ဒေါ်လာ၊ ရွှေ အပါအဝင် စျေးကစားသည့်နေရာများသို့ ငွေ​ကြေးများ မရောက်စေရန်ဟုဆိုကာ ဗဟိုဘဏ်က ငွေသားထုတ်ယူမှုများကို ကန့်သတ်လိုက်၍ ပုဂ္ဂလိကဘဏ်များတွင် ငွေသားများ လိုသလောက် ထုတ်မရတော့

ဒေါ်လာ၊ ရွှေ အပါအဝင် စျေးကစားသည့်နေရာများသို့ ငွေ​ကြေးများ မရောက်စေရန်ဟုဆိုကာ ဗဟိုဘဏ်က ငွေသားထုတ်ယူမှုများကို ကန့်သတ်လိုက်၍ ပုဂ္ဂလိကဘဏ်များတွင် ငွေသားများ လိုသလောက် ထုတ်မရတော့
ရန်ကုန်၊ ဖေဖော်ဝါရီ ၇
ပြည်တွင်းစီးပွားရေးနယ်ပယ်အတွင်း အမေရိကန်ဒေါ်လာ၊ ရွှေ အပါအဝင် စျေးကွက်အတွင်း စျေးကစားသည့်နေရာများသို့ ငွေ​ကြေးများ မရောက်စေရန်ဟုဆိုကာ စစ်တပ်လက်အောက်ခံ ဗဟိုဘဏ်က ငွေထုတ်မှုများကို ကန့်သတ်ရန် ညွှန်ကြားထားကြောင်း UMFCCI သတင်းရင်းမြစ်က ရန်ကုန်ခေတ်သစ်သတင်းဌာနထံသို့ ပြောဆိုသည်။
ဖေဖော်ဝါရီ ၅ ရက်နေ့ မြန်မာနိုင်ငံကုန်သည်များနှင့်စက်မှုလက်မှုလုပ်ငန်းရှင်များအသင်းချုပ် UMFCCI တွင် ပြုလုပ်သော ကုန်သည်များနှင့်တွေ့ဆုံပွဲတစ်ခုတွင်လည်း စစ်တပ်လက်အောက်ခံ ဗဟိုဘဏ်ဥက္ကဋ္ဌ သန်းသန်းဆွေ က ဒေါ်လာ၊ ရွှေ အပါအဝင် စျေးကစားသည့် စျေးကွက်များအတွင်းသို့ ကျပ်ငွေများ ထုတ်ယူ ရင်းနှီးမြုပ်နှံခြင်းကို အားမပေးကြောင်း၊ ထို့ကြောင့် ငွေသား ထုတ်ယူမှုများကို ထိန်းကျောင်းထိန်းချုပ်လျက်ရှိကြောင်း ထုတ်ဖော်ပြောဆိုခဲ့သည်။
UMFCCI သတင်းရင်းမြစ်က ကုန်သည်များနှင့်ပွဲရုံများက ယခုရက်ပိုင်းအတွင်း ငွေထုတ်ယူရာတွင် အကန့် အသတ်များဖြင့် ဘဏ်များက ဆောင်ရွက်လာသဖြင့် လုပ်ငန်းများ လုပ်ဆောင်ရာတွင် အခက်အခဲများ ကြုံတွေ့နေရသည်ဟု ကုန်သည်စက်မှုအသင်းချုပ်ထံသို့ အသိပေးလာပြီး ညှိနှိုင်းဖြေရှင်းပေးရန် မေတ္တာရပ်ခံမှုများ ရှိနေကြောင်း သိရှိရသည်။
“အခုက ပဲနှမ်းရာသီဖြစ်တော့ ငွေထုတ်တဲ့ကိစ္စတွေ ထုတ်မရလို့ UMFCCI ဆီကို အကူအညီတောင်းလာတဲ့ Case တွေ အများကြီးပဲ” ဟု UMFCCI သတင်းရင်းမြစ်က ပြောဆိုသည်။
ရန်ကုန်အခြေစိုက် ကုန်သည်များ၊ ငွေထုတ်သူများက ဖေဖော်ဝါရီလ ပထမအပတ်အတွင်း ပုဂ္ဂလိကဘဏ်များတွင် ငွေထုတ်ယူမှုများကို ကန့်သတ်မှုများ ကြုံတွေ့ခဲ့ရပြီး ငွေများကို လိုသလောက် ထုတ်မပေးတော့ဘဲ အကန့်အသတ်ဖြင့်သာ ထုတ်ပေးမှုများ ကြုံနေရကြောင်း ရန်ကုန်ခေတ်သစ်သတင်းဌာနထံသို့ ဆက်သွယ်ပြောဆိုကြသည်။
“မနေ့က လှည်းတန်း KBZ ဘဏ်မှာ သိန်း ၂၀၀ သွားထုတ်တာကို သိန်း ၅၀ ပဲ ထုတ်ပေးပါတယ်။ အဲဒါနဲ့ မြေနီကုန်း KBZ ဘဏ်မှာ ထပ်ထုတ်လို့ရမလားဆိုပြီး ထပ်သွားထုတ်တော့ တစ်ကြိမ်ပဲ ထုတ်ခွင့်ရှိမယ်ဆိုပြီး ငွေပေး မထုတ်ဘူး။ ဘာလို့ ထုတ်မပေးတာလဲ မေးတော့ ငွေသားလက်ကျန်နည်းနေလို့ပဲပြောတယ်။ ငွေလွှဲတာနဲ့ K -Pay ကတော့ ဘာမှ ကန့်သတ်ချက်မရှိဘူး။ အဓိက ငွေသားထုတ်တာကို ထုတ်မပေးတာ” ဟု ကမာရွတ်မြို့နယ်တွင် စတိုးဆိုင်နှင့်ကလေးပစ္စည်းအွန်လိုင်းအရောင်းအဝယ်လုပ်နေသော ဆိုင်ပိုင်ရှင်တစ်ဦးက ရှင်းပြသည်။
အခြားသော ဧရာ၀တီဘဏ်၊ ရိုးမဘဏ်နှင့် မြန်မာ့ရှေ့ဆောင်ဘဏ်တို့တွင်လည်း ငွေသားထုတ်ယူမှုများကို အကန့်အသတ်များနှင့် စည်းကမ်းချက်များစွာ ရှိလာနေကြောင်း ငွေထုတ်ယူနေသော ပြည်သူများက ပြောဆိုကြသည်။
ပုဂ္ဂလိကဘဏ်များက ငွေသားများ အကန့်အသတ်ဖြင့် ထုတ်ပေးမှုများကို အကြောင်းပြရာတွင် ကျပ်ငွေမရှိတော့ခြင်း၊ ငွေလက်ကျန်နည်းနေခြင်း စသည့် အကြောင်းမျိုးစုံပြခဲ့ကြသော်လည်း ဗဟိုဘဏ်က ငွေသားထုတ်ယူမှု ကန့်သတ်ခိုင်းထားသည်ဆိုသော ညွှန်ကြားချက် ထုတ်ထားကြောင်း ထုတ်ဖော်ပြောဆိုခြင်းမပြုဟု သိရှိရသည်။
UMFCCI သတင်းရင်းမြစ်ကမူ ပြည်တွင်း လုပ်ငန်းရှင်များအနေဖြင့် လုပ်ခလစာပေးရာတွင်လည်းကောင်း၊ ငွေချေမှုများ လုပ်ဆောင်ရာတွင်လည်းကောင်း အွန်လိုင်းဘဏ်စနစ်ကို အဓိက အသုံးပြုရန် ဗဟိုဘဏ်၏ ညွှန်​ကြားချက်ကို လိုက်နာကြရန် အသိပညာပေးမှုများ တောက်လျှောက် လုပ်ဆောင်နေကြောင်း၊ UMFCCI နှင့် ဗဟိုဘဏ်အကြားတွင်လည်း အမြဲမပြတ် ထိတွေ့ဆက်ဆံမှုများ ရှိနေကြောင်း ပြောဆိုသည်။