“ရွှေသွားရောင်းတဲ့အချိန် မိတာ။ တူမက အကြွေးတွေများနေလို့ အဒေါ်ဖြစ်သူကို အကူအညီ တောင်းတယ်၊ အဒေါ်က အိမ်ရောင်းရရင် ပေးမယ် ပြောတယ်၊ အိမ်ရောင်းရတော့ မကူညီဘဲ ရွှေတွေ ဝယ်လိုက်တာ တူမဖြစ်သူက သိတော့ အိမ်ကိုလာပြီး အဒေါ်ရော အိမ်ဖော်ကိုလည်း တူနဲ့ရိုက်ပြီး ရွှေ ၁၀ သားနဲ့ ငွေသိန်း ၁၀၀ လုသွားတာ၊ သူကိုယ်တိုင်လည်း စခန်းမှာ ဝန်ခံထားတယ်။”
ချမိးမြသာစည်မြို့နယ် မြို့သစ် ၂ ရပ်ကွက်မှာ အသက် ၈၄ နှစ်အရွယ် အဘွားအိုနဲ့ အိမ်အကူ အမျိုးသမီးကို ရိုက်နှက်ပြီး ရွှေနဲ့ငွေ လုယက်ခဲ့တဲ့ တူမဖြစ်သူကို အောက်တိုဘာ ၂၆ ရက်က ဖမ်းမိကြောင်း စစ်ကောင်စီက သတင်းထုတ်ပြန်ပါတယ်။
ငွေကြေးလိုအပ်ချက်ကြောင့် အဒေါ်ဖြစ်သူ အငြိမ်းစား စာကြည့်တိုက်မှူး ဒေါ်ခင်စိုးမြင့်နဲ့ အိမ်အကူ ဒေါ်အေးအေးခိုင် ကို အောက်တိုဘာ ၂၅ ရက် ညနေမှာ တူမဖြစ်သူ အလယ်တန်းပြဆရာမက တူနဲ့ထုရိုက်ပြီး ငွေကျပ်သိန်း ၁၀၀ နဲ့ ရွှေ ၁၀ ကျပ်သားကို လုယူခဲ့ရာ အဒေါ်ဖြစ်သူ သေဆုံးပြီး အိမ်အကူဖြစ်သူမှာ ပြင်းထန်စွာ ဒဏ်ရာရခဲ့ပါတယ်။
မြို့ခံတယောက်က “အကြွေးပေးဖို့ ပိုက်ဆံလိုလို့ သူ့တူမက အဒေါ်နဲ့အိမ်အကူကို ရိုက်ပြီး လုသွားတာ။ အဒေါ် သေတယ်၊ အိမ်အကူ ဒဏ်ရာတယ်၊ မနေ့ကပဲ မိသွားတယ်လို့ စစ်တပ်က သတင်းထုတ်ပြန်ထားတယ်” လို့ DVB ကို ပြောပါတယ်။
ပြစ်မှုကျူးလွန်သူမှာ ပြင်ဦးလွင်မြို့နယ် အမှတ် ၄ အခြေခံပညာအထက်တန်းကျောင်းမှ အလယ်တန်းပြဆရာမ ဒေါ်စိုးစိုးထွန်း ဖြစ်ပြီး ငွေကြေးလိုအပ်ချက်ကြောင့် အဒေါ်ဖြစ်သူကို အကူအညီတောင်းရာ အိမ်ရောင်းပြီး ပေးမယ်ဆိုပြီး ကတိပေးခဲ့ပေမဲ့ မပေးတာကြောင့် ရိုက်နှက်ကာ လုယက်ခဲ့တာလို့ ဝန်ခံခဲ့ကြောင်း အုပ်ချုပ်ရေးနဲ့နီးစပ်တဲ့ သတင်းအရင်းအမြစ်က DVB ကို ပြောပါတယ်။
“ရွှေသွားရောင်းတဲ့အချိန် မိတာ။ တူမက အကြွေးတွေများနေလို့ အဒေါ်ဖြစ်သူကို အကူအညီ တောင်းတယ်၊ အဒေါ်က အိမ်ရောင်းရရင် ပေးမယ် ပြောတယ်၊ အိမ်ရောင်းရတော့ မကူညီဘဲ ရွှေတွေ ဝယ်လိုက်တာ တူမဖြစ်သူက သိတော့ အိမ်ကိုလာပြီး အဒေါ်ရော အိမ်ဖော်ကိုလည်း တူနဲ့ရိုက်ပြီး ရွှေ ၁၀ သားနဲ့ ငွေသိန်း ၁၀၀ လုသွားတာ၊ သူကိုယ်တိုင်လည်း စခန်းမှာ ဝန်ခံထားတယ်။”
အဆိုပါဖြစ်စဥ်မှာ အသက် ၈၄ နှစ်အရွယ် အငြိမ်းစားစာကြည့်တိုက်မှူး ဒေါ်ခင်စိုးမြင့် အခင်းဖြစ်နေရာမှာ သေဆုံးခဲ့ပြီး အိမ်အကူဖြစ်သူ မအေးအေးခိုင်ကတော့ မန္တလေးဆေးရုံကြီးမှာ အရေးပေါ် ဆေးကုသမှုခံယူနေရပါတယ်။
လတ်တလောမှာ ပြစ်မှုကျူးလွန်သူ ဒေါ်စိုးစိုးထွန်းကို ချမ်းမြသာစည်မြို့နယ်၊ အမှတ် ၁၁ နယ်မြေရဲစခန်းက (ပ) ၁၈၉/၂၀၂၅ ပုဒ်မ ၃၀၂/၃၂၆ နဲ့ အမှုဖွင့်စစ်ဆေးနေတယ်လို့ သိရပါတယ်။
ချမ်းမြသာစည်မြို့နယ်မှာ ပြီးခဲ့တဲ့ မတ်လကနေ စက်တင်ဘာလအတွင်း လုယက်မှု၊ ဓားပြတိုက်မှု၊ အနုကြမ်းစီးမှု ၇ ကြိမ်ဖြစ်ခဲ့ပြီး အဲဒီထဲက ပြစ်မှုကျူးလွန်သူ ၂ ယောက်ကို စက်တင်ဘာ ၉ ရက်က ဖမ်းမိခဲ့ပေမဲ့ ကျန်တဲ့ ၆ မှုက လက်ရှိအချိန်ထိ ဖမ်းမမိသေးဘူးလို့ အုပ်ချုပ်ရေးအသိုက်အဝန်းက ထောက်ပြပါတယ်။