အီရန်ခေါင်းဆောင် ခါမေနီနှင့်အတူ အီရန်ကာကွယ်ရေးဝန်ကြီး၊ စစ်တပ်အကြီးအကဲများစွာ သေဆုံးသွားပြီဟု အစ္စရေးက အမည်စာရင်းများနှင့်တကွ ထုတ်ပြန်ကြေညာ
ရန်ကုန်၊ မတ် ၁
အီရန်ခေါင်းဆောင် ခါမေနီနှင့်အတူ အီရန်ကာကွယ်ရေးဝန်ကြီး၊ စစ်ဘက်ခေါင်းဆောင်များ သေဆုံးသွားပြီဟု အစ္စရေးက အမည်စာရင်းများနှင့်တကွ ထုတ်ပြန်ကြေညာလိုက်သည်။
ယနေ့နံနက်ပိုင်း အီရန်နိုင်ငံအတွင်း ပြုလုပ်ခဲ့သော “Lion’s Roar” စစ် ဆင်ရေးအတွင်း အီရန်အမြင့်ဆုံးခေါင်းဆောင် အယာတိုလာ အလီခါမေနီ (Ayatollah Ali Khamenei)နှင့်အတူ အီရန်ခေါင်း ဆောင်၏ လုံခြုံရေးဆိုင်ရာ အကြံပေးအရာရှိ အလီ ရှမ်ခါနီ ၊ အီရန်နိုင်ငံ၏ ကာကွယ်ရေးဝန်ကြီး အဇစ် နာဆီရာဇာဒေး (Aziz Nasirzadeh)၊ အီရန် စစ်ဘက်ရေးရာရုံး အကြီးအကဲ မိုဟာမက် ရှီရာဇီ (Mohammad Shirazi)၊ အစ္စလာမ်မစ်တော်လှန်ရေးအစောင့်တပ်ဖွဲ့ (IRGC) ၏ အဆင့်မြင့်တပ်မှူးကြီး မိုဟာမက် ပတ်ခ်ပွား (Mohammad Pakpour)၊ အီရန်စစ်တပ်၏ ထိပ်တန်းထောက်လှမ်းရေးအရာရှိကြီး ဆာလေ အာဆာဒီ (Saleh Asadi) တို့ပါဝင်ကြောင်း သိရှိရသည်။
အစ္စရေးစစ်ဘက် ပြောရေးဆိုခွင့်ရှိသူ၏ အဆိုအရ အီရန် စစ်ဘက်အရာရှိကြီးများက တီဟီရန်မြို့တော်အတွင်းရှိ အဆောက်အအုံနှစ်ခု၌ အဆင့်မြင့်အစည်း အဝေး ပြုလုပ်နေစဉ် တိကျသော လေကြောင်းတိုက်ခိုက်မှု (Precision Strike) ဖြင့် ချေမှုန်းခံခဲ့ရခြင်းဖြစ်သည်ဟု ဆိုသည်။
သို့သော်လည်း အီရန်နိုင်ငံခြားရေးဝန်ကြီး အဘတ်စ် အရတ်ချီကမူ “ခေါင်း ဆောင်ကြီး ခါမေနီသည် အသက်ရှင်လျက်ရှိနေသေးသည်” ဟု အစောပိုင်းတွင် မရေရာစွာ ပြောကြားခဲ့ပြီး၊ အီရန်အစိုးရဘက်မှလည်း ယခုဖော်ပြပါ အရာရှိကြီးများ သေဆုံးမှုစာရင်းနှင့် ပတ်သက်၍ ယခုအချိန်အထိ တရားဝင် အတည်ပြုထုတ်ပြန်ခြင်း မရှိသေးပေ။
အီရန်ခေါင်းဆောင် ခါမေနီ အပါအဝင် အီရန်ခေါင်းဆောင်များ သေဆုံးသွားပြီဟု အမေရိကန် သမ္မတထရမ့် ပြောကြား
ရန်ကုန်၊ မတ် ၁
အမေရိကန်သမ္မတ ဒေါ်နယ်ထရမ့်က အီရန်အမြင့်ဆုံးခေါင်းဆောင်ကြီး အယာတိုလာ အလီခါမေနီသည် စနေနေ့ လေကြောင်းတိုက်ခိုက်မှုအတွင်း သေဆုံးသွားခဲ့ပြီဆိုသည့် သတင်းများမှာ “မှန်ကန်သည်” ဟု မိမိယုံကြည်ကြောင်း ထုတ်ဖော်ပြောဆိုလိုက်သည်။
NBC သတင်းဌာနနှင့် ပြုလုပ်ခဲ့သော တိုတောင်းသည့် ဖုန်းအင်တာဗျူးတစ်ခုတွင် သမ္မတထရန့်က ခါမေနီသေဆုံးမှုသတင်းနှင့် ပတ်သက်၍ “အဲဒီသတင်းဟာ မှန်ကန်တဲ့သတင်းဖြစ်တယ်လို့ ကျနော်တို့ ခံစားရပါတယ်” ဟု ဖြေကြားခဲ့သည်။
၎င်း၏ ပြောကြားချက်အရ အီရန်၏ ထိပ်သီးခေါင်းဆောင်ပိုင်း အမြောက်အမြားသည်လည်း အဆိုပါတိုက်ခိုက်မှုအတွင်း သေဆုံးခဲ့ကြောင်း သိရသည်။
“သမိုင်းမှာ အယုတ်မာဆုံးဆိုတဲ့ လူတွေထဲက တစ်ယောက်ဖြစ်တဲ့ ခါမေနီကတော့ သေသွားပါပြီ။ ဒါဟာ အီရန်ပြည်သူတွေအတွက်တင် မဟုတ်ဘူး၊ ခါမေနီကြောင့် အသက်ဆုံးရှုံးခဲ့ရတဲ့၊ ကိုယ်လက်အင်္ဂါတွေ ပျက်စီးခဲ့ရတဲ့ ကျနော်တို့ရဲ့ မွန်မြတ်လှတဲ့ အမေရိကန်နိုင်ငံသားတွေရော၊ ကမ္ဘာတစ်ဝန်းက နိုင်ငံအများအပြားမှာရှိတဲ့ ပြည်သူတွေအားလုံးအတွက်ပါ တရားမျှတမှု ရရှိလိုက်တာပဲ ဖြစ်ပါတယ်” ဟု အမေရိကန်သမ္မတ ဒေါ်နယ် ဂျေ ထရမ့်က လူမှုကွန်ရက်မှတစ်ဆင့် သတင်းထုတ်ပြန်ထားသည်။
ထို့ပြင် အီရန်နိုင်ငံ၏ အရေးကြီးသော ဆုံးဖြတ်ချက်များ ချမှတ်လေ့ရှိသည့် အဆင့်မြင့်အရာရှိကြီး အတော်များများမှာလည်း ယခုအခါ မရှိတော့ကြောင်း (Gone) အမေရိကန်သမ္မတက ဖြည့်စွက်ပြောကြားခဲ့သည်။
လက်ရှိ အခြေအနေမှာ အီရန်အစိုးရ၏ အုပ်ချုပ်ရေးယန္တရား ကြီးမားစွာ ထိခိုက်သွားခြင်းကို ရည်ညွှန်းခြင်း ဖြစ်ကြောင်း သိရှိရသည်။
အစ္စရေးစစ်တပ်ကလည်း ယနေ့နံနက်ပိုင်း အီရန်နိုင်ငံအတွင်း ပြုလုပ်ခဲ့သော လေကြောင်းစစ်ဆင်ရေးအတွင်း အီရန်၏ အဓိကစစ်ဘက်ခေါင်းဆောင်များဖြစ်သည့် ကာကွယ်ရေးဝန်ကြီးနှင့် အစ္စလာမ်မစ်တော်လှန်ရေးအစောင့်တပ်ဖွဲ့ (IRGC) ၏ အဆင့်မြင့်တပ်မှူးကြီးတို့ကို သတ်ဖြတ်နိုင်ခဲ့ကြောင်း တရားဝင် ထုတ်ပြန်ကြေညာသည်။
အီရန်၏ အမြင့်ဆုံးခေါင်းဆောင်သစ် မည်သူဖြစ်လာနိုင်သနည်းဟူသော မေးခွန်းနှင့် ပတ်သက်၍မူ သမ္မတထရမ့်က “ကျနော်လည်း မသိပါဘူး။ ဒါပေမဲ့ တစ်ချိန်ချိန်မှာတော့ သူတို့ဘက်က ကျနော်ဆီ ဖုန်းဆက်ပြီး ဘယ်သူ့ကို ခေါင်းဆောင်အဖြစ် သဘောကျသလဲဆိုတာ လာမေးကြပါလိမ့်မယ်” ဟု ပြောဆိုသည်။