အမေရိကန် ၏ Burma Team စစ်ဆင်ရေး စပြီ
**************
Burma Team ဟု ဆိုကာ အသစ် ဖွဲ့စည်း လာ သောမြန်မာ ရှိ ငွေလိမ်ဂိုဏ်း တိုက်ဖျက်ရေး အဖွဲ့ Scam Center Strike Force (SCFF) သည် မြန်မာနိုင်ငံ အတွင်း ရှိ အဆိုပါ အဖွဲ့များ၏ လုပ်ငန်းများကို အခြား ဌာနများ နှင့် ပူးပေါင်း၍ စတင် အရေးယူ ဆောင်ရွက်နေပြီဟု အမေရိကန် တရားရေး ဝန်ကြီးဌာန မှ ထုတ်ဖေါ် ပြောဆိုလိုက်ပြီ ဖြစ်သည်။
မြန်မာ နိုင်ငံ အတွင်းရှိ ငွေလိမ်ဂိုဏ်းများကို တိုက်ဖျက်ရန် အက်ဖ်ဘီအိုင် အေးဂျင့်များ ထိုင်းနိုင်ငံ သို့ စတင် ရောက်ရှိလာနေပြီ ဖြစ်သည်ဟု ဝါရှင်တန်ရှိ ကိုလံဘီယာ ခရိုင် ရှေ့နေရုံးမှ ကြေညာချက် ထုတ်ပြန်သည်။
Burma Team ကို ဦးဆောင်မည့် အဆိုပါ ရှေ့နေရုံး၏ အကြီးအကဲ ဂျီးနင်း ပီရို (ပုံတွင်ရှူ) မှ ဦးဆောင်မည် ဖြစ်ပြီး တရားရေး ဝန်ကြီးဌာန ၏ ရာဇဝတ်မှု များဆိုင်ရာ လုပ်ငန်း ရုံးခွဲ၊ အက်ဖ်ဘီအိုင် နှင့် Secret Service မှ အေးဂျင့် များ ပါဝင်လာသည်။
အဆိုပါ တိုက်ခိုက်ရေးအဖွဲ့သည် ထိပ်တန်း လိမ်လည်မှုစင်တာများကို ပိတ်ဆို့အရေးယူခြင်း၊ သိမ်းဆည်းခြင်းနှင့် ပုဂ္ဂိုလ်များအား ရာဇဝတ်ကြောင်းအရ တရားစွဲဆိုခြင်းတို့ဖြင့် အမေရိကန် အခြေခံအဆောက်အအုံ များကို လိမ်လည်သူများ သုံးစွဲနေမှုအား ကာကွယ်ရန်၊ နှင့် အများပြည်သူများအား ပညာပေးခြင်းနှင့် နစ်နာကြေးပေးခြင်းတို့ဖြင့် ယင်းလိမ်လည်ခံရသည့် အမေရိကန် များကို ထောက်ပံ့ ကာကွယ်ရန်အတွက် “အစိုးရတွင်ရှိသည့် ရရှိနိုင်သော ကိရိယာအားလုံး” ကို အသုံးပြုသွားမည်ဖြစ်သည်ဟု ကြေညာချက်က ဆိုသည်။
ပီရို မှ Burma Team SCSF ဖွဲ့စည်းခဲ့မှု နှင့် စပ်
လျင်း၍ ပြောကြားရာတွင် “လိမ်လည်မှုစင်တာများဖြင့် သာမန် အမေရိကန်ပြည်သူများ မျိုးရိုးစင်ဆက် စုဆောင်းထားသော ကြွယ်ဝချမ်းသာမှုများ တရုတ် ရာဇဝတ်ဂိုဏ်းများ၏ အိတ်ကပ်များထဲသို့ လွှဲပြောင်းရောက်ရှိ နေသည်။ ကျွန်မတို့ ရုံး အနေဖြင့် နိုင်ငံခြားသား တရားခံများကို စွဲချက်တင်ရန်နှင့် ၎င်းတို့၏ ပိုင်ဆိုင်မှုများကို သိမ်းဆည်းရန် အခွင့်အာဏာရှိသည်” ဟု ဆိုသည်။
ယခုအခါ SCSF သည် အပြည့်အဝ လည်ပတ် လှုပ်ရှားလာနေပြီ ဖြစ်သည်ဟု လည်း ပြောသွားခဲ့သည်။
SCSF အဖွဲ့ဝင်များသည် မြန်မာ၊ လာအို နှင့် ကမ္ဘောဒီယား တွင် လှုပ်ရှားနေကြသော တရုတ် ရာဇဝတ်ဂိုဏ်း များ အပြင် အဓိက ပါဝင်နေသည့် ခေါင်းဆောင်များကို ဖေါ်ထုတ် ရှာဖွေသွားပြီး တရားစွဲဆိုနိုင်ရန် အဓိက ဦးစားပေး လုပ်ဆောင်နေကြပြီ ဖြစ်သည်။
Burma Team သည် မြဝတီရှိ DKBA ထိန်းချုပ်ထားရာ တိုက်ချန် ဌာန ၏ ဝက်ဆိုက် ကို ချုပ်ကိုင်နိုင်လိုက်ပြီဟု သိရသည်။ ထို့ပြင် နေရာ အတိအကျ ဖေါ်ပြထားခြင်း မရှိသည့် မြန်မာနိုင်ငံရှိ နောက်ထပ် လိမ်လည်မှုစင်တာတစ်ခု၏ ဂြိုဟ်တုချိတ်စက်များ (satellite terminals) ကို သိမ်းဆည်းရန်အတွက်လည်း ဖမ်းဝရမ်းများ တောင်းခံလျက်ရှိသည်ဟု ဆိုသည်။
ဘန်ကောက်တွင် ရောက်ရှိ နေသော အက်ဖ်ဘီအိုင် အေးဂျင့်များသည် ထိုင်း အထူးစစ်ဆင်ရေး တပ်ဖွဲ့ နှင့် အတူ အထိုင် ချပြီး BGF များ အကာအကွယ် ပေးထားသည့် KK Park ရှိ စခန်းများကို တိုက်ဖျက်သွားမည် ဖြစ်သည်။
ဖေဖေါ်ဝါရီလ အတွင်းက ထိုင်း အထူး စုံစမ်းရေး ဌာနမှ BGF ခေါင်းဆောင် စောချစ်သူအား ဖမ်းဝရမ်း ထုတ်ပေးရန် တရားရေးဌာန သို့ လျှောက်ထားခဲ့ပြီး ဖြစ်သည်။
အမေရိကန် မှ DKBA အား အရေးယူ ဒဏ်ခတ်ရန် ကြေညာပြီးလျင် ပြီးချင်း စစ်အုပ်စုမှ မြဝတီရှိ ၎င်းတို့ပိုင် ကာဆီနိုအား လက်နက်ကြီးများဖြင့် ပစ်ခတ်သဖြင့် တပ်ဖွဲ့ဝင် နှစ်ဦး သေဆုံးပြီး ရှစ်ဦး ဒဏ်ရာရရှိသွားသည် ဟု သိရသည်။
ဒဏ်ခတ်ခံရမည့် စာရင်းထဲ ပါဝင်နေသည့် DKBA ခေါင်းဆောင် လေးဦး ထဲမှ တဦး ဖြစ်သူ စောစိန်ဝင်းမှ ၎င်းတို့ အဖွဲ့မှ ခေါင်းဆောင် အချို့ အွန်လိုင် ငွေလိမ် ဂိုဏ်းများ ကို ဦးဆောင်လုပ်ကိုင်နေသည်ဟု ဝန်ခံလာခဲ့သည်။
ယခု အရေး တွင် အမေရိကန် တို့ အုံ နှင့် ကျင်း နှင့် ပါဝင် လာခြင်း ဖြစ်သည်။
ထိုင်း ရှိ ကမ္ဘာတဝှမ်း လိမ် လည်မှု တိုက်ဖျက်ရေး မဟာမိတ် များ အဖွဲ့၏ ထုတ်ပြန်ချက်အရ ထိုင်း နိုင်ငံသား ဆယ်ဦး လျင် ခြောက်ဦး နှုန်း အလိမ်ခံခဲ့ရပြီး ၂၀၂၄ တနှစ်တည်း တွင် စုစုပေါင်း ထိုင်းဘတ်ငွေ ၁၁၀ ဘီလီယံ အလိမ်ခံခဲ့ရသည်ဟု သိရသည်။
စောချစ်သူ ၏ ပါတနာ ဖြစ်သူ ရှီ ကျစ်ကျန်း အား ထိုင်းမှ တရုတ် သို့ လွှဲပြောင်းပေးလိုက်ပြီ ဖြစ်၍ KK Park နှင့် ပတ်သက်သည့် အရေးပါသော သတင်းအချက်အလက်များ တရုတ်တို့ ရရှိ တော့မည် ဖြစ်သည်။ အမေရိကန်သည်လည်း ဒေါ်လာ ၁၀ ဘီလီယံ ခန့် ဆုံးရှုံးထား၍ ၎င်းတို့ အစိုးရမှလည်း အရေးယူ ရန် လှုပ်ရှားမှ ဖြစ်ပေတော့မည်ဟု ယူဆလာခြင်းလည်း ဖြစ်သည်။
ရှီ ကျစ်ကျန်းသည် ဘီဂျင်းဆီသို့၊ စောချစ်သူသည် ဝါရှင်တန် ဆီသို့လော ဟူသော မေးခွန်းများ ထွက်ပေါ်လာနေပြီ ဖြစ်သည်။
ကိုးကား – Irrawaddy News / Asia News (Italy)
.ပြည်သူတို့၏ တရားသော စစ် မုချ အောင်ရမည်!!!