ငလျင်ထိထားတဲ့ပျော်ဘွယ်မှာ လေပြင်းတိုက်လို့ နေအိမ်နဲ့စာသင်ကျောင်းတွေ ပျက်စီး
ဧပြီ ၃၀၊၂၀၂၆။ဟာနာဆန်/People’s Spring
မန္တလေးတိုင်း၊ ပျော်ဘွယ်မြို့နယ်မှာ မိုးသက်လေပြင်းတိုက်ခတ်မှုကြောင့် ရပ်ကွက်နဲ့ ကျေးရွာအုပ်စုအချို့က နေအိမ်တွေနဲ့ စာသင်ကျောင်းအချို့ ပျက်စီးခဲ့ပါတယ်။
ပျော်ဘွယ်မြို့နယ်မှာ ပြီးခဲ့တဲ့ ဧပြီ ၂၈ ရက် ညနေ ၃ နာရီ ၅၀ မိနစ်ကနေ ၄ နာရီ ၂၀ မိနစ်ခန့်အထိ နာရီဝက်ကြာ မိုးရွာသွန်းပြီး လေပြင်းတိုက်ခတ်ခဲ့ရာ ပျော်ဘွယ်မြို့ပေါ်ရှိ မြို့မ၊ မြင်းဘက်၊ ရွှေပြည်ရန်နိုင်ရပ်ကွက်တွေနဲ့ ရွှေညောင်ဖူး၊ မင်းလမ်း၊ ရွာထင်၊ ထရံကာ၊ ဂွေးဇီး၊ မြောက်ကန်ကြီးနဲ့ ဘတ္တကျေးရွာအုပ်စုတွေမှာ ထိခိုက်ပျက်စီးမှုတွေ ရှိခဲ့ကြောင်း ပျော်ဘွယ်မီးသတ်က အသိပေးပါတယ်။
အဲဒီ လေပြင်းတိုက်ခတ်မှုကြောင့် လူနေအိမ် ၁၆လုံး၊ စာသင်ကျောင်း (၁)ဆောင် ပျက်စီးဆုံးရှုံးခဲ့ကြောင်း ပျော်ဘွယ်မီးသတ်က ထပ်မံအသိပေးပါတယ်။
“အမိုးလန်တဲ့အိမ်တွေလည်း ရှိတယ်။ အဲဒီအိမ်တွေဆိုရင် ငလျင်တုန်းက အိမ်တွေယိုင်ထားတာ ခုထိမပြင်နိုင်သေးတာ”လို့ ဒေသခံတစ်ဦးက ပြောပါတယ်။
လေဘေးသင့်ပြည်သူတွေကို ရပ်နီးရပ်ဝေးစေတနာရှင်တွေစုပေါင်းပြီး ကူညီပေးကြဖို့ မြို့ခံလူမှုကူညီရေးလုပ်ကိုင်သူတွေက နှိုးဆော်နေကြပါတယ်။
အဲဒီနေ့ကပဲ မန္တလေးတိုင်း၊ ပဲခူးတိုင်းနဲ့ ရှမ်းပြည်နယ်က ဒေသအချို့မှာ မိုးသက်လေပြင်းကျပြီး အဆောက်အအုံတွေ ပျက်စီးမှု ရှိခဲ့ပါတယ်။
လာမယ့် မေလ ၃ ရက်အထိ မိုးအခြေအနေမှာ အရှေ့ဘက်နဲ့ အနောက်ဘက်မှ လာတဲ့ လေပွေလှိုင်းအရှိန်ကြောင့် စစ်ကိုင်းတိုင်း၊ မန္တလေးတိုင်း၊ ကချင်ပြည်နယ်၊ ချင်းပြည်နယ်နဲ့ရှမ်းပြည်နယ်တို့မှာ နေရာအနှံ့အပြား မိုးထစ်ချုန်းရွာနိုင်ပြီး မကွေးတိုင်း၊ ပဲခူးတိုင်း၊ တနင်္လာရီတိုင်း ၊ရခိုင်ပြည်နယ်၊ ကရင်ပြည်နယ်၊ ကရင်နီပြည်နယ်နှင့် မွန်ပြည်နယ်တို့မှာ နေရာကျဲကျဲ မိုးထစ်ချုန်းရွာနိုင်တယ်လို့ NUG ရဲ့ မိုးဇလက အသိပေးထားပါတယ်။
ဒေသအလိုက် နေ့အပူချိန်တွေတိုးလာတာကြောင့် နေ့လယ်ပိုင်းနဲ့ ညနေပိုင်း အချိန်တွေမှာ လေပြင်းတိုက်ခတ်တာ၊ မိုးတိမ်တောင်ကြီးတွေ ဖြစ်ပေါ်တတ်တာ၊ နေရာကွက်ပြီး မိုးကြီးတာ၊ မိုးသီးတွေကြွေကျတာ၊ လျှပ်စီးလက်တာနဲ့ မိုးကြိုးပစ်တာ စတဲ့ ဘေးအန္တရာယ်တွေဖြစ်ပေါ်နိုင်လို့ ပိုပြီး ဂရုပြုကြဖို့ လိုအပ်ကြောင်း သတိပေးထားပါတယ်။
(ပျော်ဘွယ်မြို့နယ်တွင် လေပြင်းကြောင့် ပျက်စီးခဲ့သော နေအိမ်အချို့အား တွေ့ရစဥ်။ ဓာတ်ပုံ-ပျော်ဘွယ်မီးသတ်)