တော်လှန်ရေးရဲဘော်များ၏ အုတ်ဂူပေါ် ခြေထောက်တင်ပြီး အောက်တန်းကျသည့် လုပ်ရပ်ကို ကျော်စိုးဦး လုပ်ဆောင်

တော်လှန်ရေးရဲဘော်များ၏ အုတ်ဂူပေါ် ခြေထောက်တင်ပြီး အောက်တန်းကျသည့် လုပ်ရပ်ကို ကျော်စိုးဦး လုပ်ဆောင်
7 Jan 2026 By Mon Lay / MPA
မြန်မာနိုင်ငံအနှံ့အပြားရှိ စစ်မြေပြင်များတွင် စစ်ရေးအရ အဘက်ဘက်မှ အရှုံးနှင့် ရင်ဆိုင်နေရသည့် စစ်ကော်မရှင်သည် ယခုအခါ လက်နက်ကိုင် တော်လှန်နေသူများကိုသာမက ကွယ်လွန်သွားပြီဖြစ်သည့် တော်လှန်ရေးရဲဘော်များ၏ ဂူဗိမာန်များအထိပါ ရန်ရှာစော်ကားသည့် အောက်တန်းကျသော လုပ်ရပ်များကို ပြောင်ပြောင်တင်းတင်း လုပ်ဆောင်လာနေသည်ကို တွေ့ရှိရသည်။
မကြာသေးမီက စစ်တပ်လော်ဘီ ကျော်စိုးဦးဆိုသူသည် စဉ့်ကူးနှင့် မတ္တရာမြို့နယ်အတွင်းရှိ တော်လှန်ရေးရဲဘော်များ၏ အုတ်ဂူများပေါ်တွင် ခြေထောက်တင်ကာ မိုက်မိုက်ရိုင်းရိုင်း ပြောဆိုနေသည့် ရုပ်သံနှင့် ဓာတ်ပုံများကို လူမှုကွန်ရက်ပေါ်၌ ပျံ့နှံ့စေခဲ့ခြင်းက ယင်းအခြေအနေကို သက်သေပြနေခြင်းဖြစ်ကြောင်း နိုင်ငံရေးလေ့လာသူများနှင့် ပြည်သူများက သုံးသပ်သည်။
နိုင်ငံရေးနှင့် စစ်ရေးလေ့လာသူများ၏ သုံးသပ်ချက်အရ ဤလုပ်ရပ်သည် စစ်မြေပြင်ရှိ ရှုံးနိမ့်မှုများကို အုတ်ဂူပေါ်တွင် အနိုင်ယူပြခြင်းဖြင့် စိတ်ဓာတ်ပိုင်းဆိုင်ရာ လုံခြုံမှုရှာဖွေခြင်းသာ ဖြစ်သည်ဟု ဆိုကြသည်။
နိုင်ငံရေးလေ့လာသူတစ်ဦးက “စစ်ကော်မရှင်တပ်တွေဟာ နယ်မြေဒေသ အတော်များများကို လက်လွှတ်နေရသဖြင့် သူတိုကို ထောက်ခံသူတွေနဲ့ တပ်သားတွေ စိတ်ဓာတ်မကျစေဖို့ အောင်နိုင်သူ ဟန်ဆောင်တဲ့ ပုံစံမျိုးကို ဂူဗိမာန်တွေ ဖျက်ဆီးစော်ကားပြပြီး ဖန်တီးနေတာဖြစ်တယ်။ ဒါပေမဲ့ စစ်ရေးအရ အောင်နိုင်မှုမဟုတ်ဘဲ စစ်ကော်မရှင် ယန္တရားတစ်ခုလုံးရဲ့ ကျင့်ဝတ်နဲ့ လူသားဆန်မှုကင်းမဲ့တာကို ကမ္ဘာသိအောင် ကြေညာလိုက်တာပဲဖြစ်တယ် ” ဟု မှတ်ချက်ပြုသည်။
ထို့အပြင် မြန်မာ့ယဉ်ကျေးမှုအရသော်လည်းကောင်း၊ ကမ္ဘာ့စစ်ရေးကျင့်ဝတ်အရသော်လည်းကောင်း ကွယ်လွန်သူ၏ အလောင်း သို့မဟုတ် ဂူဗိမာန်ကို စော်ကားခြင်းမှာ အနိမ့်ကျဆုံးသော အပြုအမူဖြစ်ပြီး၊ ဤလုပ်ရပ်ကြောင့် စစ်ကော်မရှင်သည် နိုင်ငံတကာမျက်နှာစာတွင်လည်း ကိုယ်ကျင့်တရားပိုင်းဆိုင်ရာ ပိုမိုအထီးကျန်သွားစေမည်ဖြစ်ကြောင်း လေ့လာသူများက သတိပေးထားသည်။
ဤစော်ကားမှုအပေါ် ပြည်သူလူထုကလည်း အကြီးအကျယ် ခံပြင်းဒေါသထွက်လျက်ရှိပြီး ယင်းလုပ်ရပ်သည် တော်လှန်ရေးအင်အားစုများကို စိတ်ဓာတ်ကျဆင်းစေမည်မဟုတ်ဘဲ စစ်တပ်အပေါ်ထားရှိသည့် အမုန်းတရားကိုသာ ပိုမိုမီးမွှေးပေးလိုက်ခြင်းဖြစ်ကြောင်း ဆိုကြသည်။
ပြည်သူတစ်ဦးက “ကျုပ်တို့နိုင်ငံမှာ လူသေကို စော်ကားတာထက် ယုတ်ညံ့တာ မရှိတော့ဘူး။ အုတ်ဂူတွေကို ခြေထောက်နဲ့ နင်းလို့ရပေမဲ့ ပြည်သူ့ရင်ထဲက တော်လှန်ရေးစိတ်ဓာတ်ကိုတော့ သူတို့ ဘယ်တော့မှ နင်းခြေနိုင်မှာ မဟုတ်ပါဘူး။ ကွယ်လွန်သူကိုတောင် မရိုသေတဲ့ အဖွဲ့အစည်းဟာ သက်ရှိထင်ရှားရှိနေတဲ့ ပြည်သူတွေကို ဘယ်လောက်အထိ ညှဉ်းပန်းနှိပ်စက်မလဲဆိုတာ ပိုပြီး ထင်ရှားစေပါတယ်” ဟု ခံပြင်းစွာ ပြောဆိုခဲ့သည်။
အလားတူပင် လူမှုကွန်ရက် အသုံးပြုသူ ပြည်သူများကလည်း ကျော်စိုးဦး၏ လုပ်ရပ်သည် စစ်ကောင်စီ၏ “ကိုယ်ကျင့်တရား ကျဆုံးခန်း” ကို သက်သေပြလိုက်ခြင်းဖြစ်ကြောင်းနှင့် တော်လှန်ရေးအတွက် အသက်ပေးသွားသည့် ရဲဘော်များအတွက် ပိုမိုတန်ဖိုးထား ဂုဏ်ယူရကြောင်း တညီတညွတ်တည်း ဖော်ပြလျက်ရှိသည်။
“သူတို့တွေရဲ့ မိုက်ရိုင်းစော်ကားမှုတွေကို ကျတော်တို့ ဘယ်တော့မှ မမေ့ပါဘူး။ တော်လှန်ရေးကြီးပြီးသွားရင် သူတို့ကို တရားစီရင်မှာဖြစ်တယ် ” ဟု အညာဒေသမှ နိုင်ငံရေးမှူးတစ်ဦးက ပြောသည်။
စစ်တပ်လော်ဘီ ကျော်စိုးဦး၏ လုပ်ရပ်သည် ရန်သူကို အနိုင်ရခြင်းမဟုတ်ဘဲ မိမိတို့၏ အောက်တန်းကျမှုကို ထင်ဟပ်စေသည့် လုပ်ရပ်သာ ဖြစ်ကြောင်း ပြည်သူများက ဆိုသည်။
ယခုကဲ့သို့ စစ်တပ်လော်ဘီများ၏ လုပ်ရပ်များကြောင့် တော်လှန်ရေးအင်အားစုများ၏ စိတ်ဓာတ်သည် ယိုင်နဲ့သွားမည်မဟုတ်ဘဲ အာဏာရှင်စနစ် အမြစ်ပြတ်ရေးအတွက် ပိုမိုပြင်းထန်သော စိတ်ဓာတ်များဖြင့် ဆက်လက်ချီတက်သွားကြမည်ဖြစ်ကာ၊ အုတ်ဂူတစ်ခုကို ဖျက်ဆီးနိုင်သော်လည်း ခိုင်မာနေသည့် ပြည်သူ့ဆန္ဒနှင့် တော်လှန်ရေးအရှိန်အဟုန်ကိုမူ မည်သည့်စော်ကားမှုဖြင့်မျှ တားဆီးနိုင်မည်မဟုတ်ကြောင်း တော်လှန်ရေးရဲဘော်များက ဆိုသည်။
ဓာတ်ပုံ-လူမှုကွန်ရက်
စာတည်း-ကိုဆန်း
#တော်လှန်ရေးရဲဘော်များ #အုတ်ဂူပေါ်ခြေထောက်တင် #ကျော်စိုးဦး #MPA #Mon_Lay