■ နတ်ရေကန် ဗျူဟာကုန်းကို AA က ဝိုင်းထားပြီး ဖြည်းဖြည်းချင်း ထိုးစစ်ဆင်တိုက်ခိုက်နေ
Western News| အောက်တိုဘာ ၂၁
နေရာအနည်းငယ်သာ ကျန်ရှိတော့သည့် နတ်ရေကန်ဗျူဟာကုန်းကို အာရက္ခတပ်တော် AA နှင့် ပူးပေါင်းတပ်ဖွဲ့များမှ ဝိုင်းရံပိတ်ဆို့ထားပြီး ဖြေးဖြေးချင်း ထိုးစစ်ဆင်တိုက်ခိုက်နေကြောင်း နတ်ရေကန်စစ်ရေးသတင်းရင်းမြစ်က ပြောသည်။
နတ်ရေကန်ဗျူဟာကုန်းသည် ရခိုင်နှင့် မကွေးအစပ် အမ်း-ပဒါန်းလမ်းတွင်ရှိသော စစ်ကောင်စီ၏ ဗျူဟာကုန်းတပ်စခန်းတစ်ခုဖြစ်သည်။
အောက်တိုဘာလ ၁၅ ရက် အာရက္ခတပ်တော် AA ၏ စစ်ရေးသတင်းထုတ်ပြန်ချက်တွင် နတ်ရေကန်ဗျူဟာကုန်း စခန်းအား အပြီးသတ်သိမ်းပိုက် ရရှိနိုင်ရေး အနည်းငယ်သော လက်ကျန်နေရာအချို့ကို ထိုးစစ်ဆင်တိုက်ခိုက်နေသည်ဟု ပြောဆိုထားသည်။
ယနေ့ အောက်တိုဘာလ ၂၁ ရက်နေ့ နတ်ရေကန်ဗျူဟာကုန်း စစ်ရေးအခြေအနေကို ခိုင်မာသော စစ်ရေးသတင်းရင်းမြစ်တစ်ဦးက ယခုလို ပြောသည်။
“အခုထိတော့ ဝိုင်းဝန်းထားတုန်းပါပဲ။ ထောက်ကူလမ်းတွေလည်း ဖြတ်တောက်ထားတယ်။ လက်တလော ဖြည်းဖြည်းချင်း ထိုးစစ်ဆင်နေတာမျိုးပါ။ အာရက္ခတပ်တော် ဆီမှာရော PDF တွေဆီမှာရော လက်နက်ချ အလင်းဝင်လာသူ၊ ထွက်ပြေးလာသူတွေတော့ ရှိပါတယ်” ဟု ပြောသည်။
နတ်ရေကန်ဗျူဟာကုန်း အနီးရှိ ဂုတ်ကြီး၊ ဖိုက်တာကုန်း စသည့် ကာကင်းစခန်းများအားလုံးကို AA ပူးပေါင်းတပ်ဖွဲ့မှ သိမ်းပိုက်ပြီးနောက် ပင်မဗျူဟာကုန်းကို သိမ်းပိုက်ရရှိနိုင်ရေး ကြိုးပမ်းနေကြခြင်းဖြစ်သည်။
ထိုသို့ ထိုးစစ်ဆင်တိုက်ခိုက်နေစဉ်အတွင်း နတ်ရေကန်ဗျူဟာကုန်းပေါ်မှ ထွက်ပြေးနေသူများနှင့် အလင်းဝင်လာသူ စုစုပေါင်း စစ်ကောင်စီတပ်သား ၁၁ ဦးအး ဖမ်းဆီးရမိထားကြောင်း AA မှ အောက်တိုဘာလ ၁၇ ရက်တွင် ထုတ်ပြန်ထားသည်။
နောက်ထပ် စစ်ရေးသတင်းရင်းမြစ်တစ်ဦးက “နတ်ရေကန်က မကွေးအတွက်ရော၊ ရခိုင်အတွက်ရော အရေးပါတာကို AA ရော၊ PDF ရော၊ စစ်ကောင်စီရော အားလုံးက သိကြတယ်။ ဒီကုန်းကို ရသွားပြီဆိုရင် ငဖဲမြို့က တပ်ရင်းတွေ၊ ကပစ စက်ရုံတွေကို ဟောင်ဝစ်ဇာလက်နက်ကြီးတွေနဲ့ လှမ်းထုလို့ရတယ်။ ဒါကို စစ်ကောင်စီက သိတော့ အသေအလူး ပြန်ခုခံနေတာဖြစ်တယ်။ AA ရဲ့ ထိုးစစ်တွေကို လေကြောင်းပစ်ကူရော၊ လူအင်အားတွေရော အဆက်မပြတ် ပို့ပေးနေတယ်” ဟု ပြောသည်။
နတ်ရေကန်ဗျူဟာကုန်း မကျစေရေးအတွက် စစ်ကောင်စီက စစ်ကူများနှင့် လေကြောင်းပစ်ကူများ အဆက်မပြတ် ပြုလုပ်ပေးနေသော်လည်း အကောင်းဆုံး တုံ့ပြန်ခံစစ်များနှင့်အတူ ထိုးစစ်ဆင်တိုက်ခိုက်လျက်ရှိသည်ဟု AA က ပြောဆိုထားသည်။
နတ်ရေကန်ဗျူဟာကုန်းတွင် ၂၀၂၄ ခုနှစ်ကစ၍ တမခ-၉၉ နှင့် စကခ-၁၇ တပ်များ အင်အားဖြည့်တပ်စွဲထားပြီး စစ်ကောင်စီတပ်သား အင်အား ၆၀၀ နီးပါးအထိ ကျန်ရှိနေသေးကြောင်း သတင်းရင်းမြစ်များထံမှ သိရသည်။
နတ်ရေကန်ဗျူဟာကုန်းမှ စစ်ကောင်စီတပ်သားများအနေဖြင့် လက်နက်ချ အလင်းဝင်ရောက်လိုသူများ အချိန်မရွေး လာရောက်နိုင်သည်ဟု အာရက္ခတပ်တော် AA နှင့် PDF များက တိုက်တွန်း ပြောဆိုထားကြသည်။
#WesternNews #WN #နတ်ရေကန်ဗျူဟာကုန်း #အာရက္ခတပ်တော် #ထိုးစစ်ဆင်တိုက်ခိုက်နေ #စစ်ကောင်စီ #စစ်မှုထမ်းတပ်သားများ #အလင်းဝရောက် #PDFများ #ပူးပေါင်းစစ်ဆင်ရေး