မြ၀တီ KK Park ကို စစ်တပ်က ဝင်ရောက်စီးနင်းရန်ရှိသောကြောင့် တရုတ်၊ ထိုင်း အပါအဝင် နိုင်ငံခြားသား ၃၀၀ ကျော် နှင့် ပြည်တွင်းအလုပ်သမားများ ရာချီ ထွက်ပြေး၊ KK Park ကို စီမံခန့်ခွဲနေသော BGF က ဂိတ်ဖွင့်ပေးထား
ရန်ကုန်၊ အောက်တိုဘာ ၂၂
ကရင်ပြည်နယ်၊ မြဝတီမြို့ တောင်ဘက်ရှိ KK Park ကျားဖြန့်ရုံများကို အကြမ်း ဖက် စစ်တပ်က ဝင်ရောက်စီးနင်းရန် ရောက်ရှိနေပြီး နိုင်ငံခြားသား ၃၀၀ ကျော် ထွက်ပြေးတိမ်းရှောင်နေကြောင်း နယ်စပ်မှ ကရင်သတင်းရင်းမြစ်က ရန်ကုန်ခေတ်သစ် သတင်းဌာနထံသို့ ပြောဆိုသည်။
အောက်တိုဘာလ ၂၂ ရက်နေ့ နံနက် ၈ နာရီခန့်တွင် မြဝတီမြို့ တောင်ဘက်ရှိ KK Park ကျားဖြန့်ရုံများကို အကြမ်းဖက် စစ်တပ်က ဝင်ရောက်စီးနင်းရန် ရောက်ရှိနေခြင်းကြောင့် တရုတ်နှင့် ထိုင်းနိုင်ငံသားများ အပါအဝင် နိုင်ငံခြားသား ၃၀၀ ကျော် ထွက်ပြေးတိမ်းရှောင်နေကြောင်း သိရသည်။
လက်ရှိချိန်တွင် ထွက်ပြေး တိမ်းရှောင်နေရသော နိုင်ငံခြားသားများသည် ထိုင်းနိုင်ငံဘက်သို့ ကမ်းကူးရန် လုပ်ဆောင်နေပြီး KK Park ကို စီမံခန့်ခွဲနေသော BGF တပ်ဖွဲ့ကလည်း KK Park အတွင်းရှိ တံခါးများနှင့် ဂိတ်များကို ဖွင့်ပေးထားကြောင်း သိရှိရသည်။
“ဒီနေ့ နံနက် ၈ နာရီမှာ မြဝတီမြို့ တောင်ဘက်မှာရှိတဲ့ KK Park ကျားဖျန့်ရုံကို စစ်တပ်က ဝင်ရောက်စီးနင်းဖို့ ရောက်နေတယ်လို့ သိရတယ်။ တရုတ်နဲ့ ထိုင်းနိုင်ငံသားတွေ အပါအဝင် အခြားနိုင်ငံခြားသား ၃၀၀ ကျော် ထွက်ပြေးတိမ်းရှောင်နေတယ်။ KK Park ဝင်စီးတော့မယ်ဆိုပြီး BGF က တံခါး တွေဖွင့်ပေးထားတယ်လို့ သိရတယ်။ တရုတ်တွေ ထိုင်းတွေ ကမ်းကူဖို့ လှေဂိတ်တွေ ဘက် ဆင်းလာနေတယ်။ ထိုင်းဘက်ခြမ်းကိုတော့ မကူးရသေးဘူး။ စစ်တပ်နဲ့ BGF က KK park ဆိုဒ် နားမှာပဲ ရှိ နေတယ်” ဟု ကရင် သတင်ရင်းမြစ်က ပြောဆိုသည်။
KK Park ကို စွန့်ခွာလာသော နိုင်ငံခြားသားများအနက်မှ ထိုင်းနိုင်ငံသားများကို ထိုင်းအာဏာပိုင်များက ပြန်လည် ခေါ်ယူနေပြီး အခြားနိုင်ငံခြားသားများကို ကူးခွင့်မပေးကြောင်း၊ ပြည်တွင်းမှ မြန်မာများမှာမူ မြ၀တီမြို့ နှင့် ရွှေက္ကိုလ်ဘက်သို့ သွားရန် ကြိုးစားနေကြကြောင်း သိရှိရသည်။
“မြဝတီ မြို့ဘက်ကို သွား နေကြတယ်။ထိုင်းဘက်က ပေးမဝင်ဘူး။ ကမ်းကူးမခံဘူး။ အချို့ တရုတ် တွေ ကို BGF က ကားတွေနဲ့ ခေါ်ထုတ် နေတယ်။ ထိုင်း တွေ က တော့ ထိုင်းဘက်ကို ထိုင်းစစ်တပ် မမြင် တဲ့ ဂိတ် တွေ ဘက်ကနေ ပြန်ကူး ပေးနေ တယ်။ ထိုင်း ၁၅၀ ကျော် ထိုင်းဘက် ပြန် ရောက်သွားပြီ လို့ သိရတယ်” ဟု ကရင်သတင်းရင်းမြစ်က ပြောဆိုသည်။
အောက်တိုဘာလ ၁၉ ရက်နေ့ကလည်း အကြမ်းဖက် စစ်တပ်က မြ၀တီမြို့နယ်အတွင်းရှိ KK Parkကို စီးနင်းခဲ့ရာ ဆောက်လုပ်ပြီးအဆောက်အအုံ ၁ ထပ်တိုက် ၁၀ လုံး၊ ၂ ထပ်တိုက် အလုံး ၁၀၀၊ ၄ ထပ်တိုက်အလုံး၂၀၊ ၅ ထပ်တိုက် ၂ လုံး၊ ၁ ထပ်တိုက် ဈေးဆိုင်ခန်း၂၀ လုံး၊ ၂ ထပ်တိုက် ဈေးဆိုင်ခန်း ၃၀ လုံး၊ ၁ ထပ်တိုက်ဂိုထောင် ၁၅ လုံး၊ ၂ ထပ်တိုက်ဂိုထောင် ၂၀ လုံး၊ ၄ ထပ်တိုက် ဂိုထောင် ၁၀ လုံး၊ ဆောက်လုပ်ဆဲ ၂ ထပ်တိုက် ၂၁ လုံး၊ ၃ ထပ်တိုက် ၁၀ လုံး၊ ၄ ထပ်တိုက် ၅ လုံး၊ ၅ ထပ်တိုက် ၅ လုံးနှင့် ၁ ထပ်တိုက် ဆေးပေးခန်း ၂ ခန်းတို့ တွေ့ရှိခဲ့ကြောင်း ၊ Star Link စလောင်း အစုံ ၃၀ နှင့် ဆက်စပ်ပစ္စည်းများ သိမ်းဆည်းရမိခဲ့ပြီး အလုပ်သမား အမျိုးသား ၁၆၄၅ ဦး၊ အမျိုးသမီး ၄၅၅ ဦး၊ လုံခြုံရေးအမျိုးသား ၉၈ ဦး စုစုပေါင်း ၂၁၉၈ ဦး တွေ့ရှိခဲ့ကြောင်း ထုတ်ပြန်ထားသည်။