ဗိုလ်နဂါးကို VIP အစီအစဉ်နှင့် ကယ်ထုတ်မှုအပေါ် စစ်တပ်ထောက်ခံ အသိုင်းအဝိုင်းအတွင်း ပေါက်ကွဲ
20 Feb 2026 By Sayar Ngatt / MPA
ဗိုလ်နဂါးကို VIP အထူးအစီအစဉ်နှင့် ကယ်ထုတ်မှုအပေါ် စစ်တပ်ထောက်ခံ အသိုင်းအဝိုင်းအတွင်း ပေါက်ကွဲနေပြီး ရှေ့တန်းက စစ်သားများထက် နဂါးက ပိုတန်ဖိုးရှိနေသလားဆိုသည့် မေးခွန်းထုတ်မှုများလည်း ရှိလာသည်။
စစ်ကော်မရှင်ထံ လက်နက်ချ အညံ့ခံသွားသည့် ဗိုလ်နဂါးကို စစ်တပ်က ရဟတ်ယာဉ်ဖြင့် VIP အဆင့်မျိုး အသုံးပြုကာ အထူးတလည် ကယ်ထုတ်ခဲ့သည့်အပေါ် စစ်တပ်မိသားစုဝင်များအကြာ ဝေဖန်မှုများ ရှိနေသည်ဟု နီးစပ်သူများက ပြောသည်။
“ရှေ့တန်းမှာ အသက်ပေးနေရတဲ့ အရာရှိ၊ ရဲဘော်တွေ ဒဏ်ရာရနေတဲ့ သူတွေတောင် ရဟတ်ယာဉ် မစီးရဘူး။ နဂါးကျမှ အဆင့်မြင့်နေတယ်။ ရှေ့တန်းကလူတွေ အသက်ကို ဗိုလ်နဂါးလောက်မှ တန်ဖိုးမထားလို့ ပြောနေကြတာ”လို့ စစ်တပ်အသိုင်းအဝိုင်းနှင့် ပြောပြသည်။
ရှေ့တန်းစစ်မျက်နှာများတွင် ဒဏ်ရာရနေသည့် စစ်တပ်လက်အောက်ခံ တပ်သားများနှင့် ရိက္ခာပြတ်၍ လက်နက်ချနေရသည့်သူများအတွက် ရဟတ်ယာဉ်ဖြင့် ကယ်ထုတ်ရန် နေနေသာသာ လိုအပ်သည့် ထောက်ပံ့မှုများပင် မရရှိသောကြောင့် ၎င်းတို့က ထောက်ပြနေကြခြင်း ဖြစ်သည်ဟု ဆိုသည်။
ထို့အပြင် နိုင်ငံရေးတက်ကြွလှုပ်ရှားသူတစ်ဦးကလည်း လားရှိုးနှင့် ရခိုင်က ဖြစ်စဉ်များကို နှိုင်းယှဉ်ပြီး ယခုလို ဝေဖန်ထားပါသည်။
“မအလ (မင်းအောင်လှိုင်) က လားရှိုးမှာ အသေအကြေ ခံချခဲ့တဲ့ သူ့လူများကိုတောင် ရဟတ်ယာဉ်နဲ့ လာမခေါ်ပါ။ ဒကစမှူး အဆင့်တောင် MNDAA လက်ထဲမှာ ကားခနဲ မိသွားတယ်။ ရခိုင်မှာလည်း သူ့လူ အကောင်ကြီးတွေကို ရဟတ်ယာဉ်နဲ့ လာခေါ်တယ်ဆိုတာ တစ်ခါမှ မကြားဖူးဘူး။ အခု နဂါးကျမှ Evacuation (ကယ်ထုတ်မှု) ကို VIP Treatment – Premium Package နဲ့ လာခေါ်သွားတာဖြစ်တယ်” ဟု ၎င်းက ဆိုသည်။
၎င်းက ဆက်လက်၍ ဗိုလ်နဂါး စစ်တပ်နှင့် ပေါင်းသွားပြီဆိုသည်မှာ အထင်အရှား ဖြစ်နေသော်လည်း အွန်လိုင်းပေါ်က နိုင်ငံရေးအမည်ခံ ဆယ်လီ၊ သတင်းသမားအမည်ခံ ဆယ်လီများက လက်ရှိအချိန်အထိ ဖာထေး ပြောဆိုမှုများကိုလည်း ပြင်းပြင်းထန်ထန် ဝေဖန်လိုက်သည်။
“ပထွေးက အကောင်လိုက်ကြီး (စစ်တပ်ဆီ) ရောက်သွားနေပြီကို အခုထိ နဂါးက စစ်တပ်နဲ့ မပေါင်းခဲ့ပါဘူးဆိုပြီး ဖာထေးနေတုန်း။ MOD က တွန်းပို့လို့ပဲ ဆိုပြီး ချီး(ချေး)ငုံပြီး ပြောနေကြတယ်။ အရှက်က တစ်စက်မှ မရှိဘူး” ဟု ၎င်းက ပြောသည်။
ယခုဖြစ်စဉ်တွင် စစ်ကော်မရှင်က ဗိုလ်နဂါးအား ရဟတ်ယာဉ်ဖြင့် အထူးတလည် ကယ်ထုတ်ပြခြင်းသည် တော်လှန်ရေးဘက်ကို စိတ်ဓာတ်ပျက်ပြားအောင် လုပ်ရန် ရည်ရွယ်သော်လည်း တစ်ဖက်တွင်မူ စစ်တပ်ဘက်က စစ်သည်များ၏ စိတ်ဓာတ်ကို အကြီးအကျယ် ထိခိုက်စေသည့် ဘေးထွက်ဆိုးကျိုးများလည်း ရှိနေသည်ဟု သုံးသပ်မှုများရှိနေသည်။
ဓာတ်ပုံ-လူမှုကွန်ရက်
စာတည်း-ကိုဆန်း
#ဗိုလ်နဂါး #ကယ်ထုတ်မှု #စစ်တပ်ထောက်ခံ #MPA #Sayar_Ngaat