အရှေ့အလယ်ပိုင်း ပဋိပက္ခကြောင့် ပြည်တွင်းစက်သုံးဆီအရောင်းဆိုင်တချို့တွင် ဆီပြတ်လပ်ဟုဆိုကာ ဆီမရောင်းတော့၊ ရွှေစျေးနှုန်းမှာလည်း အခေါက်ရွှေ ၁ ကျပ်သား ၁၁၃ သိန်းဖြင့် စံချိန်တင် စျေးတက်ပြီး စျေးကွက်ရပ်ဆိုင်းနေ

အရှေ့အလယ်ပိုင်း ပဋိပက္ခကြောင့် ပြည်တွင်းစက်သုံးဆီအရောင်းဆိုင်တချို့တွင် ဆီပြတ်လပ်ဟုဆိုကာ ဆီမရောင်းတော့၊ ရွှေစျေးနှုန်းမှာလည်း အခေါက်ရွှေ ၁ ကျပ်သား ၁၁၃ သိန်းဖြင့် စံချိန်တင် စျေးတက်ပြီး စျေးကွက်ရပ်ဆိုင်းနေ
ရန်ကုန်၊ မတ် ၂

အရှေ့အလယ်ပိုင်းဒေသတွင် အမေရိကန်နှင့် အီရန်တို့၏ စစ်ပွဲများကြောင့် မြန်မာနိုင်ငံ၏ ပြည်တွင်းစျေးကွက်သို့ပါ ရိုက်ခတ်မှုများရှိလာနေပြီး စက်သုံးဆီ အရောင်းဆိုင်တချို့တွင် ဆီပြတ်လပ်သည်ဟုဆိုကာ ဆီမရောင်းချမှုများ ကြုံတွေ့နေရကြောင်း ရန်ကုန်နှင့်မန္တလေးမှ ပြည်သူတချို့က ရန်ကုန်ခေတ်သစ်သတင်းဌာနထံသို့ ပြောဆိုသည်။
ဖေဖော်ဝါရီလ ၂၈ ရက်နေ့မှစတင်ပြီး စတင်ခဲ့သော အီရန် ပဋိပက္ခကြောင့် ကမ္ဘာ့ရွှေစျေးနှင့် ရေနံစျေးနှုန်းများ မြင့်တက်လာသည့်နည်းတူ မြန်မာနိုင်ငံအတွင်းလည်း ရိုက်ခတ်မှုများရှိလာကြောင်း၊ လတ် တလော စစ်တပ်၏ ထိန်းချုပ်မှုများကြောင့် ပြည်တွင်း စက်သုံးဆီ စျေးနှုန်းမတက်သော်လည်း ရေရှည်တွင် ကမ္ဘာ့ရေနံစိမ်းစျေးနှုန်းများမြင့်တက်ခြင်း၊ ရေနံစိမ်းထုတ်လုပ် သယ်ယူမှုများ နှောင့်နှေးခြင်းတို့ကြောင့် စျေးနှုန်း မြင့်တက်လာမည်မှာ သေချာကြောင်း၊ ထို့ကြောင့် ရန်ကုန်နှင့်မန္တလေးရှိ စက်သုံးဆီ အရောင်းဆိုင်များတွင် စက်သုံးဆီကို ထိန်း၍ ရောင်းချလာကြောင်း သိရှိရသည်။
“မနေ့က ညပိုင်း ရန်ကုန်မှာ စက်သုံးဆီဆိုင်တွေ စောစောပိတ်သွားတယ်။ အရင် အတော်နောက်ကျမှ ပိတ်တဲ့ဆိုင်တွေပါ စောစောပိတ်သွားတာ။ မနက်စောစော မနက် ၅ နာရီလောက် ဆီသွားထည့်တော့ ဆီမရသေးဘူးဆိုပြီး ပြန်လွှတ်တယ်။ မနက် ၆ နာရီလောက်မှ ပြန်လာဆိုပြီးသွားတော့ ကားတန်းကြီး ဖြစ်နေတယ်” ဟု တောင်ဥက္ကလာပမြို့နယ်တွင် ဆီတန်းစီခဲ့ရသော ယာဉ်ပိုင်ရှင်တစ်ဦးက ပြောဆိုသည်။
လတ်တလော ရန်ကုန်တွင် ယခင်ကဲ့သို့ ဆီပြတ်လပ်မှု ဆိုးဆိုးရွားရွား မဖြစ်သေးသော်လည်း စိုးရိမ်မှုများကြောင့် ဆီဝယ်ယူသော ကားများ ယခင်ထက်ပိုမိုများပြားလာကြောင်း ယာဉ်ပိုင်ရှင်တချို့က ဆိသည်။
မန္တလေးမြို့တွင်လည်း စက်သုံးဆီအရောင်းဆိုင်များတွင် ယခင်ထက် ပိုမို၍ ဆီဝယ်ယူသည့်ကားနှင့်ဆိုင်ကယ်များ များပြားလာနေပြီး ဆီဆိုင်တချို့က ဆီကုန်သွားပြီဟုဆိုကာ ပြန်လွှတ်မှုများရှိကြောင်း၊ သို့ရာတွင် စက်သုံးဆီများ ဝယ်ယူ၍ ရနေဆဲဖြစ်ပြီး အခြေအနေ မဆိုးသေးကြောင်း မန္တလေးမြို့ခံတစ်ချို့ကဆိုသည်။
သို့ရာတွင် နယ်မြို့များဖြစ်သည့် တာချီလိတ်၊ ကျိုင်းတုံ ၊ ဘားအံ အပါအ၀င် နယ်မြို့ကြီးများတွင်မူ ဆီတန်းစီမှုများကို ပြန်လည်မြင်တွေ့နေရပြီဖြစ်ကြောင်း ဒေသပြည်သူများက ရန်ကုန်ခေတ်သစ်သတင်းဌာနထံသို့ ပြောဆိုသည်။
အခြားတစ်ဖက်တွင်လည်း အရှေ့အလယ်ပိုင်းပဋိပက္ခကြောင့် ကမ္ဘာ့ရွှေစျေးနှုန်းမှာ တစ်အောင်စလျှင် အမေရိကန်ဒေါ်လာ ၅၄၀၀ ဝန်းကျင်အထိ တက်လာသဖြင့် ပြည်တွင်း ရွှေစျေးနှုန်းမှာလည်း လိုက်ပါ မြင့်တက်လာကြောင်း၊ သို့ရာတွင် ပြည်တွင်းစျေးကွက်မှာ ပုံမှန် စျေးကွက် မရှိဘဲ နားလည်မှုဖြင့်သာ ကြိုက်ရောင်းကြိုက်ဝယ် မှောင်ခို စျေးကွက်ဖြစ်ထွန်းနေကြောင်း၊ အခေါက်ရွှေတစ်ကျပ်သားလျှင် ငွေကျပ် ၁၁၃ သိန်းဖြင့် စံချိန်တင် စျေးတက်နေကြောင်း စျေးကွက်အတွင်းမှ စုံစမ်းသိရှိရသည်။
“စျေးကွက်မရှိဘူး။ ပစ္စည်းက ဝယ်ချင်ရင် မရဘူး။ ရောင်းချင်ရင်တော့ ညှိနှိုင်းပြီးသွားရောင်းလို့ရတယ်။ စျေးက တအားတက်တော့ တစ်စိမ်းဆိုရင် ဘယ်သူမှ အရောင်းအဝယ်မလုပ်ရဲဘူး” ဟု ရန်ကုန် တိုင်းရွှေလုပ်ငန်းရှင်များအသင်းမှ ရွှေကုန်သည်တစ်ဦးက သုံးသပ်ပြောဆိုသည်။
အမေရိကန်ဒေါ်လာစျေးနှုန်းမှာမူ တစ်ဒေါ်လာလျှင် ငွေကျပ် ၄၀၀၀ ဝန်းကျင်ရှိပြီး စျေးနှုန်းတက်ရန် အလားအလာများနေကြောင်း စျေးကွက်ကျွမ်းကျင်သူကုန်သည်များနှင့်ဝယ်ရောင်းများက သုံးသပ် ပြောဆိုသည်။
ဓာတ်ပုံ- ယနေ့ နံနက်အစော ရန်ကုန်တွင် စက်သုံးဆီတန်းစီနေသော ကားတန်းနှင့် နယ်မြို့ ကျိုင်းတုံတွင် ဆီတန်းစီဝယ်ယူနေမှုများ။
Photo-CJ ။