ရွှေကုက္ကိုလ်တွင် တရုတ်သူဌေးများနှင့် ကျားဖြန့် ကုမ္ပဏီခေါင်းဆောင်များကို BGF က ညတွင်း ချင်း ကားများဖြင့် သယ်ထုတ်နေပြီး အောက် ခြေအလုပ်လုပ်သူများနှင့် တရုတ်များလည်း အစု လိုက်အပြုံလိုက် ထွက်ပြေး ၀ရုန်းသုန်းကားဖြစ်၊ BGF ခေါင်းဆောင် စောချစ်သူ လူမြင်ကွင်းမှ ပျောက်နေ

ရွှေကုက္ကိုလ်တွင် တရုတ်သူဌေးများနှင့် ကျားဖြန့် ကုမ္ပဏီခေါင်းဆောင်များကို BGF က ညတွင်း ချင်း ကားများဖြင့် သယ်ထုတ်နေပြီး အောက် ခြေအလုပ်လုပ်သူများနှင့် တရုတ်များလည်း အစု လိုက်အပြုံလိုက် ထွက်ပြေး ၀ရုန်းသုန်းကားဖြစ်၊ BGF ခေါင်းဆောင် စောချစ်သူ လူမြင်ကွင်းမှ ပျောက်နေ
ရန်ကုန်၊ နိုဝင်ဘာ ၁၈

ကရင်ပြည်နယ်၊ မြ၀တီမြို့နယ်၊ ရွှေကုက္ကိုလ်မြို့သစ်တွင် တရုတ်သူဌေးများနှင့် ကျားဖြန့် ကုမ္ပဏီခေါင်းဆောင်များကို BGF က ညတွင်းချင်း ကားများဖြင့် သယ်ထုတ်နေကြောင်း ရွှေကုက္ကိုလ်အခြေအနေကို စောင့်ကြည့်နေသော ကရင်စစ်ရေး သတင်းရင်းမြစ်က ပြောဆိုသည်။
ယမန်နေ့ အကြမ်းဖက်စစ်တပ် လက်အောက်ခံ BGF မှ နိုင်မောင်ဇော်က ရွှေကုက္ကိုလ်မြို့သစ်တွင် ကျားဖြန့်များကို အပြီးသတ်အပြတ် နှိမ်နင်းတော့မည်ဖြစ်ကြောင်း ထုတ်ပြန်ကြေညာပြီးနောက် နိုဝင်ဘာလ ၁၇ ရက်နေ့ ညတွင်းချင်း ရွှေကုက္ကိုလ်မြို့သစ်မှ တရုတ်များ၊ နိုင်ငံခြားသားများနှင့် ကျားဖြန့် အလုပ်သမားများ ရာထောင်ချီ မြို့မှ ထွက်ခွာရန် ကြိုးစားလာကြကြောင်း၊ ရွှေကုက္ကိုလ်မြို့သစ်အတွင်းတွင် ကားများ ပိတ်ပြီး မြို့တွင်းရှိ လူများအားလုံး နည်းလမ်းမျိုးစုံဖြင့် ထွက်ခွာနေကြခြင်းဖြစ်ကြောင်း၊ သို့ရာတွင် ကျားဖြန့် တရုတ်သူဌေးများနှင့် ကျားဖြန့်ကုမ္ပဏီ ခေါင်းဆောင်များကိုမူ BGF များက ကားဖြင့် ညတွင်းချင်း သယ်ထုတ်နေကြောင်း သိရှိရသည်။
“BGF နိုင်မော်ဇော်က ကျားဖြန့်တွေ နှိမ်နင်းမယ်ဆိုပြီး ထကြေညာတာ ထိုင်းသတင်းဌာနတွေမှာ တက်လာတာရော၊ မြန်မာသတင်းဌာနတွေမှာ တက်လာတာရောကြောင့် ညတွင်းချင်း တရုတ်တွေ၊ နိုင်ငံခြားသားတွေ ရွှေကုက္ကိုလ်ကနေ အထုပ်တွေ ဆွဲပြီး ထွက်ကုန်ကြပြီ။ KK Park လို ဖြစ်မယ်ဆိုပြီး အကုန်ထွက်ပြေးကြတာ။ အလုပ်တွေ ၃ ရက်ပိတ်တယ်ဆိုပြီး အောက်ခြေ ကျားဖြန့် အလုပ်သမားတွေကိုလည်း ကုမ္ပဏီတွေဘက်က ပြောတယ်။ ဒါပေမယ့် ကုမ္ပဏီ In-charge တွေ ၊ Team Leader တွေနဲ့ တရုတ်သူဌေးတွေက BGF ကားတွေနဲ့ အကုန်ထွက်ကုန်ကြပြီ ။ ညတွင်းချင်း ၀ရုန်းသုန်းကားတွေ ဖြစ်နေတာ။ ကားတွေပိတ်၊ လမ်းတွေပိတ်။ အကုန်ထွက်ပြေးကုန်ကြတာ” ဟု ကရင်စစ်ရေး သတင်းရင်းမြစ်က ပြောဆိုသည်။
BGF နိုင်မောင်ဇော်က ရွှေကုက္ကိုလ်တွင် ကျားဖြန့် လုပ်ကိုင်သူ ၁၀၀၀ နှင့် ၂၀၀၀ အကြားရှိပြီး ကျားဖြန့်များကို လုံး၀ မထားတော့ဘဲ အပြတ် အပြီး နှိမ်နင်းတော့မည်ဖြစ်ကြောင်း၊ ထိုသို့ နှိမ်နင်းရာတွင် စစ်တပ်နှင့်ပူးပေါင်း၍ နှိမ်နင်းမည်ဖြစ်ကြောင်း၊ အမေရိကန်နှင့် တရုတ်ဖိအားရှိလာ၍ မဟုတ်ဘဲ BGF က ကျားဖြန့် နှိမ်နင်းရန် ဆုံးဖြတ်သည့်အချိန်နှင့်တိုက်ဆိုင်နေခြင်းဖြစ်ကြောင်း ယမန်နေ့က ထုတ်ဖော်ပြောဆိုခဲ့သည်။
အကြမ်းဖက်စစ်တပ်ကလည်း ရွှေကုက္ကိုလ်အနီးဝန်းကျင်နှင့်နေရာတချို့တွင် နေရာစတင်ယူနေပြီး မြို့တွင်းနေရာတချို့တွင် စစ်တပ်က ဝင်ရောက်မှုများရှိနေကြောင်း၊ BGF နှင့် စစ်တပ်က ပူးတွဲ ဝင်ရောက်နေခြင်းဖြစ်ကြောင်း သိရှိရသည်။
သို့ရာတွင် ရွှေကုက္ကိုလ်မြို့သစ်ကို စတင်ထူထောင်ရာတွင် အဓိက ကျသူ BGF ခေါင်းဆောင် စောချစ်သူမှာမူ လူမြင်ကွင်းတွင် ပျောက်ကွယ်နေပြီး ရွှေကုက္ကိုလ်တွင် မတွေ့ရကြောင်း၊ ရွှေကုက္ကိုလ်အရေးကိစ္စကို BGF နိုင်မောင်ဇော်က ဦးစီး လုပ်ဆောင်သည့်သဘောမြင်ရကြောင်း အခြားကရင်စစ်ရေး သတင်းရင်းမြစ်တစ်ခုကလည်း ပြောဆိုသည်။
” စောချစ်သူက လူမြင်ကွင်းကို သိပ်မထွက်တော့ဘူး။ သူ့ဆရာ She Zhijiang ကို နိုဝင်ဘာလ ၁၂ ရက်နေ့ တရုတ်ကို လွှဲလိုက်ကတည်းက လူမြင်ကွင်းမှာ မမြင်ရတော့တာ။ အရင်ဆို သူ့ကားတန်းနဲ့ သွားလာနေတာ ရှိသေးတယ်။ အခု ပျောက်နေတယ်။ သူ့ရွာပြန်နေတာလား၊ တမင်လူမြင်ကွင်းမထွက်တာလားတော့ မပြောတတ်ဘူး” ဟု ကရင်စစ်ရေးသတင်းရင်းမြစ်က ရှင်းပြသည်။
ရွှေကုက္ကိုလ် ထူထောင်သူ She Zhijiang ကို ကျားဖြန့်ငွေလိမ်မှု များ အပါအဝင် နိုင်ငံတကာရာဇ ဝတ်မှုများဖြင့် ထိုင်းနိုင်ငံက တရုတ်နိုင်ငံသို့ နိုဝင်ဘာလ ၁၂ ရက်နေ့တွင် လွှဲပြောင်းလိုက်ပြီး အမေရိကန်ကလည်း ကျားဖြန့် များကို အကာအကွယ်ပေးနေသော DKBA တပ်ဖွဲ့ နှင့်
ခေါင်းဆောင် ၄ ဦးကို စီးပွားရေး ဒဏ်ခတ်ပိတ်ဆို့ကာ ကျားဖြန့်တိုက်ဖျက်ရေး အထူးတပ်ဖွဲ့ကိုလည်း ဖွဲ့စည်းခဲ့သည်။