နိုင်ငံတော်သမ္မတ ဦးဝင်းမြင့် ပြန်လည် လွတ်မြောက်လာဟု စစ်တပ်ထောက်ခံသော သတင်းဌာနများနှင့်တယ်လီဂရန်ချန်နယ်များက တစ်ပြိုင်နက်တည်း သတင်းဖော်ပြ
ရန်ကုန်၊ ဧပြီ ၁၇
အကြမ်းဖက်စစ်တပ်က နိုင်ငံတော်သမ္မတ ဦးဝင်းမြင့်ကို ပြန်လည် လွှတ်ပေးလိုက်ကြောင်း စစ်တပ်ထောက်ခံသော Popular News Journal သတင်းဌာန၊ NP News အပါအဝင် စစ်တပ်၏ သတင်းတယ်လီဂရန်ချန်နယ်များအားလုံးက တစ်ပြိုင် နက်တည်း သတင်းဖော်ပြ ထုတ်ပြန်ကြသည်။
ယနေ့ ဧပြီလ ၁၇ ရက်နေ့ မြန်မာနှစ်ဆန်း ၁ရက်နေ့ အကြမ်းဖက် မင်းအောင်လှိင်က နိုင်ငံတော်သမ္မတ ဦးဝင်းမြင့်ကို လက်ရှိကျခံနေရသော ပြစ်ဒဏ်များအားလုံးကို လွတ်ငြိမ်းချမ်းသာခွင့်ပြုခဲ့ပြီး မိသားစုထံသို့ ပြန်လည် လွှဲပြောင်းလိုက်ကြောင်း စစ်တပ်ထောက်ခံသော သတင်းဌာနများနှင့်တယ်လီဂရန်ချန်နယ်များ၏ သတင်းဖော်ပြချက်အရ သိရှိရသည်။
ရန်ကုန်ခေတ်သစ်သတင်းဌာနက အဆိုပါသတင်းနှင့်ပတ်သက်၍ အမျိုးသားညီညွတ်ရေးအစိုးရ-NUG ဘက်သို့ အတည်ပြု ဆက်သွယ်မေးမြန်းရာ လက်ရှိအချိန်အထိ တစ်စုံတစ်ရာ အတည်ပြုချက် မပေးနိုင်သေးဟု NUG ဘက်က တုံ့ပြန်ပြောဆိုသည်။
နိုင်ငံတော်သမ္မတ ဦးဝင်းမြင့်ကို အကြမ်းဖက်စစ်တပ်က ၂၀၂၁ ခုနှစ်၊ ဖေဖော် ဝါရီလ ၁ ရက်နေ့ စစ်အာဏာသိမ်းပြီးနောက် ဖမ်းဆီးခဲ့ခြင်းဖြစ်ပြီး အဂတိအမှု ၄ မှုအပြင် ပုဒ်မ ၁၃၀-က တိုဖြင့် စုစုပေါင်း ထောင်ဒဏ် ၉ နှစ်နှင့် ၆ လ ချမှတ်ခဲ့ခြင်းဖြစ်သည်။
ဒေါ်အောင်ဆန်းစုကြည်ကို နေအိမ်အကျယ်ချုပ်ကို ပြောင်းရွှေ့မယ်ဆိုတဲ့သတင်းတွေကြောင့် အမျိုးသားဒီမိုကရေစီအဖွဲ့ချုပ် – NLD ပါတီ ရဲ့ ဗဟိုအလုပ်အမှုဆောင်တချို့ နေပြည်တော်ကို သွားရောက်နေတယ်လို့ ဘီဘီစီကသိရှိရပါတယ်။
” ကျွန်တော်တို့ ဥက္ကဋ္ဌကို နေအိမ်အကျယ်ချုပ်ချမယ်ဆိုတဲ့သတင်းတွေကြားတော့ ကျွန်တော်တို့က တွေ့ခွင့်ရမလားလို့ ကြိုးစားကြည့်မှာပေါ့လေ။ ရှေ့နေတွေလည်း ရောက်နေကြပါပြီ” လို့ NLD ရဲ့ ဗဟိုအလုပ်အမှုဆောင်အဖွဲ့ဝင် ဒေါက်တာမျိုးညွန့်ကပြောပါတယ်။
အာဏာသိမ်းတဲ့ ၂၀၂၁ ဖေဖော်ဝါရီ ၁ ရက်နေ့ကတည်းက အတိုင်ပင်ခံဒေါ်အောင်ဆန်းစုကြည်နဲ့ သမ္မတဦးဝင်းမြင့်တို့ ဖမ်းဆီးထိန်းသိမ်း ခံထားရတာ ရက်ပေါင်း ၁၉၀၀ ကျော် ရှိလာပြီဖြစ်ပါတယ်။
ပြီးခဲ့တဲ့ ရက်ပိုင်းကလည်း ဒေါ်အောင်ဆန်းစုကြည်ကို ဒုတိယဗိုလ်ချုပ်ကြီးရာပြည့်နဲ့ ပြည်ထဲရေးဝန်ကြီးအသစ် ဒုတိယ ဗိုလ်ချုပ်ကြီး ညွန့်ဝင်းဆွေတို့ သွားရောက် တွေ့ဆုံခဲ့တယ်ဆိုတဲ့ သတင်းတွေလည်း ကျယ်ကျယ်ပြန့်ပြန့် ထွက်ပေါ်ခဲ့ပါသေးတယ်။
BBC Burmese