မြန်မာ့နိုင်ငံရေးတွင် စစ်တပ် ပါဝင်ခြင်းအား အဆုံးသတ်မည်ဟု NUG ဆို
ဧရာဝတီ၊ ဧပြီ ၁၈၊ ၂၀၂၆
နွေဦးတော်လှန်ရေး၏ ဘုံရည်မှန်းချက်ဖြစ်သော စစ်အာဏာသိမ်းမှု ဖယ်ရှားပြီး မြန်မာ့နိုင်ငံရေးတွင် စစ်တပ်ပါဝင်နေခြင်းကို အဆုံးသတ်ရန် လုပ်ဆောင်သွားမည် ဖြစ်ကြောင်း အမျိုးသားညီညွတ်ရေးအစိုးရ (NUG) က ယနေ့ ထုတ်ပြန်သည်။
၂၀၂၃ ခုနှစ် ဇန်နဝါရီလ ၃၁ ရက်က ကချင်၊ ကရင်နီ၊ ကရင်၊ ချင်း မဟာမိတ်တိုင်းရင်းသားများနှင့် ပူးတွဲထုတ်ပြန်ခဲ့သည့် ဘုံသဘောထား ရပ်တည်ချက်နှင့် မတ်လ ၃၀ ရက်တွင် ထုတ်ပြန်သော ဖက်ဒရယ်ဒီမိုကရေစီပြည်ထောင်စုပေါ်ထွန်းရေး ဦးဆောင် ကောင်စီ၏ ဆုံးဖြတ်ချက်အရ ထိုသို့ ထုတ်ပြန်ခဲ့ခြင်း ဖြစ်ကြောင်း ဆိုသည်။
ထို့ပြင် NUG အစိုးရက နိုင်ငံတော်သမ္မတကြီးဦးဝင်းမြင့်အပါအဝင် နိုင်ငံရေး အကျဉ်းသားအချို့ မိသားစုနှင့် ပြန်လည်ဆုံဆည်းရခြင်းကို ဝမ်းမြောက်ကြောင်းနှင့် NUG အပါအဝင် တိုင်းရင်းသားတော်လှန်ရေးအဖွဲ့အစည်းများ၊ တော်လှန်ရေးအင်အားစုများ အနေဖြင့် ၂၀၂၀ ရွေးကောက်ပွဲကို ရလဒ်ကို အသိအမှတ်ပြုပြီး နိုင်ငံတော်သမ္မတနှင့် အတိုင်ပင်ခံကို ဆက်လက်အတည်ပြုထားသည်ဟုလည်း ဖော်ပြထားသည်။
နွေဦးတော်လှန်ရေး၏ အန္တိမပန်းတိုင်သည် နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည် အပါအဝင် မတရား ဖမ်းဆီးထိန်းသိမ်းခံထားရသူများအားလုံး ခြွင်းချက်မရှိ လွတ်မြောက်ရေးဖြစ်သည့်အပြင် ခေတ်အဆက်ဆက် စစ်အာဏာရှင်လူတစုက ၎င်းတို့၏ ကိုယ်ကျိုးစီးပွားကို ဦးတည်၍ တိုင်းပြည်နှင့်ပြည်သူလူထုအား နည်းမျိုးစုံ ဖိနှိပ်ချုပ်ချယ် အနိုင်ကျင့်လေ့ရှိသည့် အဆိုးကျော့သံသရာက အပြီးတိုင်လွတ်မြောက်ရေးဖြစ်ကြောင်း NUG က ပြောသည်။
စစ်တပ်၏ ပြည်သူလူထုတရပ်လုံးအပေါ် ရက်စက်ကြမ်းကြုတ်စွာ ကျူးလွန်ခဲ့၊ ကျူးလွန်ဆဲ စစ်ရာဇဝတ်မှုများနှင့် နိုင်ငံတကာလူသားချင်းစာနာမှု ဆိုင်ရာဥပဒေ (International Humanitarian Law) ကို ကျူးလွန်ဖောက်ဖျက်မှုများအား အသွင် ကူးပြောင်းရေး ကာလတရားမျှတမှုရရှိရေး ဆောင်ကြဉ်းပေးနိုင်သည့်အခြေအနေရှိမှသာ ဖက်ဒရယ်ဒီမိုကရေစီ ပြည်ထောင်စု တည်ဆောက်ရေး အောင်မြင်မည်ဟု မှတ်ယူ၍ ဆက်လက်တိုက်ပွဲဝင်သွားမည် ဖြစ်ကြောင်းလည်း NUG က အသိပေးထားသည်။
ပုံစာ-ပြည်သူ့ကာကွယ်ရေးတပ်မတော် (PDF) စစ်ဆင်ရေးနယ်မြေ (၂)၊ အခြေခံစစ်သင်တန်း အပတ်စဉ် (၁/၂၀၂၅) သင်တန်းဆင်း အခမ်းအနား/ NUG-MOD