အကြမ်းဖက်စစ်တပ်က KK Park ကို ဝင်စီးပြီး ကျားဖြန့် နှိမ်နင်းရေး အမည်တပ်မှု ဖာခေါင်းက လုပ်သည့် ပြည့်တန်ဆာနှိမ်နင်းရေးဇာတ်လမ်းဟု KNU ဗဟိုအလုပ်အမှုဆောင် ပဒိုစောတောနီးပြော

အကြမ်းဖက်စစ်တပ်က KK Park ကို ဝင်စီးပြီး ကျားဖြန့် နှိမ်နင်းရေး အမည်တပ်မှု ဖာခေါင်းက လုပ်သည့် ပြည့်တန်ဆာနှိမ်နင်းရေးဇာတ်လမ်းဟု KNU ဗဟိုအလုပ်အမှုဆောင် ပဒိုစောတောနီးပြော
🟥 KK Park မှာ KNU ဦးစီးလုပ်ကိုင်နေဟု အကြမ်းဖက် ဇော်မင်းထွန်း ဆိုသော်လည်း အမှန်တကယ်ထိန်း ချုပ် လုပ်ကိုင်သူမှာ BGF ခေါင်းဆောင် စောချစ်သူဟု JFM နှင့် USIP တို့က အစီရင်ခံ ထုတ်ပြန်ထား
ရန်ကုန်၊ အောက်တိုဘာ ၂၁
အကြမ်းဖက်စစ်တပ်က KK Park ကို ဝင်စီးပြပြီး ကျားဖြန့် နှိမ်နင်းရေး အမည်တပ်မှုမှာ ဖာခေါင်းက လုပ်သည့် ပြည့်တန်ဆာနှိမ်နင်ရေးဇာတ်လမ်းသာဖြစ်ကြောင်း ကရင်အမျိုးသားအစည်းအရုံး- KNU ဗဟိုအလုပ်အမှုဆောင် ပဒိုစောတောနီးက ပြောဆိုသည်။
အကြမ်းဖက် စစ်တပ်က BGF ခေါင်းဆောင် ဗိုလ်မှူးကြီး စောချစ်သူ ဦးစီး ထိန်းချုပ် လုပ်ကိုင်နေသော KK Park ကို ဝင်ရောက်စီးနင်းပြီး လူပေါင်း ၂၂၀၀ နီးပါးကို ဖမ်းဆီးရရှိကြောင်း ၊ KK Parkကို စီးနင်းခဲ့ရာ ဆောက်လုပ်ပြီးအဆောက်အအုံ ၁ ထပ်တိုက် ၁၀ လုံး၊ ၂ ထပ်တိုက် အလုံး ၁၀၀၊ ၄ ထပ်တိုက်အလုံး၂၀၊ ၅ ထပ်တိုက် ၂ လုံး၊ ၁ ထပ်တိုက် ဈေးဆိုင်ခန်း၂၀ လုံး၊ ၂ ထပ်တိုက် ဈေးဆိုင်ခန်း ၃၀ လုံး၊ ၁ ထပ်တိုက်ဂိုထောင် ၁၅ လုံး၊ ၂ ထပ်တိုက်ဂိုထောင် ၂၀ လုံး၊ ၄ ထပ်တိုက် ဂိုထောင် ၁၀ လုံး၊ ဆောက်လုပ်ဆဲ ၂ ထပ်တိုက် ၂၁ လုံး၊ ၃ ထပ်တိုက် ၁၀ လုံး၊ ၄ ထပ်တိုက် ၅ လုံး၊ ၅ ထပ်တိုက် ၅ လုံးနှင့် ၁ ထပ်တိုက် ဆေးပေးခန်း ၂ ခန်းတို့ တွေ့ရှိခဲ့ကြောင်း ၊ Star Link စလောင်း အစုံ ၃၀ နှင့် ဆက်စပ်ပစ္စည်းများ သိမ်းဆည်းရမိခဲ့ပြီး အလုပ်သမား အမျိုးသား ၁၆၄၅ ဦး၊ အမျိုးသမီး ၄၅၅ ဦး၊ လုံခြုံရေးအမျိုးသား ၉၈ ဦး စုစုပေါင်း ၂၁၉၈ ဦး တွေ့ရှိခဲ့ကြောင်း စစ်တပ်က သတင်းထုတ်ပြန်ခဲ့သည်။
စစ်တပ်က KK Park ကို စီးနင်းပြပြီး ကျားဖြန့်နှိမ်နင်းရေးဟု ဆိုနေခြင်းမှာ တစ်ချိန်က ကွန်မြူနစ်ခေါင်းဆောင် သခင်စိုးပြောဆိုခဲ့ဖူးသည့် ဖာခေါင်းက လုပ်သည့် ပြည့်တန်ဆာနှိမ်နင်းရေးဆိုသော ဇတ်လမ်းကို သတိရမိကြောင်း KNU ပဒိုစောတောနီးက ရန်ကုန်ခေတ်သစ်သတင်းဌာနထံသို့ မှတ်ချက်ပြု ပြောဆိုသည်။
“သခင်စိုးပြော ပြောနေတဲ့ပြည့်တန်ဆာနှိမ်နှင်းရေးဇာတ်လမ်းကိုပဲပြန်အမှတ်ရနေပါတယ်ခင်ဗျ” ဟု ပဒိုစောတောနီးက ရှင်းပြသည်။
အကြမ်းဖက် စစ်တပ်၏ ပြောရေးဆိုခွင့်ရှိသူ အကြမ်းဖက် ဇော်မင်းထွန်းက မြ၀တီမြို့နယ်တောင်ဘက် မယ်ထော်သလေးရှိ KK Park မှာ KNU နယ် မြေအတွင်း ရှိပြီး KNU မှ အရာရှိတချို့က ကုမ္ပဏီထောင် လုပ်ကိုင်နေခြင်းဖြစ်ကြောင်း၊ KNU က တစ်နိုင်ငံလုံးကို ရောင်းစားသည့်အဖွဲ့ဖြစ်ကြောင်း ဝါဒဖြန့် သတင်းမီဒီယာများမှ ထုတ်ပြန်ပြောဆိုသည်။
“KNUက ဒီလုပ်ငန်းက ရရှိတဲ့ ငွေကြေးတွေနဲ့ နိုင်ငံတော်နဲ့ တိုင်းရင်းသားပြည်သူလူထုအပေါ်မှာ အကြမ်းဖက် သတ်ဖြတ်မှုတွေ ပြုလုပ်နေတာဖြစ်ပါတယ်။ အွန်လိုင်းလောင်းကစား လုပ်ငန်းတွေကို အကာအကွယ်ပေးထားပြီး တရုတ်နိုင်ငံ၊ ထိုင်းနိုင်ငံအပါအဝင် ဒေသတွင်းနိုင်ငံတကာ အပေါ်မှာ ရာဇဝတ်မှုတွေ ကျူးလွန်နိုင်အောင် လုပ်ဆောင်နေတဲ့ အဖွဲအစည်းလည်းဖြစ်ပါတယ်။ ပိုက်ဆံသာရမယ်ဆိုရင် တစ်နိုင်ငံလုံးကို လက်ညွှန်းထိုးရောင်းစားဖို ဝန်မလေးနဲ့ KNU အဖွဲကို နိုင်ငံတကာနဲ့ ပြည်သူတွေက ၀ိုင်းဝန်း ဆန့်ကျင်ဖိုလိုတယ်ပါတယ်” ဟု အကြမ်းဖက် ဇော်မင်းထွန်းက ဆိုသည်။
မြန်မာနိုင်ငံမှ ကျားဖြန့် လုပ်ငန်းများကို အဓိက စောင့်ကြည့်လေ့လာနေသည့် Justice For Myanmar နှင့် United States Institute of Peace (USIP) တို့က KK Park ကို စစ်တပ်၏ လက်အောက်ခံ ဗိုလ်မှူးကြီး စောချစ်သူ ဦးဆောင်သော ကရင်နယ်ခြားစောင့်တပ်ဖွဲ့ BGF က ဦးစီး လုပ်ဆောင်နေခြင်းဖြစ်ကြောင်း သက်သေအထောက်အထားဖြင့် အစီရင်ခံ သတင်းများ ထုတ်ပြန်ခဲ့ပြီးဖြစ်သည်။
ထို့ပြင် အမေရိကန်ပြည်ထောင်စုက စစ်တပ် လက်အောက်ခံ BGF ခေါင်း ဆောင် ဗိုလ်မှူးကြီး စောချစ်သူ အပါအဝင် ကျားဖြန့် လုပ်ငန်းများကို အကာ အကွယ်ပေး လုံခြုံရေးယူနေသော BGF ခေါင်းဆောင်များကို စီးပွားရေးပိတ်ဆို့မှုများ ဆက်တိုက်ချမှတ်ခဲ့သည်။
မြ၀တီမြို့နယ်အတွင်းရှိ KK Park ကျားဖြန့် ငွေလိမ်ခြံဝန်း၏ မြေနေရာကို တရုတ်ကျားဖြန့် ရာဇဝတ်ဂိုဏ်းများက မြန်မာစစ်အုပ်စု ကွပ်ကဲမှုအောက်ရှိ ကရင်နယ်ခြားစောင့်တပ်ဖွဲ့ထံမှ ငှားရမ်းခဲ့ခြင်းဖြစ်ကြောင်း၊ KK Park တည် ဆောက်ရေးလုပ်ငန်းများကို ၂၀၂၀ ခုနှစ်တွင် စတင်ခဲ့သော်လည်း ၂၀၂၁ အာဏာသိမ်းမှု ဖြစ်ပွားပြီးနောက်ပိုင်းမှသာ အလုံးအရင်းနှင့် တည်ဆောက်ခဲ့ခြင်းဖြစ်ပြီး၊ ၂၀၂၄ ခုနှစ်၊ ဖေဖော်ဝါရီလမှ ဒီဇင်ဘာလအထိ ၁၀လအတွင်း အဆောက် အအုံအသစ် အလုံး‌ပေါင်း ၂၀ ကျော် ဆောက်လုပ်ပြီးစီးခဲ့ကြောင်းကို ဂြိုလ်တုဓါတ်ပုံများမှတဆင့် မြင်တွေ့နိုင်သည်ဟု Justice For Myanmar က သတင်းထုတ်ပြန်ခဲ့သည်။
အွန်လိုင်းငွေလိမ်ဂိုဏ်း (သို့မဟုတ်) ကျားဖြန့် လုပ်ငန်းများသည် မြန်မာစစ် တပ်၏ ရာဇဝတ် ဆင့်ပွားလုပ်ငန်းကွန်ရက်ကြီး၏ ဗဟိုချက်တွင် တည်ရှိနေခြင်းဖြစ်ပြီး၊ စစ်တပ်သည် ကရင်နယ်ခြားစောင့်တပ်ဖွဲ့ (BGF) ကို လက်သပ်မွေးကာ အဆိုပါလုပ်ငန်းများကို ထိန်းကြောင်းစေခြင်း ဖြစ်သောကြောင့်၊ မြန်မာစစ်တပ်နှင့် ပြည်သူ့စစ်များထံ စီးဆင်းနေသော ဘဏ္ဍာငွေ၊ စစ်လက်နက်နှင့် လေယာဉ်ဆီရင်းမြစ်အားလုံး ဖြတ်တောက်ပြီး ၎င်းတို့ကျူးလွန်သော နိုင်ငံဖြတ်ကျော် ရာဇဝတ်လုပ်ငန်းများအတွက် ရာဇဝတ်ကြောင်းအရ အရေးယူတာဝန်ခံစေရေး သည်သာလျှင် အဆိုပါ ဆိုက်ဘာငွေလိမ် လုပ်ငန်းများကို အမှန်တကယ် တိုက်ဖျက်နိုင်မည်ဖြစ်ကြောင်း Justice for Myanmar ကထုတ်ပြန်ခဲ့သည်။
အမေရိကန်အခြေစိုက် USIP က ကရင်ပြည်နယ်တွင် ရှမ်းပြည်မြောက်ပိုင်းမှ ကျားဖြန့် ဂိုဏ်းများ အရှိန်အဟုန်ဖြင့် ရောက်ရှိနေပြီး အမေရိကန်ကိုပစ်မှတ်ထားလာကြောင်း၊ BGF မှ ဗိုလ်မှူးကြီး စောချစ်သူ၊ ဗိုလ်မှူးတင်ဝင်းနှင့် မုတ်သုန်တို့ ကျားဖြန့် လုပ်ငန်းများတွင် ပါဝင်ပတ်သက်နေကြောင်း၊ အမေရိကန်ဒေါ်လာ ၁၉၂ သန်း အမြတ်အစွန်း နှစ်စဉ်ရနေကြောင်း အစီရင်ခံ ဖော်ပြခဲ့သည်။
မြ၀တီမြို့နယ်တွင် အွန်လိုင်းကျားဖြန့်များ အခြေစိုက်သည့် ရွှေက္ကိုလ်မြို့သစ်စီမံကိန်း၊ ရထိုက်မြို့သစ်စီမံကိန်း၊ ဒေါင်မေဥယျာဉ်စီမံကိန်း (Dongmei Park)၊ Yulong Bay Park ၊ Apollo Park ၊ Jinxin Park ၊ KK Park ၊ မြ၀တီမြို့သစ် စသည့် စီမံကိန်းများစွာကို BGF က ဦးဆောင်၍ တရုတ်စီးပွား ရေးသမားများ၊ပြည်ပ ဒုစရိုက်ဂိုဏ်းများနှင့်အတူ တွဲဖက်အကောင်အထည်ဖော်နေခြင်းလည်းဖြစ်သည်။
မြန်မာစစ်တပ်နှင့် ပူးပေါင်းထားသော ကရင် BGF အဖွဲ့က ကရင်ပြည်နယ်ထဲမှ မြ၀တီမြို့ အပါအဝင် နယ်မြေအချို့ကို ထိန်းချုပ်ထားကြောင်း၊ BGF ပါဝင်ပတ်သက်နေသော တရားမဝင် ကာစီနိုလောင်းကစားရုံများ၊ အွန်လိုင်းလိမ်လည်မှု ရာဇဝတ်မှုကွန်ရက်များကြောင့် ကမ္ဘာတဝှမ်းမှ လူပေါင်းများစွာ လူကုန်ကူးခံရပြီး၊ ၄င်းတို့သည် ရာဇဝတ်မှုများ ကျူးလွန်ရန် အတင်းအကြပ် ခိုင်းစေခံရခြင်း၊ နှိပ်စက်ခံရခြင်း ရှိနေသည့်အပြင် အမြတ်ထုတ်ခံရသည့် အလုပ်သမားများနှင့် ဆိုက်ဘာလိမ်လည်မှုစခန်းများအား လည်ပတ်နေကြောင်း သိရှိရသည်။
ဗိုလ်မှူးကြီး စောချစ်သူ ဦးဆောင်သော BGF အတွက် အကြီးမားဆုံး အမြတ်ငွေမှာ တရုတ် ရာဇ၀တ်ဂိုဏ်းများ ကျောထောက်နောက်ခံပြုထားသော အွန်လိုင်းကာစီနိုနှင့် အွန်လိုင်းကျားဖြန့် လုပ်ငန်းများမှ ဖြစ်ကြောင်း၊ BGF ထိန်းချုပ်ထားသော အွန်လိုင်း ရာဇ၀တ်ဂိုဏ်းများက နှစ်စဉ် အမေရိကန်ဒေါ်လာ ၃ ဒသမ ၈ ဘီလီယံ ရရှိနေပြီး BGF အမေရိကန်ဒေါ်လာ သန်း ၇၀၀ ကျော် ရရှိနိုင်ကြောင်း US Institute for International Peace (USIP)ကသတင်းထုတ်ပြန်ခဲ့သည်။
ရှမ်းပြည်နယ်မြောက်ပိုင်းတွင် တရုတ်၏ နှိမ်နင်းမှုများကြောင့် အွန်လိုင်း ငွေလိမ်လည်ဂိုဏ်းများ(ကျားဖြန့်) သည် ကရင်ပြည်နယ်သို့ ရွှေ့ပြောင်းနေပြီး စစ်တပ်လက်အောက်ခံ နယ်ခြားစောင့်တပ် BGF ခေါင်းဆောင်ဗိုလ်မှူးကြီးစောချစ်သူ၊ မုတ်သုံ၊ တင်ဝင်း၊ စိုင်းကျော်လှ၊ ရော်ဂျာခင်တို့က အဓိကပါဝင်ပတ် သက်နေသူများအဖြစ် အမေရိကန် United States Institute of Peace (USIP) က အစီရင်ခံ ဖော်ပြခဲ့သည်။
KNA အသွင်ပြောင်း BGF၏ အဓိကခေါင်းဆောင် ပုဂ္ဂိုလ် သုံးဦးဖြစ်သည့် ဗိုလ်မှူးကြီး စောချစ်သူ၊ ဗိုလ်မှူး မုတ်သုန်နှင့် ဗိုလ်မှူးတင်ဝင်းတို့က တရုတ် အွန်လိုင်းငွေလိမ်ဂိုဏ်းများကို လက်ခံရာတွင် အဓိကပါဝင်သူများဖြစ်ကြောင်း၊ ဗိုလ်မှူးတင်ဝင်းက တရုတ်ရာဇဝတ်ဂိုဏ်းများအတွက် ထိုင်းနိုင်ငံမှ လျှပ်စစ်မီးနှင့် အင်တာနက် လိုင်းရရှိစေရေး ဆောင်ရွက်ပေးကြောင်း၊ စောချစ်သူနှင့်အတူ ဗိုလ်မှူး တင်ဝင်းက တရုတ်ငွေလိမ်ဂိုဏ်းများမှ အကျိုးအမြတ်များနှင့် ထောက်ပို့ မှုများကို စုစည်းရယူကြောင်း သိရှိရသည်။
ကရင်ပြည်နယ်ရှိ အွန်လိုင်းငွေလိမ်လည်ဂိုဏ် အများစုသည် စောချစ်သူ၏ နယ်ခြားစောင့်တပ်ဖွဲ့ ထိန်းချုပ်နယ်မြေများတွင် လည်ပတ်နေပြီး ယခုအခါ BGF ကို KNA အဖြစ် နာမည်ပြောင်းထားကြောင်း၊ တပ်ဖွဲ့ဝင်အင်အား ၈,၀၀၀ ကျော်ဖြင့် အင်အားကောင်းသောBGF/KNA ကို KNU နှင့် စစ်တပ်ကပါ တိုက်ရိုက် ပဋိပက္ခဖြစ်ပွားရန် ဆန္ဒမရှိကြောင်း USIP က ဆိုသည်။