ဖိလစ်ပိုင်တွင် ကျင်းပနေသော အာဆီယံအစည်းအဝေးတွင် မြန်မာ့အရေးနှင့်ပတ်သက်၍ အာဆီယံအဖွဲ့အတွင်း ရပ်တည်ချက် နှစ်မျိုးကွဲပြားနေ၊ စင်ကာပူ၊ မလေးရှား၊ အင်ဒိုနီးရှားနှင့် တီမောလက်စတေတို့က အာဆီယံဘုံသဘောတူညီချက် ၅ ချက်ကို ကိုင်စွဲထားပြီး ထိုင်း၊ လာအို၊ ဗီယက်နမ်နှင့်ကမ္ဘောဒီးယားတို့က မြန်မာကို အာဆီယံထဲသို့ ပြန်ခေါ်ရန် လိုလားနေ

ဖိလစ်ပိုင်တွင် ကျင်းပနေသော အာဆီယံအစည်းအဝေးတွင် မြန်မာ့အရေးနှင့်ပတ်သက်၍ အာဆီယံအဖွဲ့အတွင်း ရပ်တည်ချက် နှစ်မျိုးကွဲပြားနေ၊ စင်ကာပူ၊ မလေးရှား၊ အင်ဒိုနီးရှားနှင့် တီမောလက်စတေတို့က အာဆီယံဘုံသဘောတူညီချက် ၅ ချက်ကို ကိုင်စွဲထားပြီး ထိုင်း၊ လာအို၊ ဗီယက်နမ်နှင့်ကမ္ဘောဒီးယားတို့က မြန်မာကို အာဆီယံထဲသို့ ပြန်ခေါ်ရန် လိုလားနေ
ရန်ကုန်၊ မေ ၈

ဖိလစ်ပိုင်နိုင်ငံတွင် ကျင်းပနေသော အာဆီယံအစည်းအဝေးတွင် မြန်မာ့အရေးနှင့်ပတ်သက်၍ အာဆီယံအဖွဲ့အတွင်း ရပ်တည်ချက် နှစ်မျိုးကွဲပြားနေကြောင်း စင်ကာပူ The Straits Times က သတင်းဖော်ပြသည်။
မေလ ၆ ရက်နေ့မှ မေလ ၉ ရက်နေ့ အထိ ကျင်းပလျက်ရှိသည့် အာဆီယံ ထိပ်သီးအစည်းအဝေးနှင့် ဆက်စပ် အစည်းအဝေးများတွင် မြန်မာ့အရေးက အဓိက အကြောင်းအရာ အဖြစ် ပါဝင်နေပြီး မပြေလည်သေးသည့် အကျပ်အတည်းနှင့် ရှေ့မတိုးသာသည့် အခြေအနေ ရင်ဆိုင်နေရသည်ဟု သိရှိရသည်။
ဖိလစ်ပိုင်နိုင်ငံ၊ စီဗူး (Cebu) မြို့တွင် ကျင်းပလျက်ရှိသော ၂၀၂၆ ခုနှစ် အာဆီယံထိပ်သီးအစည်းအဝေးတွင် ကမ္ဘာလုံးဆိုင်ရာ စွမ်းအင်အကျပ်အတည်းနှင့် အရှေ့အလယ်ပိုင်းပဋိပက္ခများက အဓိကနေရာယူထားသော်လည်း၊ အာဆီယံအဖွဲ့ဝင်နိုင်ငံများအကြား အငြင်းပွားဖွယ်ရာ အဓိကကိစ္စရပ်မှာ မြန်မာ့အရေးပင် ဖြစ်နေဆဲ ဖြစ်သည်။
အာဆီယံအနေဖြင့် မြန်မာနိုင်ငံကို အဖွဲ့၏ အဆင့်မြင့်အစည်းအဝေးများသို့ ပြန်လည်ဖိတ်ခေါ်ရန် သင့်၊ မသင့်ဆိုသည့် မေးခွန်းမှာ အဖွဲ့အတွင်း သဘောထားကွဲလွဲမှုများကို ဖြစ်ပေါ်စေလျက်ရှိသည်။
လက်ရှိတွင် အာဆီယံအဖွဲ့ဝင်နိုင်ငံများအကြား မြန်မာ့အရေးနှင့် ပတ်သက်၍ ရပ်တည်ချက်နှစ်မျိုး ကွဲပြားနေသည်ကို တွေ့ရသည်။ စင်ကာပူ၊ မလေးရှား၊ အင်ဒိုနီးရှားနှင့် တီမောလက်စတေနိုင်ငံများက မြန်မာနိုင်ငံတွင် စစ်မှန်သော တိုးတက်မှုများ မတွေ့ရသေးသရွေ့ “ဘုံသဘောတူညီချက် ၅ ချက်” အတိုင်း ပြတ်ပြတ်သားသား ဆက်လက်ရပ်တည်ရန် လိုလားကြသည်။
ခြားတစ်ဖက်တွင်မူ ထိုင်းနိုင်ငံကဲ့သို့ နယ်စပ်ချင်း ထိစပ်နေသည့် နိုင်ငံများက လက်တွေ့ကျသော အကျိုးစီးပွားနှင့် နယ်စပ်လုံခြုံရေးအတွက် မြန်မာနှင့် ပြန်လည်ထိတွေ့ဆက်ဆံရန် ပိုမိုတွန်းအားပေးလျက်ရှိသည်။ ကမ္ဘောဒီးယား၊ လာအိုနှင့် ဗီယက်နမ်တို့ကလည်း ယင်းပျော့ပြောင်းသည့် လမ်းကြောင်းကို ထောက်ခံသည့် လက္ခဏာများ ပြသနေကြသည်။
မကြာသေးမီ မင်းအောင်လှိုင်က သမ္မတအဖြစ် တာဝန်ယူပြီး ဒေါ်အောင်ဆန်းစုကြည်ကို နေအိမ်အကျယ်ချုပ်သို့ ပြောင်းရွှေ့လိုက်ခြင်းတို့မှာ အာဆီယံအဖွဲ့ဝင်နိုင်ငံအချို့၏ သဘောထားကို ပျော့ပျောင်းလာစေရန် စစ်တပ်က နည်းဗျူဟာမြောက် လုပ်ဆောင်လိုက်ခြင်းဖြစ်နိုင်ကြောင်း လေ့လာသူများက သုံးသပ်ကြသည်။
မြန်မာ့အရေး တက်ကြွလှုပ်ရှားသူ မခင်ဥမ္မာကမူ အာဆီယံအနေဖြင့် စစ်အစိုးရကို အသိအမှတ်ပြုခြင်းမပြုရန်နှင့် ပြည်သူများထံ လူသားချင်းစာနာမှုအကူအညီများ တကယ်တမ်းရောက်ရှိရေးကိုသာ အလေးထားဆောင်ရွက်ရန် တိုက်တွန်းထားသည်။
အာဆီယံအနေဖြင့် မြန်မာ့အရေးကို “ခေတ္တဖြေရှင်းချက် (Quick-fix)” ဖြင့် အဆုံးသတ်လိုက်မည်ဆိုပါက စစ်အစိုးရ၏ ထောင်ချောက်အတွင်း ကျရောက်သွားနိုင်ကြောင်း သူမက သတိပေးခဲ့သည်။
အကယ်၍ ယခုနှစ် ဖိလစ်ပိုင် အလှည့်ကျဥက္ကဋ္ဌတာဝန်ယူသည့်ကာလအတွင်း ထိရောက်သော ဆုံးဖြတ်ချက်တစ်စုံတစ်ရာ မချမှတ်နိုင်ပါက၊ မြန်မာ့အရေးသည် ၂၀၂၇ ခုနှစ်တွင် ဥက္ကဋ္ဌတာဝန်ယူမည့် စင်ကာပူနိုင်ငံထံသို့ ဆက်လက်ပါရှိသွားမည် ဖြစ်သည်။
လက်ရှိတွင် အာဆီယံအနေဖြင့် မြန်မာကို အပြစ်ပေးအရေးယူရန်ထက် လက်ရှိအခြေအနေ ကိုသာ ထိန်းသိမ်းထားရန် ပိုမိုဖြစ်နိုင်ခြေရှိနေသည်ဟု သိရှိရသည်။
သို့သော်လည်း မြန်မာ့အရေးကို အချိန်ဆွဲထားခြင်းသည် အာဆီယံ၏ စည်းလုံးမှုနှင့် ဂုဏ်သိက္ခာကို ထိခိုက်စေနိုင်ပြီး၊ ဒေသတွင်း၌ အွန်လိုင်းငွေလိမ်လုပ်ငန်းကဲ့သို့သော မှုခင်းပြဿနာများ ပိုမိုကြီးထွားလာမှုကိုလည်း အဖြေရှာရန် ခက်ခဲစေမည်ဖြစ်ကြောင်း သတင်းက သုံးသပ်ဖော်ပြထားသည်။