စစ်အာဏာသိမ်းမှုနှင့် မင်းအောင်လှိုင်ကို ကာကွယ်ပြောဆိုခဲ့သော အကြမ်းဖက် ဇော်မင်းထွန်းကို စစ်ဘက်နှင့် အရပ်ဘက် ရာထူးတာဝန်များအားလုံးမှ အနားပေး
ရန်ကုန်၊ ဧပြီ ၆
စစ်အာဏာသိမ်းမှုနှင့် မင်းအောင်လှိုင်ကို ကာကွယ်ပြောဆိုခဲ့သော အကြမ်းဖက် ဇော်မင်းထွန်း စစ်ဘက်နှင့် အရပ်ဘက် ရာထူးတာဝန်များအားလုံးမှ အနားပေး ခံလိုက်ရပြီဖြစ်ကြောင်း နေပြည်တော်စစ်ဘက်သတင်းရင်းမြစ်က ပြောဆိုသည်။
ယခင်မတ်လအတွင်း အကြမ်းဖက်စစ်တပ်၏ ပြည်သူ့ဆက် ဆံရေးနှင့် စိတ်ဓာတ်စစ်ဆင်ရေးတပ်ဖွဲ့ ၏ ညွှန်ကြားရေးမှူး ဖြစ်သော ဗိုလ်ချုပ်ဇော်မင်းထွန်းကို စစ်ဘက်ရာထူးတာဝန်မှ အနားပေးလိုက်သည့်အပြင် ပြန်ကြားရေးဒုဝန်ကြီး တာဝန်မှလည်း အနားပေးလိုက်ကြောင်း၊ လက်ရှိတွင် နေအိမ်တွင်ပင် အကြမ်းဖက် ဇော်မင်းထွန်းရှိနေပြီး ဖမ်းဆီးစစ်ဆေးခြင်းမရှိကြောင်း သိရှိရသည်။
“စစ်ဘက်ရာထူးရော၊ အရပ်ဘက်ရာထူးရော သူ( အကြမ်းဖက်ဇော်မင်းထွန်း) မရှိတော့ဘူး။ Case ကတော့ တိုင်ကြားစာ တက်တာလို့ သိရတယ်။ ဘာကိစ္စ တိုင်ကြားစာလဲတော့မသိဘူး” ဟု နေပြည် တော်စစ်ဘက်သတင်းရင်းမြစ်ကဆိုသည်။
ထိုသို့ စစ်ဘက်နှင့်အရပ်ဘက်ရာထူးတာဝန်များမှ ဇော်မင်းထွန်းကို အနားပေးလိုက်သော်လည်း စစ်တပ်က အမိန့်နှင့် ပြန်တမ်းများကို အများပြည်သူသို့ တရားဝင် ထုတ်ပြန်ခြင်းမရှိကြောင်း သိရှိရသည်။
ယမန်နေ့ နေပြည်တော်တွင်ပြုလုပ်သော စစ်အာဏာသိမ်းကာလ တာဝန်ထမ်းဆောင်နေသော ဝန်ကြီး၊ ဒုဝန်ကြီးနှင့် စစ်တပ်ခေါင်းဆောင်များကို မင်းအောင် လှိုင်က ဂုဏ်ပြုဆုပေးအပ်သည့် အခမ်းအနားတွင် ပြန်ကြားရေးဝန်ကြီး မောင်မောင်အုန်းနှင့် ဒုဝန်ကြီး ရဲတင့်တို့ကို မင်းအောင်လှိုင်က ဂုဏ်ပြုဆု ပေးအပ်ခဲ့သော်လည်း ဇော်မင်းထွန်းကိုမူ လုံး၀ မတွေ့ရပေ။
အကြမ်းဖက် ဇော်မင်းထွန်းသည် ပြန်ကြားရေးဝန်ကြီးလည်းဖြစ်၊ ယခု အကြမ်း ဖက်ပြည်သူ့လွှတ်တော်ဒုတိယဥက္ကဋ္ဌလည်းဖြစ်သူ မောင်မောင်အုန်းနှင့်လည်း ဆက်ဆံရေး မပြေလည်ခဲ့ကြောင်း သိရှိရသည်။
အကြမ်းဖက်ဇော်မင်းထွန်း၏ စစ်ဘက်ရာထူးဖြစ်သော ပြည်သူ့ဆက် ဆံရေးနှင့် စိတ်ဓာတ်စစ် ဆင်ရေးတပ်ဖွဲ့ ၏ ညွှန်ကြားရေးမှူး အဖြစ် ဗိုလ်မှူးချုပ် ရဲရင့်အောင် အစားထိုးခဲ့ကြောင်း သိရှိရသည်။
အကြမ်းဖက် မင်းအောင်လှိုင်က သမ္မတအဖြစ် တာဝန်ယူပြီး ပြန်လည် ဖွဲ့စည်းမည့် အစိုးရသစ်တွင် ဇော်မင်းထွန်း ပြန်မပါရန် သေချာသလောက် ရှိသော်လည်း ဇော်မင်းထွန်းက အသနားခံစာနှင့် ထု ချေလွှာ တင်သွင်းထားကြောင်း၊ အကယ်၍ မင်းအောင်လှိုင်က ဇော်မင်းထွန်း၏ အသနားခံစာနှင့် ထုချေလွှာကို လက်ခံပါက အစိုးရအဖွဲ့သစ်တွင် ပြန်လည် ပါဝင်နိုင်ဖွယ်ရှိကြောင်း နေပြည်တော် စစ်ဘက်သတင်းရင်းမြစ်က သုံးသပ်ပြောဆိုသည်။