ကျားဖြန့် ကွန်ရက်ကြီး တစ်ခုရဲ့ ပိုင်ဆိုင်မှု ဒေါ်လာ သန်း ၃၀၀ ကျော်ကို သိမ်းယူထားကြောင်း ထိုင်းထုတ်ပြန်

ကျားဖြန့် ကွန်ရက်ကြီး တစ်ခုရဲ့ ပိုင်ဆိုင်မှု ဒေါ်လာ သန်း ၃၀၀ ကျော်ကို သိမ်းယူထားကြောင်း ထိုင်းထုတ်ပြန်
အရှေ့တောင်အာရှ အခြေစိုက် အွန်လိုင်း ငွေကြေး လိမ်လည်မှု (ကျားဖြန့်) ကွန်ရက်ကြီး တစ်ခုနဲ့ ဆက်စပ်တဲ့ ပိုင်ဆိုင်မှု တန်ဖိုး ဒေါ်လာ သန်း ၃၀၀ ကျော်လောက်ကို သိမ်းဆည်းရမိထားပြီး ဖြစ်တယ်လို့ ထိုင်းအစိုးရက ပြောပါတယ်။
ဒီဇင်ဘာ ၃ ရက်နေ့မှာ ဝန်ကြီးချုပ် အနုတင် ချန်ဗီရက်ကူက အဲဒီ သိမ်းဆည်းရမိမှုတွေ အကြောင်းကို ထုတ်ပြန်ခဲ့တာ ဖြစ်ပါတယ်။ အမေရိကန်၊ အာရှနဲ့ ဥရောပတို့မှာ ကျားဖြန့် နှိမ်နင်းရေး အားထုတ်မှုတွေကို အရှိန်အဟုန် မြှင့်တင်လာတဲ့ အချိန်မှာ ထိုင်းအစိုးရက ဒီသတင်းကို ကြေညာခဲ့တာပါ။
အထူးသဖြင့် အမေရိကန်ဟာ ကမ္ဘောဒီးယားနဲ့ အရှေ့တောင်အာရှ နိုင်ငံတချို့မှာ ဖြန့်ကျက်ထားတဲ့ ကျားဖြန့် လုပ်ငန်းတွေနဲ့ ဆက်စပ်နေတဲ့ Prince Holding Groupကို ပစ်မှတ်ထား ဖြိုခွင်းလာနေပါတယ်။ ကမ္ဘောဒီးယားနဲ့ ထိုင်းတို့ဟာ နယ်စပ် အငြင်းပွားမှုတွေအတွက် တင်းမာနေသလို အခုနှစ်လယ်မှာ နှစ်နိုင်ငံ ရက်ပိုင်းလောက် စစ်ရေးပဋိပက္ခ ဖြစ်ပွားခဲ့ပါတယ်။
Prince Holding Groupကို ထူထောင်သူ တရုတ်နွယ်ဖွား ချန်ကျိဟာ ကမ္ဘောဒီးယားမှာ ကျားဖြန့် လုပ်ငန်းဇုန်တွေ ထူထောင်ထားပြီး လိမ်လည်လှည့်စား လူမှောင်ခို ကူးထားတဲ့ နိုင်ငံခြားသား ဝန်ထမ်းတွေကို ငွေလိမ်တဲ့ အလုပ်တွေမှာ အဓမ္မ ခိုင်းစေနေတယ်လို့ အောက်တိုဘာလမှာ အမေရိကန် အာဏာပိုင်တွေက စွပ်စွဲ ပြောကြားခဲ့ပါတယ်။
သတင်းထောက်တွေနဲ့ တွေ့ဆုံချိန်မှာ အနုတင်က ထိုင်းရဲ့ စုံစမ်း စစ်ဆေးရေး အရာရှိတွေ ခြေရာခံ သိမ်းဆည်း ရမိခဲ့တဲ့ ဒေါ်လာ သန်း ၃၀၀ ဖိုး ပိုင်ဆိုင်မှုတွေဟာ ချန်၊ ကမ္ဘောဒီးယား အထက်လွှတ်တော် အမတ်တစ်ဦး၊ ထိုင်းနိုင်ငံသား နှစ်ဦးတို့နဲ့ ဆက်နွှယ် ပတ်သက်နေတယ်လို့ ပြောကြားခဲ့ပါတယ်။ တာဝန်ရှိသူတွေ အားလုံးဟာ တရားဥပဒေနဲ့အညီ စစ်ဆေး အရေးယူ ခံရဖို့လိုကြောင်းလည်း အနုတင်က ဆိုပါတယ်။
အဲဒီမတိုင်ခင် တစ်ရက်မှာ ထိုင်းရဲ့ အဂတိ တိုက်ဖျက်ရေးရုံးက မြေကွက်တွေ၊ ငွေသားတွေ၊ တန်ဖိုးကြီး အသုံးအဆောင်တွေ၊ လက်ဝတ်ရတနာတွေ အပါအဝင် ဒေါ်လာ ၁၂ သန်းနီးပါးလောက် တန်ဖိုးရှိတဲ့ ချန်ရဲ့ ပိုင်ဆိုင်မှုတွေကို လောလောလတ်လတ် သိမ်းဆည်း ရမိထားခဲ့ကြောင်း ထုတ်ပြန်ပါတယ်။ နောက်ပြီး ကမ္ဘောဒီးယား ဝန်ကြီးချုပ်ဟောင်း ဟွန်ဆန်းရဲ့ အမာခံ မဟာမိတ်ဖြစ်တဲ့ ကမ္ဘောဒီးယား အထက်လွှတ်တော်အမတ် ခုတ်အန်းနဲ့ ဆက်နွှယ်တဲ့ ပိုင်ဆိုင်မှု ဒေါ်လာ ၁၅ သန်းဖိုးလောက်ကိုလည်း သိမ်းဆည်း ရမိထားကြောင်း သိရပါတယ်။
ဒါတင်မကသေးဘဲ ကျားဖြန့်လုပ်ငန်းတွေနဲ့ ဆက်စပ်တဲ့ ထိုင်းနိုင်ငံသား နှစ်ဦးရဲ့ ပိုင်ဆိုင်မှု ဒေါ်လာ သန်း ၂၉၀ ဖိုးလောက်ကိုလည်း သိမ်းယူနိုင်ခဲ့ကြောင်း အနုတင်က ပြောပါတယ်။ အဲဒီ သိမ်းဆည်း ရမိမှုတွေဟာ ဘယ်ကာလ အပိုင်းအခြားမှာ လုပ်ဆောင်နိုင်ခဲ့တာလဲ ဆိုတာကိုတော့ သူက တိတိကျကျ မှတ်ချက် မပေးခဲ့ပါဘူး။
ဗြိတိန် အစိုးရကလည်း ချန်ရဲ့ ကွန်ရက်နဲ့ ဆက်နွှယ်တဲ့ လန်ဒန်က မြေရာပိုင်ဆိုင်မှုနဲ့ လုပ်ငန်းတွေ စုစုပေါင်း တန်ဖိုး ဒေါ်လာ သန်း ၁၃၀ ကျော်ဖိုးလောက်ကို ထိန်းသိမ်းထားပြီး ဖြစ်ပါတယ်။ ထိုင်ဝမ်၊ စင်ကာပူနဲ့ ဟောင်ကောင် အစိုးရတွေကလည်း ချန်နဲ့ ပတ်သက်တဲ့ ပိုင်ဆိုင်မှုတန်ဖိုး ဒေါ်လာ သန်း ၃၅၀ လောက်ကို ထိန်းချုပ်ထားပါတယ်။
အမေရိကန် တရားရေး ဝန်ကြီးဌာနက Prince Holding Groupကို အာရှရဲ့ အကြီးမားဆုံး နယ်စပ်ဖြတ်ကျော် ရာဇဝတ် ဂိုဏ်းတစ်ခုအဖြစ် သတ်မှတ်ထားပြီး ကုမ္ပဏီရဲ့ ကွန်ရက်နဲ့ ဆက်နွှယ်တဲ့ ဒစ်ဂျစ်တယ် ငွေကြေးယူနစ် bitcoin ဒေါ်လာ ၁၅ ဘီလီယံဖိုးလောက်ကို ထိန်းချုပ်ခဲ့ပါတယ်။ Prince Holding Groupကတော့ ချန်ဟာ ဘာအမှားအယွင်းမှ ကျူးလွန်မထားကြောင်း တုံ့ပြန် ဖြေရှင်းထားပါတယ်။
ကိုးကား: AFP
ဓာတ်ပုံ – Prince Holding Group’s website
𝗣𝗲𝗼𝗽𝗹𝗲’𝘀 𝗦𝗽𝗿𝗶𝗻𝗴