မြန်မာအပါအဝင် နိုင်ငံ ၆ နိုင်ငံကို အမေရိကန်နိုင်ငံသားတွေအနေနဲ့ ခရီးသွားလာခြင်း လုံးဝမပြုကြဖို့ အမေရိကန်အစိုးရက စက်တင်ဘာ ၁၀ ရက်စွဲနဲ့ သတိပေးချက် ထုတ်ပြန်လိုက်ပါတယ်။
အဆိုပါ နိုင်ငံတွေထဲမှာတော့ မြန်မာနိုင်ငံနဲ့အတူ အာဖဂန်နစ္စတန်၊ မြောက်ကိုရီးယား၊ ဗင်နီဇွဲလား၊ အီရန်နဲ့ ရုရှားနိုင်ငံတွေ ပါဝင်နေပြီး ခုလိုထုတ်ပြန်တာဟာ အမေရိကန်နိုင်ငံသားတွေအနေနဲ့ အဆိုပါနိုင်ငံတွေမှာ မှားယွင်းထိန်းသိမ်းခံရနိုင်ခြေနဲ့ လုံခြုံရေးခြိမ်းခြောက်မှု အန္တရာယ်တွေကြောင့် ဖြစ်တယ်လို့ ဆိုပါတယ်။
ခုလတ်တလော ထုတ်ပြန်ချက်မှာတော့ အဆိုပါ နိုင်ငံ ၆ ခုကို အန္တရာယ်ရှိ အမြင့်ဆုံး အဆင့် ၄ သတ်မှတ်ထားသလို ဒါဟာ နိုင်ငံရပ်ခြားက အမေရိကန်နိုင်ငံသားတွေအတွက် ကာကွယ်မှုအားကောင်းစေဖို့ ရည်ရွယ်ကာ သမ္မတ ထရမ့်ပ်ရဲ့ လက်မှတ်ရေးထိုးထားတဲ့ အမိန့်အောက်မှာ ထွက်ပေါ်လာခဲ့တာလို့ ဆိုပါတယ်။
အကြောင်းခြင်းရာ လုပ်ငန်းစဉ်တစုံတရာမရှိဘဲ အမေရိကန်နိုင်ငံသားတွေ ဖမ်းဆီးထိန်းသိမ်းခံရတဲ့ ဖြစ်စဉ်တွေ အရှိန်အဟုန်နဲ့ ပေါ်ပေါက်လာတာတွေအတွက် သတိထားဖို့ တိုက်တွန်းတာလို့ ဆိုပါတယ်။
ပြီးခဲ့တဲ့ ၂၀၂၁ ခုနှစ်ကတည်းက ရွေးကောက်ခံ အရပ်သားအစိုးရထံကနေ အာဏာသိမ်းပြီး စစ်အာဏာရှင်စနစ်နဲ့ တိုင်းပြည်ကို အုပ်ချုပ်နေတဲ့ မြန်မာနိုင်ငံကို သွားရောက်ရင် ကြုံတွေ့နိုင်တဲ့ အန္တရာယ်တွေထဲမှာတော့ ဒေသန္တရဥပဒေတွေကို နိုင်ထက်စီးနင်းပြုတာ၊ ပြည်တွင်းမငြိမ်သက်မှု အလားအလာတွေ အပါအဝင် လက်နက်ကိုင်ပဋိပက္ခတွေလည်း ထည့်သွင်းဖော်ပြထားခဲ့တာပါ။
ဒါ့အပြင် အန္တရာယ်ရှိ ခရီးသွားလာမှုထိပ်ဆုံးမှာ ရှိနေတဲ့ အာဖဂန်နစ္စတန်နိုင်ငံမှာတော့ အမေရိကန် နိုင်ငံသားတွေအနေနဲ့ ပြန်ပေးဆွဲခံရမယ့်အန္တရာယ် ထပ်လောင်းရှိနေတဲ့အကြောင်း သတိပေးထားသလို အကြမ်းဖက်အဖွဲ့ အများအပြား လှုပ်ရှားနေပြီး နိုင်ငံသားတွေအနေနဲ့ ပစ်မှတ်တွေ ဖြစ်လာနိုင်ကြောင်း အမေရိကန်အစိုးရက သတိပေးထားပါတယ်။