လူထုခေါင်းဆောင် ဒေါ်အောင်ဆန်းစုကြည် လွတ်မြောက်ရေး ကြိုးပမ်းမည်ဟု ပြင်သစ်နိုင်ငံခြားရေးဝန်ကြီး ကတိပြု

လူထုခေါင်းဆောင် ဒေါ်အောင်ဆန်းစုကြည် လွတ်မြောက်ရေး ကြိုးပမ်းမည်ဟု ပြင်သစ်နိုင်ငံခြားရေးဝန်ကြီး ကတိပြု
ရန်ကုန်၊ ​မေ ၆
အကြမ်းဖက်စစ်တပ်၏ မတရားဖမ်းဆီးခံထားရသော နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် လွတ်မြောက် ရေး ပြင်သစ်နိုင်ငံက ကြိုးပမ်းမည်ဟု ပြင်သစ်နိုင်ငံ၊ ဥရောပနှင့်နိုင်ငံခြားရေးဝန်ကြီး ဂျန်နိုရယ် ဘာရော့ (M. Jean-Noël Barrot) က ကတိပြု ပြောဆိုလိုက်သည်။
မေလ ၅ ရက်နေ့ ဒေါ်အောင်ဆန်းစုကြည်၏သားဖြစ်သူ ကိုထိန်လင်းနှင့် ပြင်သစ်နိုင်ငံခြားရေးဝန်ကြီးတို့ တွေ့ဆုံစဉ် ပြင်သစ်နိုင်ငံခြားရေးဝန်ကြီး M. Jean-Noël Barrotက အထက်ပါအတိုင်း ကတိပြုလိုက်ခြင်းဖြစ်သည်။
အဆိုပါ တွေ့ဆုံပွဲတွင် ဒေါ်အောင်ဆန်းစုကြည်၏ အခြေအနေနှင့် ပတ်သက်၍ စစ်ကောင်စီ၏ ထုတ်ပြန်ချက်များကို ပြင်သစ်နိုင်ငံခြားရေးဝန်ကြီးက မှတ်သားထားကြောင်း၊ သူမကို အမြန်ဆုံး ခြွင်းချက်မရှိ ပြန်လည်လွှတ်ပေးရန် ပြင်သစ်နိုင်ငံက ဆက် လက်ကြိုးပမ်းသွားမည်ဖြစ်ကြောင်း ထုတ်ဖော်ပြောဆိုသည်။
လူထုခေါင်းဆောင် ဒေါ်အောင်ဆန်းစုကြည်၏ ကျန်းမာရေးအခြေအနေကို အထူးဂရုပြု စောင့်ကြည့်နေပြီး ဆေးကုသခွင့်ရရှိရန်၊ ရှေ့နေများအပြင် မိသားစုဝင်များနှင့် ဆက်သွယ်ခွင့်ရရှိရန် လိုအပ်ကြောင်း ဝန်ကြီးက ထောက်ပြသည်။
ထို့အပြင် ကိုထိန်လင်းနှင့် အရပ်ဘက်အဖွဲ့အစည်းများ ပူးပေါင်းလုပ်ဆောင်နေသည့် “Proof of Life” (အသက်ရှိထင်ရှားရှိကြောင်း သက်သေပြရေး) လှုပ်ရှားမှုကိုလည်း ဝန်ကြီးက ကြိုဆိုဂုဏ်ပြုသည်။
မြန်မာ့အရေး ဖြေရှင်းရေးအတွက် ချမှတ်ထားသော အာဆီယံ၏ ဘုံသဘောတူညီချက် ၅ ချက်ကို အပြည့်အဝ အကောင်အထည်ဖော်ရန်၊ အကြမ်းဖက်မှုများ ချက်ချင်းရပ်တန့်ရန်နှင့် အားလုံးပါဝင်နိုင်သည့် ဆွေးနွေးပွဲများ ဖြစ်လာစေရန် ပြင်သစ်နိုင်ငံက တောင်းဆိုထားသည်။
စစ်ကောင်စီဘက်က ထိရောက်သည့် တိုးတက်မှုများ မရှိသည့်အတွက် ၂၀၂၆ ခုနှစ် ဧပြီ ၂၇ ရက်နေ့တွင် ဥရောပသမဂ္ဂ (EU) က မြန်မာနိုင်ငံအပေါ် ချမှတ်ထားသည့် ပိတ်ဆို့အရေးယူမှုများကို နောက်ထပ်တစ်နှစ် သက်တမ်းတိုးလိုက်ခြင်းကို ပြင်သစ်က ထောက်ခံသည်။ အဆိုပါပိတ်ဆို့မှုများသည် စစ်ရာဇဝတ်မှု ကျူးလွန်သူများနှင့် လူ့အခွင့်အရေး ချိုးဖောက်သူများကို ပစ်မှတ်ထားခြင်းဖြစ်သည်။
ပြင်သစ်အစိုးရအနေဖြင့် မြန်မာ့ဒီမိုကရေစီအရေး၊ ဒေါ်အောင်ဆန်းစုကြည် အပါအဝင် မတရားဖမ်းဆီးခံထားရသူအားလုံး လွတ်မြောက်ရေးအတွက် နိုင်ငံတကာ မိသားစုဝင်များနှင့်အတူ ဆက်လက်ရပ်တည်သွားမည်ဖြစ်ကြောင်း ကတိပြု ပြောဆိုထားသည်။
“ပြင်သစ်နိုင်ငံရဲ့ ဥရောပနဲ့နိုင်ခြားရေးဝန်ကြီး Mr. Jean-Noel Barrot နဲ့ တွေ့ဆုံခွင့်ရခဲ့ပါတယ်။ ပြင်သစ်အစိုးရရဲ့ ခိုင်ခိုင်မာမာ ရပ်တည်ပေးမှုအတွက် အထူးကျေးဇူးတင်ရှိပါတယ်။ ပြင်သစ်နိုင်ငံက ကျွန်တော့်မေမေ ဒေါ်အောင်ဆန်းစုကြည်နဲ့ မတရားဖမ်းဆီးခံထားရသူများအားလုံးကို ချက်ချင်း လုံးဝလွှတ်ပေးရန် တောင်းဆိုထားပြီး၊ မေမေ့ကျန်းမာရေး၊ ဆေးကုသခွင့်နဲ မိသားစုနဲ့ဆက်သွယ်ခွင့်တို့ကို အထူးအရေးထားကြောင်းလည်း ပြောပါတယ်။
Proof of Life campaign ကို အသိအမှတ်ပြုပေးပြီး ပွင့်လင်းမြင်သာမှုနဲ့ လူ့အခွင့်အရေးများအတွက် တောင်းဆိုပေးထားတာကိုလည်း ကျေးဇူးတင်ပါတယ်။ နိုင်ငံတကာအစိုးရများအားလုံးက ယုံကြည်စိတ်ချရပြီး အမှီအခိုကင်းပြီး လွတ်လပ်တဲ့ အဖွဲ့အစည်းများက အတည်ပြုထားသော proof of life ရရှိဖို့ ဆက်လက် တောင်းဆိုပေးကြပါရန် ကျနော် တောင်းဆိုလိုက်ပါတယ်” ဟု ကိုထိန်လင်းက လူမှုကွန်ရက်မှတစ်ဆင့် သတင်းထုတ်ပြန်ထားသည်။