မန္တလေးမြို့ကပျူစောထီးတွေ ရှေ့တန်းပြန်လာပြီး မြို့ထဲမှာသောင်းကျန်းနေ
နိုဝင်ဘာ-၁၇၊၂၀၂၅၊ရှိန်း/ People’s Spring
မန္တလေးမြို့မှာ ပြီးခဲ့တဲ့ရက်ပိုင်းအတွင်းက ရဲမွန် တောင်ရပ်ကွက်က ပျူစောထီးအဖွဲ့တွေ ရှေ့တန်းကပြန်လာပြီး မြို့တွင်းမှာ ပြည်သူတွေကို တင်းတင်းကြပ်ကြပ် စစ်ဆေးရိုက်နှက်တွေလုပ်နေတယ်လို့ မြို့ခံ တွေက ပြောပါတယ်။
မန္တလေးမြို့ရဲမွန်တောင်ရပ်ကွက်က ပျူစောထီး တွေ နိုဝင်ဘာ ၁၅ရက်က မတ္တရာမြို့နယ်၊ရှေ့တန်းက ပြန်ဝင်လာခဲ့တယ်လို့ သိရပါတယ်။
အဲဒီနောက် မနေ့က (နိုဝင်ဘာ ၁၆ရက်) မန္တလေးမြို့၊ချမ်းမြသာစည်မြို့နယ်အတွင်းမှာ ဆိုင်ကယ် စီးလာတဲ့လူငယ်နှစ်ဦးရဲ့ ဆိုင်ကယ်ကို ပျူစောထီးတွေရဲ့ကားနဲ့ တိုက်မှုဖြစ်ခဲ့ပြီး အတိုက်ခံရတဲ့လူငယ်နှစ်ဦးကို လမ်းလယ်မှာ ဒူးထောက်ခိုင်းပြီး ပါးရိုက် နေတာလို့ မျက်မြင်တွေ့သူတဦး ကပြောပါတယ်။
“အတိုက်ခံထားရတဲ့ ကလေးတွေ သနားပါတယ်။သွေးတွေနဲ့ကို ပါးရိုက်ခံ နေရတာ”လို့ မျက်မြင်တွေ့သူတဦးက ပြောပါတယ်။
အလားတူပဲ မန္တလေးမြို့တွင်းမှာ ညဘက် ဖုန်းစစ် ဆေးဖမ်းဆီးမှုတွေ ဆက်တိုက်ပြုလုပ်နေတယ်လို့ မြို့ခံတွေက ပြောပါတယ်။
မန္တလေးဆေးတက္ကသိုလ်ရဲ့ အနောက်ဘက် ၇၄လမ်းမှာဆိုရင် လမ်းကြားတွေအထိ ည၈နာရီ လောက်ကနေ ၁၂နာရီလောက်အထိ မှောင်ရိပ်ခို ဖမ်းဆီးတာ တွေပြုလုပ်လေ့ရှိတယ်လို့ မြို့ခံတွေက ပြောပါတယ်။
“ပျူတွေလာတာ။ကားတွေကို ဝေးဝေးမှာသွားရပ်ပြီး အမှောင်ထဲကနေ အရပ်ဝတ်နဲ့ နှစ်ယောက်၊သုံး ယောက် စောင့်ဖမ်းကြတာ။ဖုန်းတွေ စစ်ပြီး အရမ်းရစ်တယ်။တညတည အဖမ်းခံရတာ နည်းတာ မဟုတ်ဘူး”လို့ မြို့ခံတဦးက ပြောပါတယ်။
ဒီတနေရာထဲတင်ဖမ်းဆီး နေတာမဟုတ်ဘဲလမ်း၈၀ ပေါ်၊စက်မှု ၊မြို့ပတ်လမ်းတွေမှာပါ ညဘက်ဖမ်းဆီးတာတွေ လုပ်နေတယ်လို့ သိရပါတယ်။
မန္တလေးမြို့မှာ ပျူစောထီးတွေ အုပ်စုဖွဲ့ အနိုင်ကျင့်တာတွေ ဖြစ်နေပြီး သေနတ်၊ဓားအရှည်တွေကိုင်ကာ ညဘက်ဆို ကားတွေနဲ့လမ်းသွားလာသူ ပြည်တွေတွေကို ခြိမ်းခြောက်ရိုက် နှက်တာ တွေပြုလုပ်နေတယ်လို့ မြို့ခံတွေကပြောပါတယ်။
(ရဲမွန်တောင်ရပ်ကွက်က ပျူစောထီးအဖွဲ့တွေ ရှေ့တန်းကပြန်လာပြီးစားသောက်နေစဉ်နဲ့ ရှေ့တန်းမထွက်မီတွေ့ရစဉ်။ ဓာတ်ပုံ – CJ)