ခါမေနီသေဆုံးကြောင်း အီရန်နိုင်ငံပိုင် မီဒီယာအတည်ပြု၊ အကြီးကျယ်ဆုံးထိုးစစ်ဆင်မည်ဟု ကြေညာ

ခါမေနီသေဆုံးကြောင်း အီရန်နိုင်ငံပိုင် မီဒီယာအတည်ပြု၊ အကြီးကျယ်ဆုံးထိုးစစ်ဆင်မည်ဟု ကြေညာ

အမေရိကန်နဲ့ အစ္စရေးတို့ရဲ့ တိုက်ခိုက်မှုတွေကြောင့် အီရန်ဘာသာရေးခေါင်းဆောင်ကြီး အယာတိုလာ အလီခါမေနီ ဟာ ရုံးခန်းမှာ တာဝန်ထမ်းဆောင်နေစဉ် သေဆုံးသွားပြီလို့ အီရန်နိုင်ငံပိုင် မီဒီယာက တရားဝင် အတည်ပြု ထုတ်ပြန်ပါတယ်။
ဖေဖော်ဝါရီ ၂၈ ရက် မနက်ပိုင်းက ဖြစ်ပွားခဲ့တဲ့ ဒီတိုက်ခိုက်မှုမှာ ခါမေနီရဲ့ သမီး၊ သမက်နဲ့ မြေးဖြစ်သူတို့ပါ အတူသေဆုံးခဲ့တယ်လို့ ဆိုပါတယ်။ ခါမေနီ ပုန်းအောင်းနေတယ်ဆိုတဲ့ သတင်းတွေဟာ ရန်သူတွေရဲ့ စိတ်ဓာတ်စစ်ဆင်ရေးသာဖြစ်တယ်လို့ အီရန်သတင်းဌာနက တုံ့ပြန်ထားပါတယ်။ တီဟီရန်မြို့က သူ့ရဲ့ ရုံးခန်းအဆောက်အအုံ ပျက်စီးသွားတာကိုလည်း ဂြိုဟ်တုပုံရိပ်တွေကတဆင့် အတည်ပြုတွေ့ရှိရပါတယ်။
အီရန်တော်လှန်ရေးအစောင့်တပ် IRGC က အိမ်နီးချင်းနိုင်ငံတွေမှာ အခြေစိုက်ထားတဲ့ အမေရိကန်စခန်း ၁၄ ခုကို လေကြောင်းကနေ တိုက်ခိုက်ခဲ့ပြီး တပ်ဖွဲ့ဝင်အယောက် ၂၀၀ ထက်မနည်း သေဆုံး ဒဏ်ရာရခဲ့တယ်လို့ အီရန် နိုင်ငံပိုင် မီဒီယာနဲ့ တက်စ်နင်မ် သတင်းဌာန တို့က ကြေညာခဲ့ပါတယ်။
ဒီတိုက်ခိုက်မှုတွေအတွက် လက်တုံ့ပြန်တဲ့အနေနဲ့ အီရန်တော်လှန်ရေးအစောင့်တပ် (IRGC) က အီရန်သမိုင်းတစ်လျှောက် အပြင်းထန်ဆုံးထိုးစစ်ကို မကြာမီ စတင်တော့မယ်လို့ ကြေညာထားပါတယ်။ ဒေသတွင်းမှာ သိမ်းပိုက်ခံထားရတဲ့ နယ်မြေတွေနဲ့ အမေရိကန် အကြမ်းဖက်စခန်းတွေကို အဓိက ပစ်မှတ်ထား တိုက်ခိုက်သွားမယ်လို့ IRGC က သတိပေးထားပါတယ်။​
သေဆုံးသွားတဲ့ အီရန်အဓိက ခေါင်းဆောင်များ
၁။ အယာတိုလာအလီခါမေနီ – ဘာသာရေးခေါင်းဆောင်
၂။ ဗိုလ်ချုပ်ကြီး မိုဟာမက်ပက်ပေါ – အီရန်လက်နက်ကိုင်အဖွဲ့ IRGC ရဲ့ ကာကွယ်ရေးဦးစီးချုပ် Commander in Chief
၃။ ဗိုလ်မှူးချုပ်အဇစ်နာဇီယာဇာဒက် – ကာကွယ်ရေးဝန်ကြီး
၄။ အလီရှန်ကာနီ – ခါမေနီရဲ့ ကာကွယ်ရေးဆိုင်ရာအကြံပေး
၅။ မိုဟာမက်ရှာရာဇီ – ခိုမေနီရဲ့ စစ်ရေးဗျူဟာ အကြီးအကဲ
၆။ ဆာလက်အဆာဒီ – ထောက်လှမ်းရေးအကြီးအကဲ
၇။ ဆာအစ်အအစ်ဇာဒီ – ပါလက်စတိုင်း Quds တပ်ဖွဲ့အကြီးအကဲ
ပုံစာ – အီရန်ခေါင်းဆောင် ခါမေနီ သေဆုံးကြောင်း အီရန်နိုင်ငံပိုင်မီဒီယာက ကြေညာအပြီး Tehran မြို့ Enghelab Square ရင်ပြင်မြင်ကွင်း။
Photos – Majid Asgaripour/WANA (West Asia News Agency) via REUTERS