ဗိုလ်ချုပ်ဇော်မင်းထွန်း ရာထူးမှ ဖယ်ရှားခံရ
ဧရာဝတီ၊ မတ် ၂၇၊ ၂၀၂၆
စစ်ကော်မရှင်၏ ပြောရေးဆိုခွင့်ရှိသူလည်းဖြစ်၊ ပြည်သူ့ဆက်ဆံရေးနှင့် စိတ်ဓာတ်စစ်ဆင်ရေးညွှန်ကြားရေးမှူး ဗိုလ်ချုပ် ဇော်မင်းထွန်း နေရာတွင် ဗိုလ်မှူးချုပ် ရဲရင့်အောင်ဖြင့် အစားထိုးခန့်အပ်လိုက်ကြောင်း သိရသည်။
စာမူပြိုင်ပွဲကျင်းပရေးကော်မတီဥက္ကဋ္ဌ ပြည်သူ့ဆက်ဆံရေးနှင့် စိတ်ဓာတ်စစ်ဆင်ရေး ညွှန်ကြားရေးမှူးရုံး ညွှန်ကြားရေးမှူး ဗိုလ်မှူးချုပ် ရဲရင့်အောင်က ၈၁ နှစ်မြောက် တပ်မတော်နေ့ ဂုဏ်ပြုစစ်ချီသီချင်း၊ စစ်သည်တေးသီချင်း၊ ကဗျာနှင့်ဝတ္ထုစာမူ ပြိုင်ပွဲ၌ ဆုရရှိသူများကို ဂုဏ်ပြုဆုနှင့် မှတ်တမ်းလွှာများ ပေးအပ်ချီးမြှင့်ခဲ့ကြောင်း စစ်ကော်မရှင်သတင်းများက ဖော်ပြ ထားသည်။
ပြန်ကြားရေးဝန်ကြီးဌာန ဒုဝန်ကြီး၊ စစ်တပ်၏ ပြည်သူ့ဆက်ဆံရေးနှင့် စိတ်ဓာတ်စစ်ဆင်ရေး ညွှန်ကြားရေးမှူး၊ အမျိုးသား ကာကွယ်ရေးနှင့် လုံခြုံရေးကောင်စီ (NDSC)၏ ပြန်ကြားရေးအဖွဲ့ခေါင်းဆောင်အဖြစ် တာဝန်ယူထားသည့် ဗိုလ်ချုပ်ဇော် မင်းထွန်းသည် မကြာသေးမီရက်ပိုင်းက ထုတ်ပြန်ခဲ့သော စစ်ခေါင်းဆောင် ခွဲစိတ်ကုသမှုထုတ်ပြန်ချက်နှင့် ပတ်သက်ပြီး ရာထူးမှဖယ်ရှားခံရသည်ဟု သတင်းများထွက်ပေါ်နေခြင်း ဖြစ်သည်။
တဖက်တွင်လည်း ဧပြီလဆန်းတွင် ဖွဲ့စည်းမည့် အမည်ခံအစိုးရသစ်အဖွဲ့၌ ဗိုလ်ချုပ်ဇော်မင်းထွန်းအား ပြန်ကြားရေးဝန်ကြီးအဖြစ် ခန့်အပ်ရန် လျာထားသည်ဟူသော ပြောဆိုမှုများလည်း ရှိနေသည်။
စစ်ကော်မရှင် ပြန်ကြားရေးဝန်ကြီးဌာနက တရားဝင် ထုတ်ပြန်ထားသည့် ဒုဝန်ကြီးစာရင်းနှင့် ကာ/လုံသတင်းထုတ်ပြန်ရေး အဖွဲ့ ခေါင်းဆောင်နေရာတွင်မူ ဗိုလ်ချုပ်ဇော်မင်းထွန်းကို ယခုသတင်းရေးသားချိန်အထိ ဖော်ပြထားဆဲ ဖြစ်သည်။
ဓာတ်ပုံ – AFP