မိုးကုတ်မြို့ ကာကွယ်ရေးနှင့် တော်လှန်ရေးအတွက် တပ်ဖွဲ့နှင့် ကင်းကွာနေသည့် ရဲဘော်များ ပြန်လည်လက်တွဲရန် မိုးကုတ်ဗျူဟာ ဖိတ်ခေါ်
အောက်တိုဘာ ၃၁၊ ၂၀၂၅
မိုးကုတ်မြို့ကာကွယ်ရေးနဲ့ တော်လှန်ရေးတာဝန်တွေ ပြန်လည်ထမ်းဆောင်ဖို့အတွက် အကြောင်းအမျိုးမျိုးကြောင့် တပ်ဖွဲ့နဲ့ ကင်းကွာနေခဲ့တဲ့ ရဲဘော်တွေအားလုံးကို ပြန်လည်ဖိတ်ခေါ်ကြောင်း မိုးကုတ်ဗျူဟာက ထုတ်ပြန်လာပါတယ်။
ဒီကြေညာချက်ကို မနေ့က အောက်တိုဘာလ ၃၀ ရက်မှာ ထုတ်ပြန်ခဲ့တာဖြစ်ပြီး ထုတ်ပြန်တဲ့နေ့ကစလို့ တပတ် (၇ ရက်) အတွင်း ပြန်လည်တာဝန်ထမ်းမယ့်အကြောင်း သတင်းပို့ချိတ်ဆက်ဖို့ မိုးကုတ်ဗျူဟာက ဆိုထားပါတယ်။
မိုးကုတ်ဗျူဟာက “ရဲဘော်တို့၏ အတွေ့အကြုံ၊ ရဲဘော်တို့၏ စွမ်းရည်၊ ရဲဘော်တို့၏ တော်လှန်ရေးပေါ်ထားရှိသော စေတနာများကို မိုးကုတ်ဗျူဟာအနေဖြင့် အမြဲတန်ဖိုးရှိနေမည်ဖြစ်သည့်အတွက် တော်လှန်ရေး၏ ခွန်အားတရပ်အနေဖြင့် မိုးကုတ်ဗျူဟာနှင့်အတူ ပြန်လည် လက်တွဲတိုက်ပွဲဝင်ကြရန် နွေးထွေးစွာဖိတ်ခေါ်ပါသည်” လို့ ထုတ်ပြန်ထားပါတယ်။
မိုးကုတ်ဗျူဟာက MOD (ကာကွယ်ရေးဝန်ကြီးဌာန) ရဲ့ တရားဝင်တပ်ဖွဲ့တာကြောင့် သက်ဆိုင်ရာ စည်းမျဉ်းစည်းကမ်းတွေကို လိုက်နာဖို့ လိုအပ်ကြောင်းလည်း ထည့်သွင်းဆိုထားပါတယ်။
ခရီးလွန်နေတဲ့ ရဲဘော်တွေဟာ လူကိုယ်တိုင် လာရောက်ချိတ်ဆက်နိုင်မယ့် ရက်သတ်မှတ်ပြီး သတ်မှတ်ရက် (တစ်ပတ်) အတွင်း သတင်းပို့ ချိတ်ဆက်လာရင် စည်းမျဉ်းစည်းကမ်းတွေအတိုင်း စိစစ်ဆုံးဖြတ်ပြီး သက်ညှာထောက်ထားမှု မူဝါဒနဲ့အညီ ပြန်လည်ဝင်ရောက်လာမယ့် ရဲဘော်တွေရဲ့ နောင်တနဲ့ ဆန္ဒပြင်းပြမှုကို အလေးထား စဉ်းစားပေးမယ်လို့ သိရပါတယ်။
သတ်မှတ်ရက် ကျော်လွန်တဲ့အထိ ဆက်သွယ်ချိတ်ဆက်လာခြင်းမရှိတဲ့ ရဲဘော်တွေကိုတော့ တရားဝင် တပ်ပြေးအဖြစ် ကြေညာပြီး MOD ကနေ ထုတ်ပြန်ထားတဲ့ စစ်ဘက်ဆိုင်ရာ တပ်ပြေးမှု ဥပဒေအရ ပြစ်ဒဏ်ခံယူရမှာဖြစ်ကြောင်းကိုလည်း မိုးကုတ်ဗျူဟာကနေ အလေးအနက် အသိပေးထားပါတယ်။