေဖေါ်ဝါရီ ၁၈ – ၂၀၂၆

ဒီကနေ့ ထိုင်းနိုင်ငံ ဖူးခက်မြို့ ထိုင်းနိုင်ငံခြားရေး ဝန်ကြီး Sihasak Phuangketkeow နဲ့ မြန်မာ စစ်ကော်မရှင် နိုင်ငံခြားရေး ဝန်ကြီး ဦးသန်းဆွေ တို့ တွေ့ဆုံပွဲမှာ ထိုင်းနိုင်ငံခြားရေး ဝန်ကြီး က မြန်မာနိုင်ငံ ရွေးကောက်ပွဲ အလွန် ကူညီဖို့ အသင့်ရှိကြောင်း ထုတ်ဖေါ် ပြောကြား လိုက် ပါတယ်။
အခုလို ပြောဆိုချက်ဟာ မြန်မာနိုင်ငံကို အာဆီယံမိသားစု ထဲသို့ ပြန်လည် ခေါ်ဆောင်ဖို့ ပထမခြေလှမ်း ဖြစ်လာပါတယ်။
ရွေးကောက်ပွဲ အပြီး မြန်မာနိုင်ငံကို အာဆီယံ မိသားစု အတွင်း ပြန်လည် ဝင်ရောက်နိုင်စေဖို့ ထိုင်းနိုင်ငံက တံတား အနေနဲ့ ပိုမို တက်ကြွစွာ ဆောင်ရွက်နေပြီး၊ တဘက်တွင်လည်း ဒေသတွင်း အာဆီယံ နဲ့ နိုင်ငံ တကာ အသိုင်းအဝိုင်းက ထောက်ပြထားတဲ့ စိုးရိမ်ပူပန်မှု တွေကို တုံ့ပြန် ဖြေရှင်းဖို့ နေပြည်တော်ကို တိုက်တွန်းထားပါတယ်။
တွေ့ဆုံဆွေးနွေး အပြီး ထိုင်းနိုင်ငံခြားရေးဝန်ကြီး Sihasak Phuangketkeow က ထိုင်းနိုင်ငံ ဟာ မြန်မာနဲ့ နယ်စပ် တလျှောက် တိုက်ရိုက် ထိခိုက်မှု ရှိနေတဲ့ နိုင်ငံ အနေနဲ့ ရှေ့တန်းကနေ တဖြည်းဖြည်း ချင်း မြန်မာနိုင်ငံနဲ့ ထိတွေ့ ဆက်ဆံသွားဖို့ ဖြစ်ကြောင်း ပြောကြားခဲ့ ပါတယ်။
ရည်ရွယ်ချက်ကတော့ မြန်မာနိုင်ငံကို အာဆီယံဘောင်ထဲ ပြန်လည် ရောက်ရှိစေဖို့ ကူညီမှာ ဖြစ်တယ်လို့ သူက ဆိုပါတယ်။
“ထိုင်းနိုင်ငံက တံတားအဖြစ် ဆောင်ရွက်ပေးမှာ ဖြစ်ပြီး မြန်မာနိုင်ငံ အာဆီယံ မိသားစုထဲ ပြန်ဝင်နိုင်အောင် ကူညီပေးမှာပါ။ ဒါပေမဲ့ မြန်မာနိုင်ငံ ဘက်ကလည်း အာဆီယံနဲ့ နိုင်ငံတကာ အသိုင်းအဝိုင်းရဲ့ စိုးရိမ်ချက်တွေကို တုံ့ပြန်ဆောင်ရွက်ခြင်း အားဖြင့် ကျွန်တော်တို့ကို ပြန်ကူညီရမယ်” လို့ ပြောဆိုသွားတာပါ။
မြန်မာနိုင်ငံ အနေနဲ့ တိုင်းရင်းသား အဖွဲ့အစည်းတွေနဲ့ တွေ့ဆုံ ဆွေးနွေးမှုတွေ စတင်ဖို့ လူသားချင်းစာနာမှု အကူအညီတွေ ပိုမို ရောက်ရှိစေဖို့ နဲ့ အရပ်သားတွေ အပေါ် တိုက်ခိုက်မှုတွေကို ရှောင်ကြဉ် ဖို့ အပါအဝင် လက်ဆုပ်လက်ကိုင် ပြနိုင်တဲ့ တိုးတက်မှုများကို ပြသဖို့ ထိုင်းနိုင်ငံက တောင်းဆိုထားတယ်လို့ သူက ပြောပါတယ်။
၂၀၂၁ တုန်းက မြန်မာ စစ်ကောင်စီက သဘောတူထားတဲ့ အာဆီယံ ဘုံသဘောတူညီချက် ၅ ချက်ဟာ ပြီးခဲ့တဲ့ ၅ နှစ်အတွင်း ထိရောက်တဲ့ အကောင်အထည် ဖော်မှု နည်းပါးခဲ့တာကြောင့် ဘုံ ၅ ချက်ကို လက်တွေ့ လုပ်ဆောင်မယ်ဆိုရင် အပြုသဘော ဆောင်တယ်လို့ ရှုမြင်ခံရမှာ ဖြစ်တယ် လို့ ဆိုပါတယ်။
ဆွေးနွေးပွဲအတွင်း ထိုင်းဘက်က အဆိုပြုချက်တွေ အပေါ် မြန်မာဘက်က အပြုသဘောဆောင်တဲ့ တုံ့ပြန်မှုတွေ ပြသခဲ့ကြောင်းလည်း မစ္စတာ Sihasak Phuangketkeow က ပြောပါတယ်။
ထိုင်း-မြန်မာ ကုန်သွယ်မှု တံခါးပေါက်ဖြစ်တဲ့ မဲဆောက်-မြဝတီ နယ်စပ် ကုန်သွယ်ရေးကို ပြန်လည် အသက်သွင်းဖို့ ကိစ္စရပ်တွေကိုလည်း ဆွေးနွေးခဲ့ ကြကြောင်း သိရပါတယ်။
—————-
THN Public Media

ရွေးကောက်ပွဲအလွန် မြန်မာစစ်တပ်နှင့် အာဆီယံအကြား ထိုင်းနိုင်ငံက ‘ပေါင်းကူးတံတား’ အဖြစ် ဆောင်ရွက်ပေးမည်ဟု ထိုင်းနိုင်ငံခြားရေးဝန်ကြီး ပြော
ရန်ကုန်၊ ဖေဖော်ဝါရီ ၁၈
မြန်မာ အကြမ်းဖက်စစ်တပ်က ကျင်းပခဲ့သော ရွေးကောက်ပွဲအလွန် မြန်မာ့အရေး ပြဿနာ အဖြေရှာနိုင်ရန်အတွက် ထိုင်းနိုင်ငံခြားရေးဝန်ကြီး Sihasak Phuangketkeow နှင့် မြန်မာစစ်တပ်နိုင်ငံခြားရေးဝန်ကြီး သန်းဆွေတို့ ယနေ့ ဗုဒ္ဓဟူးနေ့ တွေ့ဆုံဆွေးနွေးမည်ဖြစ်ကြောင်း ရိုက်တာသတင်းတစ်ရပ်အရ သိရှိရသည်။
အရှေ့တောင်အာရှ အိမ်နီးချင်းနိုင်ငံများ၏ အကူအညီဖြင့် မြန်မာနိုင်ငံအတွင်း ဖြစ်ပွားနေသည့် ပဋိပက္ခများကို အဆုံးသတ်နိုင်မည့် နည်းလမ်းများကို ရှာဖွေရန် ရည်ရွယ်သည့် ယင်းတွေ့ဆုံမှုသည် ပြီးခဲ့သည့် ဇန်နဝါရီလအတွင်း မြန်မာနိုင်ငံ၌ ကျင်းပခဲ့သော ရွေးကောက်ပွဲအပြီး ပေါ်ပေါက်လာသည့် နိုင်ငံရေးအခင်းအကျင်းသစ်တွင် အရေးပါသည့် အချိုးအကွေ့တစ်ခု ဖြစ်လာနိုင်ကြောင်း ထိုင်းနိုင်ငံခြားရေးဝန်ကြီး Sihasak Phuangketkeow က သတင်းထောက်များအား ပြောကြားခဲ့သည်။
ထိုင်းနိုင်ငံခြားရေးဝန်ကြီးဌာန၏ ထုတ်ပြန်ချက်အရ ယနေ့ကျင်းပမည့် နှစ်နိုင်ငံတွေ့ဆုံမှုတွင် ထိုင်း-မြန်မာ နှစ်နိုင်ငံဆက်ဆံရေးအပြင် မြန်မာနိုင်ငံနှင့် အာဆီယံအဖွဲ့ကြီးအကြား ဆက်ဆံရေး ရှေ့ဆက်နိုင်မည့် အခြေအနေများကို အဓိကထား ဆွေးနွေးသွားမည်ဖြစ်သည်ဟု သိရှိရသည်။
ထိုင်းနိုင်ငံခြားရေးဝန်ကြီးက “ကျွန်တော်တို့အနေနဲ့ မြန်မာရွေးကောက်ပွဲကို လက်ခံအတည်ပြုတယ်လို့ မပြောပါဘူး။ ဒါပေမဲ့ ရွေးကောက်ပွဲက တကယ်ဖြစ်ပွားခဲ့ပြီဆိုတာက လက်တွေ့ကျတဲ့ အရှိတရားတစ်ခု ဖြစ်ပါတယ်။ ဒါကြောင့် မြန်မာနဲ့ အာဆီယံကြားမှာ ကျွန်တော်တို့က ပေါင်းကူးတံတား (Bridge) အဖြစ် ကူညီဆောင်ရွက်ပေးသွားမှာပါ။ ဒါပေမဲ့ ကျွန်တော်တို့ဘက်က ကူညီနိုင်ဖို့ဆိုရင် သူတို့ဘက်ကလည်း ပူးပေါင်းဆောင်ရွက်ဖို့ လိုအပ်ပါတယ်” ဟု ဆိုသည်။
ထို့ပြင် အာဆီယံအနေဖြင့် မြန်မာနိုင်ငံ၏ အသွင်ကူးပြောင်းရေးကာလတွင် အပြု သဘောဆောင်သည့် ရလဒ်များ ထွက်ပေါ်လာစေရန်၊ အာဆီယံ၏ စေတနာကို မြန်မာဘက်က နားလည်လာစေရန် ယခုအချိန်သည် ဆွေးနွေးမှုများ အားကောင်းမောင်းသန် လုပ်ဆောင်ရမည့်အချိန် ဖြစ်ကြောင်း ၎င်းက ဆက်လက်ပြောကြားခဲ့သည်။
ထိုင်းနိုင်ငံသည် မြန်မာနိုင်ငံနှင့် ကီလိုမီတာ ၂,၄၀၀ (မိုင် ၁,၅၀၀) ကျော် ရှည်လျ ားသည့် နယ်စပ်ချင်း ထိစပ်နေသည့်အတွက် မြန်မာ့ရေးရာကိစ္စရပ်များတွင် အာဆီယံအဖွဲ့ဝင်နိုင်ငံများထဲ၌ အကျိုးသက်ရောက်မှု အရှိဆုံးနိုင်ငံတစ်ခု ဖြစ်သည်။
ယနေ့တွေ့ဆုံမည့် မြန်မာစစ်တပ်၏ နိုင်ငံခြားရေးဝန်ကြီး သန်းဆွေမှာ အမေရိကန်နိုင်ငံဆိုင်ရာ မြန်မာ သံတမန်ဟောင်းတစ်ဦးဖြစ်ပြီး လက်ရှိတွင် ဒုတိယဝန် ကြီး ချုပ်နှင့် နိုင်ငံခြားရေးဝန်ကြီး တာဝန်များကို ထမ်းဆောင်နေသူဖြစ် ကြောင်း သိရှိရသည်။