ရန်ကုန်၊ မြောက်ဥက္ကလာပမြို့နယ်မှာ ကြံ့ခိုင်ရေးပါတီရုံး ပေါက်ကွဲမှုဖြစ်ပြီးနောက် ဇူလိုင် ၁၁ ရက် ညပိုင်းမှာ သံသယနဲ့ စွပ်စွဲဖမ်းဆီးခံထားရတဲ့ လူငယ် ၂ ယောက် စစ်မှုထမ်းအဖြစ် စုဆောင်းခံရပြီး စစ်သင်တန်း တက်နေရတယ်လို့ မိသားစုနဲ့နီးစပ်တဲ့ မြို့ခံတွေက ပြောပါတယ်။
စစ်မှုထမ်း အပတ်စဉ် ၁၆ သင်တန်းတက်နေတဲ့ အဆိုပါ လူငယ် ၂ ယောက်ဟာ မြောက်ဥက္ကလာ၊ တံတားကြီးရပ်ကွက်နေ ကိုအောင်ကိုနဲ့ ကိုကောင်းစည်သူတို့ ဖြစ်ပါတယ်။
လူငယ် ၂ ယောက်ဟာ ဖမ်းဆီးခံရချိန်က မြို့နယ်ရဲစခန်းမှာ မိဘတွေနဲ့ တကြိမ်သာ တွေ့ဆုံခွင့်ရပြီးနောက် အဆက်အသွယ် ပြတ်တောက်သွားတာလို့ သိရပါတယ်။
မြို့ခံတယောက်က “သူငယ်ချင်းနှစ်ယောက်စလုံး ပါသွားတာ။ မြောက်ဥက္ကလာရဲ မေးတော့လည်း မသိဘူး။ မင်္ဂလာဒုံသွားမေးလည်း မသိဘူး။ အချုပ်တွေရော ထောင်ကြီးပါ ရောက်ပြီးပြီ၊ မသိဘူးဆိုတာချည်းပဲ။ ဟိုနေ့က သိသိချင်း တညင်းကုန်း စစ်သားစုဆောင်းရေး သွားမေးမှ ကလေး ၂ ယောက်စလုံး ရှိနေတယ်။ ဘာမှမဖြစ်ဘူးလို့ သိလိုက်ရတာ” လို့ ပြောပါတယ်။
ဩဂုတ် ၁၅ ရက်မှာတော့ ရန်ကုန်တိုင်းစစ်ဌာနချုပ်၊ အမှတ် ၁ လေ့ကျင့်ရေးကျောင်းက စစ်သင်တန်းသားတွေရဲ့ မှတ်တမ်းပုံတွေ ထုတ်ပြန်ခဲ့ပြီး မိသားစုဝင်တွေက တွေ့ရှိ စုံစမ်းရာက စစ်မှုထမ်းထဲ ရောက်နေတာ သိရတာဖြစ်ပါတယ်။
ဇူလိုင် ၁၁ ရက် ည ၁၀ နာရီ ၁၅ မိနစ်လောက်မှာ Yangon Army နဲ့ အနောက်ပိုင်းခရိုင် ပကဖ ပူးပေါင်းအဖွဲ့က M79 လောင်ချာ ၄၀ မမ ဗုံးသီး ၂ လုံးနဲ့ ခေမာသီလမ်း၊ မြောက်ဥက္ကလာ ကြံ့ခိုင်ရေးရုံးကို ပစ်ခတ်တိုက်ခိုက်ခဲ့တာဖြစ်ပါတယ်။
စွပ်စွဲဖမ်းဆီးခံရသူ ၂ ယောက်ဟာ ကြံ့ခိုင်ရေးရုံးရှေ့ ဝေပုလ္လလမ်းထိပ် လက်ဖက်ရည်ဆိုင်ကနေ မေဓာဝီလမ်းဆုံဘက်ကို လမ်းလျှောက်ပြန်လာရင်း စစ်တပ်ရဲ့ ဖမ်းဆီးခံခဲ့ရတာဖြစ်ပြီး ပစ်ခတ်တိုက်ခိုက်ခဲ့သူတွေကိုတော့ ဖမ်းဆီးနိုင်ခြင်း မရှိပါဘူး။