ကမ္ဘာ့နိုင်ငံများအနေဖြင့် အနိုင်ကျင့်ဗိုလ်ကျ စိုးမိုးမှုများကို ရှောင်ရှားရန် စစ်ကော်မရှင် ပြန်ကြားရေး ဝန်ကြီးပြော

ကမ္ဘာ့နိုင်ငံများအနေဖြင့် အနိုင်ကျင့်ဗိုလ်ကျ စိုးမိုးမှုများကို ရှောင်ရှားရန် စစ်ကော်မရှင် ပြန်ကြားရေး ဝန်ကြီးပြော
နိုင်မင်းလွင်/ဧရာဝတီတိုင်းမ်
နိုဝင်ဘာ ၁၈ ရက်

အိမ်နီးချင်းနှင့် ဒေသတွင်း နိုင်ငံများအပါအဝင် ကမ္ဘာ့နိုင်ငံများအနေဖြင့် ညီညွတ်မျှတမှုကို အခြေခံ၍ အနိုင်ကျင့်ဗိုလ်ကျ စိုးမိုးမှုအား ရှောင်ရှားရန်နှင့် မြန်မာ့အနာဂတ်ကို နိုင်ငံသားများကသာ ကိုယ်တိုင် ထုဆစ် ပုံဖော်ရမည်ဟု အာဏာသိမ်း စစ်ကော်မရှင်၏ ပြန်ကြားရေးဝန်ကြီးက ပြောကြားခဲ့ကြောင်း ၎င်းတို့၏ ဝါဒဖြန့် သတင်းစာများတွင် ဖော်ပြထားသည်။
စစ်ကော်မရှင်၏ ပြန်ကြားရေးဝန်ကြီး ဦးမောင်မောင်အုန်းသည် ယမန်နေ့နိုဝင်ဘာ ၁၇ ရက်က ရန်ကုန်မြို့တွင် ပြုလုပ်သည့် ကမ္ဘာလုံးဆိုင်ရာ စီမံခန့်ခွဲမှုအစီအမံ ဆွေးနွေးပွဲနှင့် ယခုနှစ်၊ စတုတ္ထ သုံးလပတ် တရုတ်-မြန်မာ မီဒီယာတွေ့ဆုံပွဲ၌ ထိုကဲ့သို့ ထည့်သွင်းပြောကြားခဲ့ကြောင်း သိရသည်။
ထို့အပြင် စစ်ပွဲများနှင့် ပဋိပက္ခများ လျော့ပါးရပ်စဲရေးအတွက် အင်အားကြီး နိုင်ငံများအနေဖြင့် အားနည်းသော နိုင်ငံများအပေါ် စာနာနားလည် ထောက်ထားကာ ထောက်ပံ့ကူညီ ရိုင်းပင်းမှုများဖြင့် အေးချမ်းသာယာ ငြိမ်းချမ်းသော ဒေသများအဖြစ် ကြိုးစားသွားကြရန် ၎င်းက ဆက်လက် ပြောဆိုခဲ့သည်။
လက်ရှိတွင် စစ်ခေါင်းဆောင်များအပါအဝင် စစ်ကော်မရှင်နှင့် ၎င်းတို့ လက်အောက်ခံ အဖွဲ့များ၊ ပတ်သက်ဆက်နွယ်သူ များသည် အကြမ်းဖက်မှု၊ နိုင်ငံတကာရာဇဝတ်မှု စသည်တို့ ကျူးလွန်နေသဖြင့် ကုလသမဂ္ဂ၊ အမေရိကန်အပါအဝင် ကမ္ဘာ့ နိုင်ငံများက ပိတ်ဆို့ဒဏ်ခတ်လျက်ရှိသည်။
မြန်မာနိုင်ငံတွင် စစ်အာဏာသိမ်းပြီးနောက် ပြုလုပ်သွားမည့် ၎င်းတို့၏ ရွေးကောက်ပွဲနှင့် ပတ်သက်၍လည်း လက်မခံကန့်ကွက် ဝေဖန်ပြောဆိုမှုများသည် နိုင်ငံ၌ ဒီမိုကရေစီ အညွန့်အဖူးများဖြင့် ဝေစည်လာစေမည်ကို နှောင့်ယှက်ဟန့်တားနေခြင်းဖြစ်ကြောင်း စစ်ကော်မရှင်ခန့် ပြန်ကြားရေး ဝန်ကြီးက ဆိုသည်။
ယင်းအပြင် တရုတ်၊ ရုရှား၊ အိန္ဒိယ၊ ဘီလာရုစ် စသည့် နိုင်ငံအချို့ကို ရည်ညွှန်း၍ ၎င်းတို့ ပြုလုပ်သွားမည့် ရွေးကောက်ပွဲများကို မိတ်ဆွေနိုင်ငံများက ထောက်ခံကူညီ အားပေးလျက်ရှိပြီး စောင့်ကြည့် လေ့လာသူများလည်း ဖိတ်ကြားထားသဖြင့် ပွင့်လင်းမြင်သာ လွတ်လပ်တရားမျှတမှုရှိကြောင်း ပြောကြားထားသည်။
အဆိုပါဆွေးနွေးပွဲသို့ တက်ရောက်လာသည့် မြန်မာနိုင်ငံဆိုင်ရာ တရုတ်သံအမတ်ကြီး မစ္စမာကျား ကလည်း တန်းတူညီမျှ စနစ်တကျရှိသော ဗဟုဝင်ရိုးကမ္ဘာအတွက် ထောက်ခံ၍ တစ်ဖက်သတ် ပိတ်ဆို့အရေးယူမှုများ၊ အခွန်မတရား ကောက်ခံမှု စသည်တို့ကို ဆန့်ကျင်သွားမည်ဖြစ်ကြောင်း ပြောကြားခဲ့သည်။
ဓာတ်ပုံ-MOI