မိုးမိတ်ရောက် စစ်သားသစ် ၄၀ ဦး ထွက်ပြေး
ဇန်နဝါရီ-၅၊၂၀၂၆။အိမ်သွင်/People’s Spring
မိုးမိတ်မြို့ကိုရောက်နေတဲ့စစ်သားတွေထဲက ပြည်
သူ့စစ်သင်တန်းဆင်း ၄၀ ဦး ထွက်ပြေးလို့ လိုက်
လံဖမ်းဆီးနေပြီး တပ်အပြောင်းအလဲလည်း လုပ်နေပါတယ်။
သင်တန်းဆင်းပြီးမိုးမိတ်ပို့ခံရတဲ့စစ်သားသစ် ၄၀ ဦးဟာ ဇန်နဝါရီလဆန်းမှာ ထွက်ပြေးတာဖြစ်ပြီး စစ်အုပ်စုက လက်သိပ်ထိုးပြီး လိုက်ရှာနေတာဖြစ်ပါတယ်။ ရပ်ကွက်တွေ၊ ရွာတွေထဲအထိ လိုက်ရှာစဉ်မှာ ဒေသခံတွေဆီ သတင်းပေါက်ကြားလာတာဖြစ်ပါတယ်။
“ထွက်ပြေးတာစစ်မှုထမ်းသင်တန်းဆင်းတွေချည်းပဲ။ပြန်မိတာမကြားဘူး။ဒေသခံတွေ ပြန်မနေသေးတဲ့ အိမ်တွေကိုလည်းသူတို့ဝင်ရှာပြီးဒေသခံတွေကိုတောင် စစ်လားဆေးလားလုပ်တယ်”လို့မိုးမိတ်မြို့ခံတစ်ဦးကပြောပါတယ်။
မိုးမိတ်မြို့ကိုစစ်တပ်ပြန်ဝင်လာချိန်ကတပ်မ(၅၅)
လက်အောက်ခံတပ်ရင်းတွေ ဖြစ်ပြီး ယခုရက်ပိုင်းမှာ တပ်မ(၉၉)နဲ့ တပ်မ(၁၁) လက်အောက်ခံတပ်တွေကို ပို့နေပါတယ်။
“အချိန်အကြာကြီး မထားတဲ့သဘော။ နယ်မြေကျွမ်းကျင်လာရင် ထွက်ပြေးမှာစိုးလို့ ချိန်းတာ။ အခုလည်း ထွက်ပြေးသူတွေက ကျတော်တို့ သိတာထက် များနိုင်တယ်” လို့မိုးမိတ်မြို့ခံတဦးကပြောပါတယ်။
ဇန်နဝါရီလဆန်းမှာ စစ်တပ်ကားအစီး၂၀ကျော်က မိုးကုတ်-မိုးမိတ်လမ်းအတိုင်း ဝင်လာတယ်လို့ သိရပါတယ်။
မိုးမိတ်မြို့ဟာတအာင်းတပ်TNLAက ၁၀၂၇ စစ်
ဆင်ရေးနဲ့အတူ သိမ်းယူထားတဲ့မြို့ဖြစ်ပါတယ်။ သိမ်းယူထားတဲ့ မြို့တွေအနက် မိုးကုတ်မြို့နဲ့ မိုးမိတ်မြို့ကို စစ်ကောင်စီထံပြန်အပ်ဖို့ တရုတ်နိုင်ငံကူမင်းမြို့မှာ စစ်ကောင်စီနဲ့ဆွေးနွေး သဘောတူခဲ့ပါတယ်။
စစ်ကောင်စီတပ်ဖွဲ့ဝင်တွေဟာ နိုဝင်ဘာလ၂၅ရက် နေ့လယ်ပိုင်းကစပြီး မိုးမိတ်မြို့ထဲကို ကားတွေနဲ့ဝင်ရောက်လာတာဖြစ်ပါတယ်။ မြို့ပေါ်ကဌာနဆိုင်ရာအဆောက်အအုံတွေအပြင် ဒေသခံတွေရဲ့နေအိမ်တွေမှာလည်းတပ်စွဲထားပါတယ်။မိုးမိိတ်
မြို့ဘောလုံးကွင်းထဲမှာ အများဆုံးတပ်စွဲထားပြီး မြို့ထဲကို မကြာခဏ ကင်းလှည့်နေတာပါ။
စစ်ကောင်စီစစ်ကြောင်းတွေမှာ ပြည်သူ့စစ်မှုထမ်းတွေအများဆုံးပါနေတယ်လို့လည်း သိရပါတယ်။
အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန(MOD) စစ်ရုံးချုပ်က မိုးကုတ် – မိုးမိတ်ဒေသ စစ်ဆင်ရေးစစ်ဦးစီးအဖွဲ့ကို နိုဝင်ဘာလ (၉) ရက်နေ့မှာ စတင်ဖွဲ့စည်းခဲ့ပြီး စစ်ကောင်စီစစ်ကြောင်းတွေကို နိုဝင်ဘာလ (၃၀) ရက် ညနေ ၆နာရီကစပြီး တိုက်ခိုက်ခဲ့ပါတယ်။စစ်ကောင်စီတပ်တွေရဲ့ အုပ်ချုပ်မှု၊ ကွပ်ကဲမှု၊ ထောက်ပံ့မှု ရပ်ဝန်းတွေကို အထူးစစ်ဆင်ရေးဖော်ဆောင်ပြီး အဆက်မပြတ်တိုက်ခိုက်နေတယ်လို့ MODက အသိပေးထားပါတယ်။
ယခုရက်ပိုင်းမှာ မိုးမိတ်နဲ့ သပိတ်ကျင်းလမ်းပိုင်းမှာ တိုက်ပွဲဖြစ်နေပြီး လက်နက်ကြီးပစ်ခတ်သံတွေကို မိုးမိတ်မြို့ပေါ်ကနေ ကြားနေရပါတယ်။
(စစ်တပ်က စစ်မှုမထမ်းမနေရ ဥပဒေနဲ့ အဓမ္မစုဆောင်းထားထားတဲ့ စစ်သားသစ်တွေ။
ဓါတ်ပုံ-စစ်ကောင်စီ)