စစ်တပ်၏ အတုအယောင်ရွေးကောက်ပွဲအတွက် မဲပေးရေး လှုပ်ရှားမှုများတွင် အတင်းအကျပ် ဖိ အားပေး ဆင့်ခေါ်၍ ပါဝင်ရသော အဆိုတော်နှင့် အနုပညာရှင်များကို ဆန္ဒအလျောက် တက်ကြွစွာ ပါဝင်သူများဟု မောင်မောင်အုန်းက သုံးနှုန်းပြီး ဂုဏ်ယူသည်ဟု ပြောပြန်
ရန်ကုန်၊ နိုဝင်ဘာ ၁၇
အကြမ်းဖက် စစ်တပ်၏ အတုအယောင်ရွေးကောက်ပွဲအတွက် မဲပေးရေး လှုပ်ရှားမှုများတွင် အတင်းအကျပ် ဖိအားပေး ဆင့်ခေါ်၍ ပါဝင်ရသော အဆိုတော်နှင့် အနုပညာရှင်များကို ဆန္ဒအလျောက် တက်ကြွစွာ ပါဝင်သူများဟု စစ်တပ်လက်အောက်ခံ ပြန်ကြားရေးဝန်ကြီးဆိုသူ မောင်မောင်အုန်းက စတင်သုံးနှုန်းပြောဆိုလာသည်။
နိုဝင်ဘာလ ၁၅ ရက်နေ့ ရန်ကုန်မြို့ ပြည်လမ်းရှိ မြန်မာ့အသံနှင့်ရုပ်မြင်သံကြားတွင် ရွေးကောက်ပွဲ အောင်မြင်ရေး ဂီတအစည်းအရုံး (ဗဟို) အစီ အစဉ်ဖြင့် အသိပညာပေးနှိုးဆော်ရေး ရွေးကောက်ပွဲလှုံ့ဆော်တေး ရိုက်ကူးနေမှုကို မောင်မောင်အုန်းက သွားရောက် ကြည့်ရှုပြီးနောက် ယင်းကဲ့သို့ မောင်မောင်အုန်းက ပြောဆိုသုံးနှုန်းလာခြင်းဖြစ်သည်။
ရွေးကောက်ပွဲ မဲပေးရေး လှုပ်ရှားမှုအတွက် ဂီတအစည်းအရုံး (ဗဟို) ဥက္ကဋ္ဌ လွင်မြင့်နှင့် အဆိုတော်များက လာရောက်ပါဝင်ခဲ့ကြပြီး ရွေးကောက်ပွဲလှုံ့ဆော်တေးသီချင်းရိုက်ကူးခဲ့ကြကြောင်း၊ “အနာဂတ်မျှော်ရည် မဲပေးမည်” သီချင်းခေါင်းစဉ်ဖြင့် တေးသံရှင်များဖြစ်ကြသည့် ရဲထိုက်၊ ကိုလတ်၊ ကြည်ဖြူခင်၊ ရွှေဖြူ၊ မို့မို့ကျော်လွင်၊ ခင်လပြည့်ဝန်းနှင့် ပုလဲသန့်သွယ်တို့ က သီဆို ရိုက်ကူးခဲ့ကြောင်း၊ ယင်းတေးသီချင်းကို အကော်ဒီယံ အောင်မင်းနိုင်က ရေးသားပြီး ဂီတမှူး အကယ်ဒမီဝင်းကိုနှင့် အဖွဲ့က တီးခတ်အသံသွင်းကြောင်း သိရှိရသည်။
ယင်းနောက် မောင်မောင်အုန်းက ရွေးကောက်ပွဲ မဲပေးရေး ထောက်ခံ တေးသီချင်း လာရောက် ရိုက်ကူးပေးသော တေးသံရှင်များကို တွေ့ဆုံပြီး အနု ပညာရှင်များက ယခုကဲ့သို့ ဆန္ဒအလျောက် တက်ကြွစွာပါဝင်ဆောင်ရွက်မှုအပေါ် ဂုဏ်ယူအသိအမှတ်ပြုသည်ဟု ထုတ်ဖော်ပြောဆိုခဲ့ခြင်းဖြစ်သည်။
အောက်တိုဘာလ ၃၀ ရက်နေ့ အကြမ်းဖက်စစ်တပ် လက်အောက်ခံ ပြန်ကြားရေးနှင့် ပြည်သူ့ဆက်ဆံရေးဦးစီးဌာနမှ ညွှန်ချုပ်အေးကြွယ်က ရန်ကုန်မြို့ရှိ ရုပ်ရှင်လုပ်ငန်းရုံးတွင် ရုပ်ရှင်နှင့် အနုပညာရှင်အသိုင်းအ၀ိုင်းကို ခေါ်ယူတွေ့ဆုံပြီး လာမည့် ရွေး ကောက် ပွဲအတွက် စစ်တပ်က ပြုလုပ်မည့် ဝါဒဖြန့် အလိမ်အညာ စည်းရုံးရေးများတွင် ပါဝင်သရုပ်ဆောင်ရမည်ဖြစ်ကြောင်း၊ လွတ်ငြိမ်းဖြင့် ပြန်လည် လွတ်မြောက်လာသော အနုပညာရှင်၊ သရုပ်ဆောင်များပါ မကျန် ပါဝင်ရမည်ဖြစ်ကြောင်း အကယ်၍ ငြင်းဆန်လျှင် အထက်အမိန့်အရ အရေးယူမည်ဟု ဖိအားပေးပြောဆိုခဲ့ခြင်းဖြစ်သည်။
ထိုသို့ ရွေးကောက်ပွဲ ဝါဒဖြန့် လှုပ်ရှားမှုများတွင် ပါဝင်ရန် ဆက်သွယ်မှုကို အကြောင်းမပြန်သဖြင့် မင်းသမီးဖွေးဖွေးနှင့် သရုပ်ဆောင် အလင်းရောင်ကိုလည်း စစ်တပ်က ခေါ်ယူ စစ်ဆေးမှုများ လုပ်ဆောင်ခဲ့သေးသည်။
စစ်တပ်က ထုတ်လွှင့်ပြသခဲ့သော “ခေတ်သမိုင်းကို ဒုန်းစိုင်းမည့်သူများ” ရွေး ကောက်ပွဲဆိုင်ရာ အလိမ် အညာဝါဒဖြန့် ဇာတ်လမ်းကို လူမှုကွန်ရက်မှတစ် ဆင့် ဝေဖန်သည်ဟုဆိုကာ ဒါရိုက်တာ မိုက်တီး(ခ)သန်းထွန်းဇော်၊ ဇာတ်ပို့ သရုပ်ဆောင် ကျော်ဝင်းထွဋ်(ခ)ကျော်မင်းထွဋ်နှင့် ဟာသ သရုပ် ဆောင် အုန်းဒိုင်း(ခ)ဇော်မြင့် ၊ ဒါရိုက်တာ အောင်ချမ်းလူ၊ ရုပ်ရှင်ဒါရိုက်တာသက်လွင်(ခ) ဇမ္ဗူထွန်းသက်လွင် တို့ကို စစ်တပ်က ဖမ်းဆီးထားပြီး ရွေး ကောက်ပွဲ နှောင့်ယှက်သူများ ဥပဒေဖြင့် အမှုဖွင့်ထားသည်။
မောင်မောင်အုန်းက စစ်တပ်၏ အတုအယောင် ရွေးကောက်ပွဲ မဲပေးရေး လှုပ်ရှားမှုများ ရိုက်ကူးရေးများတွင် ကိုယ်တိုင် ကိုယ်ကျ လာရောက် ကြည့်ရှုခြင်းဖြင့် မင်းအောင်လှိုင်၏ မျက်နှာသာပေးမှုကို ရရန် ကြိုးပမ်းနေကြောင်း ပြန်ကြားရေးနှင့် နီးစပ်သော သတင်းရင်းမြစ်တချို့က ဆိုသည်။
“မောင်မောင်အုန်းက သရုပ်ဆောင်၊ အဆိုတော်တွေ ဆိုင်းဘုတ် ကိုင်ပြီး ရိုက်မယ့်နေ့ က လာဖို့ စီစဉ်ထားတာ။ မင်းသားမင်းသမီးတွေ၊ အဆိုတော်တွေ ကို တစ်ယောက်ချင်းစီကို ကိုင်တိုင်နှုတ်ဖို့ရော၊ အုပ်စုလိုက် မိန့်ခွန်းခြွေ ၊ စုပေါင်း ဓါတ်ပုံရိုက်ဖို့ နဲ့ သူ ဒီအနုပညာရှင်တွေ ကို ဘယ်လို စည်းရုံးထားပါတယ် ၊ ဘယ်လိုတွေ ဆောင်ရွက်နေပါတယ်ဆိုပြီး မအလ ကို မျက်နှာချိုသွေးပြီး မျက်နှာလို မျက်နှရလုပ်ဖို့ အစီစဉ်ရှိခဲ့ပေမယ့် တကယ်ရိုက်ကူးရေးနေ့မှာ မောင်မောင်အုန်းက မလာဖြစ်တော့ဘူး။ သူလာမယ့် အစီအစဉ်ပျက်သွားတယ်။ နေပြည်တော်မှာ အရေးပေါ်ကိစ္စ ရှိလို့ ဆိုပြီး အားချင်းသွားလိုက်ရလို့ ။ အဲဒါကြောင့် အဆိုတော်တွေနဲ့ “အနာဂတ်မျှော်ရည် မဲပေးမယ်” ဆိုတဲ့သီချင်း ရိုက်ကူးချိန်မှာ လာတာ။ နိုဝင်ဘာ ၁၅ နေ့ ရန်ကုန် ပြည်လမ်း မြန်မာ့အသံမှာ ရိုက်တဲ့ ရိုက်ကူးရေးကိုတော့ မင်းသားကြီးက မင်းသား လာလုပ်ပြီး သူ့ပထွေး မအလ ကို မျက်နှာလုပ်ပြီး အစီရင်ခံတယ်” ဟု အနုပညာအသိုင်းအ၀ိုင်း သတင်းရင်းမြစ်က ပြောဆိုသည်။
အကြမ်းဖက်စစ်တပ်က လာမည့် ဒီဇင်ဘာလ ၂၈ ရက်နေ့အတွင် အတုအယောင် ရွေးကောက်ပွဲ ပထမပိုင်းကို စတင်ပြုလုပ်မည်ဟု ထုတ်ပြန်ကြေညာထားသည်။