ဗိုလ်နဂါးတပ်ဖွဲ့ကို စီးနင်းတိုက်ခိုက်ရတဲ့အကြောင်းရင်းကို NUG ပြည်ထဲရေးဒုဝန်ကြီးပြော
■BNRA ဂိတ်စခန်းတွေကို PDF တွေတိုက်ခိုက်နေချိန်မှာ စစ်ကောင်စီက ဗုံးကြဲ
ဖေဖော်ဝါရီ−၁၇၊၂၀၂၆။သတိုး/People’s Spring
ပုလဲမြို့နယ်က ဗိုလ်နဂါးဦးဆောင်တဲ့BNRA
တပ်ဟာ လူထုအပေါ် ဖိနှိပ်တဲ့ကိစ္စနဲ့ ရာဇဝတ်မှုတွေ ကျုးလွန်ထားတယ်လို့ ပြည်သူလူထုကအမှုဖွင့်တိုင်ထားတာ၊NUGလက်အောက်ခံတပ်ဖွဲ့တွေအရပ်ဖက်ဝန်ထမ်းတွေအပေါ် ကျုးလွန်ထားတာတွေကြောင့် ကာကွယ်ရေးဝန်ကြီးဌာနကို အကူ
အညီတောင်းပြီး ဖမ်းဆီးအရေးယူနိုင်ရေး ဆောင်
ရွက်ရတာဖြစ်တယ်လို့ အမျိုးသားညီညွတ်ရေးအ
စိုးရ(NUG)၊ ပြည်ထဲရေးနဲ့လူဝန်မှုကြီးကြပ်ရေးဝန်ကြီးဌာန ဒုဝန်ကြီးဦးကျော်နီက လူထုနွေဦးကို ပြောပါတယ်။
ဒီကနေ့(ဖေဖော်ဝါရီ ၁၇ရက်)မှာNUGရဲ့ PDF
တပ်ရင်းတွေက ဗိုလ်နဂါးတပ်ဖွဲ့ရဲ့စခန်းအချို့ကို စီးနင်းတိုက်ခိုက်တာနဲ့ပတ်သက်ပြီးလူထုနွေဦးက ဒုဝန်ကြီးဦးကျော်နီထံဆက်သွယ်မေးမြန်းရာ အ
ထက်ပါအတိုင်းဖြေကြားတာဖြစ်ပါတယ်။
“ဗိုလ်နဂါးနဲ့ပတ်သက်ပြီးတော့ ကျွန်တော်တို့တွေ အောက်ခြေကနေ ပြီးတော့ တိုင်ထားတွေရှိတယ်။ တိုင်ထားတယ်ဆိုတဲ့အခါမှာ နှစ်မျိုးရှိပါတယ်။ တစ်ခုကတော့ ပြည်သူလူထုဖိနှိပ်ခံရတဲ့ကိစ္စတွေ၊ ရာဇဝတ်မှုတွေ ဒါတွေကို တိုင်တာတွေရှိတယ်။ နောက်တစ်ခုကကျတော့ NUG ယန္တရားထဲက လူတွေကိုယ်တိုင် ကျူးလွန်ခံရတယ်။ ပြည်သူ့ဝန်
ထမ်းတွေ ကျူးလွန်ခံရတဲ့ မှုခင်းတွေနဲ့ပတ်သက်ပြီးတိုင်တာတွေလည်းရှိတယ်။ရှေ့ပိုင်းကတော့လည်း ကျွန်တော်တို့ တချို့ကိစ္စတွေ ပြန်တောင်းဆိုပြီးလုပ်ခိုင်းရတာရှိတယ်။ အားလုံးသိမှာပါ။ ကျွန်တော်တို့ရဲ့ တရားရေးဝန်ထမ်းကို ဖမ်းဆီးတာမျိုးတွေရှိတယ်။ နောက် ပအဖ အဖွဲ့ဝင်တွေကို ဖမ်းဆီးပြီးတော့ သေနတ်နဲ့ချိန် ဒူးထောက်ခိုင်းပြီးတော့ ထိုးကြိတ်ရိုက်နှက် ဒါမျိုးတွေရှိတယ်။ တ
ခြားသော အခွန်ဂိတ်တွေ ဝင်စီးတဲ့ ကိစ္စမျိုးတွေ၊ ဟိုတလောကပဲ ကျွန်တော်တို့ဆီကတော်လှန်ရေးရဲဘော်ကို သေနတ်နဲ့ပစ်သတ်ခံရတာမျိုးတွေပေါ့။ ဒီလိုမျိုးတွေ။ ဒါတွေကတော့ တိုင်ကြားမှုတွေပေါ့။ အများကြီးရှိပါတယ်။ နောက် လူထုအပေါ် ဖိနှိပ်တဲ့ ကိစ္စတွေလည်း ရာဇဝတ်မှုတွေလည်း ပြည်သူလူထုက အမှုဖွင့်တိုင်တန်းတာတွေရှိပါတယ်”လို့ဦးကျော်နီက ပြောပါတယ်။
အဆိုပါတိုင်ကြားမှု တွေနဲ့ပတ်သက်ပြီးNUG ပြည်ထဲရေးဝန်ကြီးဌာန အနေနဲ့ လက်နက်ကိုင်
တွေကို အရေးယူဖို့ မဖြစ်နိုင်သေး တဲ့အတွက် ကာကွယ်ရေးဝန်ကြီးဌာနကို အကူအညီတောင်းတာကြောင့် ကာကွယ်ရေးဝန်ကြီးဌာနက ဆောင်ရွက်ခဲ့တာဖြစ်တယ်လို့ ပြောပါတယ်။
ဗိုလ်နဂါးတပ်ရဲ့ဗမာအမျိုးသားတော်လှန်ရေးတပ်မတော်(BNRA)တပ်စခန်းကို ဝင်ရောက်တိုက်ခိုက်တဲ့ဖြစ်စဉ်ကို ကာကွယ်ရေးဝန်ကြီးဌာန စစ်ရုံးချုပ်ထံ တိုက်ရိုက်သတင်းပေးပို့ရတာဖြစ်တယ်လို့လည်း ဒုဝန်ကြီးက ပြောပါတယ်။ ဒါ့အပြင် ဗိုလ်နဂါးတပ်ဖွဲ့က ပြန်လည်ခုခံမှုတွေရှိလို့
ပစ်ခတ်မှုတွေရှိခဲ့တယ်လို့လည်း ဆက်ပြောပါတယ်။
စီးနင်းတိုက်ခိုက်မှုအတွင်း ဗိုလ်နဂါးတပ်ရဲ့ ဂိတ်အချို့ကို သိမ်းပိုက်ရထားပြီး ဆုတ်ခွာသွားတယ်လို့ ကြားသိရကြောင်းလည်းဖေဖော်ဝါရီ ၁၇ ရက်မွန်းလွှဲပိုင်းမှာပြောပါတယ်။
“နောက်တစ်ခုကျတော့ သူလည်း(ဗိုလ်နဂါး)
တခြားလက်နက်ကိုင်အဖွဲ့တွေကို အကူအညီတောင်းတယ်လို့လည်းသိရတယ်။ဒီလိုမျိုးပဲ သိထားပါတယ်။ လက်နက်ကိုင်ဆိုတာ တော်လှန်ရေးအဖွဲ့အစည်းရယ်လို့တော့မဟုတ်ဘူး။ တခြားသော လက်နက်ကိုင်တွေကိုခေါ်နေတယ်လို့လည်း သိရတယ်။ အသေးစိတ်တွေတော့မသိရဘူး”လို့ ဒုဝန်ကြီးဦးကျော်နီက ပြောပါတယ်။
စစ်ကိုင်းတိုင်း၊ ပုလဲမြို့နယ်က ဗိုလ်နဂါးဦးဆောင်တဲ့ BNRAတပ်ဖွဲ့စခန်းအချို့ကို ယင်းမာပင်ခရိုင်က PDFတပ်ရင်းတွေကဖေဖော်ဝါရီ ၁၇ရက် မနက်ပိုင်းမှာ စတင်တိုက်ခိုက်ခဲ့တာ ဖြစ်ပါတယ်။
တိုက်ပွဲဖြစ်ပွားတာကြောင့် ဒေသခံတွေဘေးလွတ်ရာတိမ်းရှောင်နေကြရပါတယ်။
ဒီနေ့ မနက် ၇နာရီခန့်ကနေ ၁၂နာရီခန့်အထိ ပစ်
ခတ်သံတွေကြားရပြီး ၁၁နာရီနောက်ပိုင်းမှာ ငြိမ်သက်သွားတယ်လို့ ဒေသခံတွေက ပြောပါတယ်။ တိုက်ပွဲဖြစ်နေတဲ့ ပုပ္ပါရွာ နဲ့ ဇီးတောရွာကြားကို မနက် ၁၀နာရီခန့်မှာ တစ်ကြိမ်၊ နေ့ခင်း ၂နာရီခန့်မှာတစ်ကြိမ် စစ်တပ်က ဂျိင်ရိုကော့ပတာနဲ့ ဗုံးကြဲခဲ့တယ်လို့ ဒေသခံတစ်ဦးကပြောပါတယ်။ စစ်ကောင်စီဗုံးကြဲမှုကြောင့် ထိခိုက်မှုရှိမရှိကိုမသိရသေးပါဘူး။
” နဂါးက MODအောက်လည်း မဝင်ဘူး။သူ့လက်
နက်တွေကို သိမ်းမှာကို စိုးပြီး တော်လှန်ရေးကို ပုံဖျက်နေတာ။ ကျမတို့ ပုလဲမှာ သူ့ကိုဆန့်ကျင်သူက များပါတယ်။ သူ့နောက်က တပ်ဖွဲ့ဝင်ကလေးတွေကိုတော့ သနားတယ်”လို့ ပုလဲဒေသခံတဦးကပြောပါတယ်။
တိုက်ပွဲအတွင်း BNRA တပ်ဖွဲ့ဝင် ဆယ်ဦးသေဆုံးတယ်လို့ ဗိုလ်နဂါးက လူမှုကွန်ရက်မှာ တင်ထားပါတယ်။ ဒါအပြင် ဗိုလ်နဂါး တပ်ဖွဲ့ နဲ့စစ်တပ် ပေါင်းနေတယ်လို့ ဝါဒဖြန့်နေတာဟာမသင့်တော်ဘူး လို့လည်း သူကရေးထားပါတယ်။
BNRAက၂၀၂၅ နှစ်ကုန်ပိုင်းမှာ ပုလဲမြို့နယ်အ
တွင်းမှာဝင်ဂိတ်တချို့ဖွင့်ပြီး ငွေတောင်းနေတာတွေလည်း ရှိပါတယ်။အဲဒီဂိတ်တွေကိုပိတ်သိမ်းဖို့ ယင်းမာပင်ခရိုင်ထဲက တပ်ရင်းတွေက သတိပေးခဲ့ဖူးပြီး ၂၀၂၆ ဇန်နဝါရီ ၉ ရက်မနက်ပိုင်းမှာတော့ ပုလဲမြို့နယ် ပုပ္ပါးရွာနဲ့ ချင်ပစ်ကျေးရွာက အခွန်ကောက်တဲ့ BNRA ဂိတ်နှစ်ခုကို PDF ရဲဘော်တွေက ဝင်စီးနင်းပြီး ပိတ်သိမ်းခဲ့ပါတယ်။
နောက်ပိုင်းမှာ PDF တွေက စီးနင်းထားစဥ်ကဖမ်းဆီးထားတဲ့ရဲဘော်အချို့ကိုပြန်လွှတ်ပေးပြီး လက်နက်တွေကိုလည်းပြန်ပေးခဲ့ပါတယ်။အဲဒီနောက် ရက်ပိုင်းအကြာမှာ BNRA က ပကဖ ဂိတ်တစ်ဂိတ်ကို သေနတ်နဲ့ ပစ်ခတ်စီးနင်းပြီး ရဲဘော်အချို့ကို ဖမ်းခဲ့ပါတယ် ။
ဒါအပြင် ဖေဖော်ဝါရီ ၁၂ ရက်မှာ ယင်းမာပင်ခရိုင် PDFတပ်ရင်း (၄)က ရဲဘော်တဦးကို BNRA တပ်ရင်း(၃)က ရဲဘော်နှစ်ဦးကပစ်ခတ်လို့ သေဆုံးခဲ့ပါတယ် ။ BNRA က အချင်းချင်းအပြန်အလှန်ပစ်ခတ်မှုဖြစ်ခဲ့တယ်လို့ထုတ်ပြန်ခဲ့ပါတယ် ။
နှစ်ဖက်ကြားအဲဒီလိုတင်းမာမှုတွေဖြစ်ခဲ့ပြီးနောက် ဒီနေ့မနက်မှာတော့ PDF တပ်ရင်းအချို့က BNRA စခန်းအချို့ကို စီးနင်းတိုက်ခိုက်ခဲ့တာဖြစ်ပါတယ်။
(ယင်းမာပင်ခရိုင်မှ PDFတပ်ဖွဲ့ဝင်များ/ပုံဟောင်းဖြစ်ပါတယ်)