ဖေ့စ်ဘွတ်ခ်၊ တစ်တော့ခ်သုံးမှု ဓမ္မစက်၊ အာဏာစက်ဖြင့်ထိန်းဖို့ ဗဟိုသံဃာ့ဝန်ဆောင်အဖွဲ့ဥက္ကဋ္ဌ မိန့်
ဧရာဝတီ၊ ဖေဖော်ဝါရီ ၂၀၊ ၂၀၂၆
ခေတ်ကာလအားလျော်စွာ ဖေ့စ်ဘွတ်ခ်၊ တစ်တော့ခ် စသည့် လူမှုကွန်ရက်၌ ရဟန်းသာမဏေ၊ သီလရှင်များ၏ သမဏ သာရုပ္ပမဖြစ်သော အပြုအမူများ (ရဟန်းတို့၏ ဂုဏ်သိက္ခာ၊ ဝိနည်း၊ ကိုယ်ကျင့်တရားတို့နှင့် မလျော်ညီသည့် အပြုအမူ ပြောဆိုမှုများ) လွှင့်တင်ခြင်း၊ ဓမ္မဝိနယနှင့်မလျော်ညီဘဲ ဟောပြောနေခြင်းတို့သည် သာသနာတော်ဂုဏ်ရှိန် ညှိုးမှိန်စေသဖြင့် ဓမ္မစက်၊ အာဏာစက်ဖြင့် ထိန်းသိမ်းစောင့်ရှောက်သွားရမည်ဖြစ်ကြောင်း နိုင်ငံတော်ဗဟိုသံဃာ့ဝန်ဆောင်အဖွဲ့ ဥက္ကဋ္ဌ (အဘိဓဇ မဟာရဋ္ဌဂုရု၊ အဂ္ဂမဟာ သဒ္ဓမ္မဇောတိက ဓဇ) ဒေါက်တာ ဘဒ္ဒန္တစန္ဒိမာဘိဝံသက မိန့်ကြားသည်။
ရန်ကုန်တိုင်း၊ မရမ်းကုန်းမြို့နယ် သီရိမင်္ဂလာကမ္ဘာအေးကုန်းမြေတွင် ဖေဖော်ဝါရီ ၁၉ ရက်တွင် ကျင်းပသည့် နဝမအကြိမ် နိုင်ငံတော်ဗဟိုသံဃာ့ဝန်ဆောင်အဖွဲ့ ဒုတိယအစည်းအဝေးပထမနေ့၌ ထိုသို့ မိန့်ကြားခဲ့ခြင်း ဖြစ်သည်။
ထို့ပြင် သာသနာ့ဘောင်အတွင်းသာမက သာသနာ့ဘောင်တွင်းမရှိသည့် ပုဂ္ဂိုလ်များကပါ သာသနာတော်ဂုဏ်ရှိန် ညှိုးမှိန် စေရန် မကြာခဏ ပြုမူပြောဆိုနေကြခြင်းသည် သံဃာအဖွဲ့အစည်းအဆင့်ဆင့်အတွက် စိန်ခေါ်မှုတရပ်ဖြစ်နေပြီး သာသနာ တော်ကို ထိန်းသိမ်းစောင့်ရှောက်ရန်နှင့် တာဝန်ဝတ္တရားကျေပွန်စေရန် ညီညွတ်သောသံဃာအင်အားကို အမှန်တကယ် လိုအပ်နေပြီဟုလည်း ဆရာတော်ကြီးက မိန့်ကြားသည်။
ထို့ကြောင့် နိုင်ငံတော်အဆင့်ဗဟိုသံဃာ့ ဆရာတော်ကြီးများအနေဖြင့် မိမိတို့၏ အခြေခံဒေသအတွင်း ကြောင့်ကြမဲ့မနေကြ ဘဲ ကူညီဆောင်ရွက်ပေးကြရန် တိုက်တွန်းခဲ့သည်။
ယင်းအစည်းအဝေးအား ဖေဖော်ဝါရီ ၂၁ ရက်ထိ ပြုလုပ်သွားမည်ဖြစ်ပြီး နောက်ဆုံးရက်၌ သက်ဆိုင်ရာဆရာတော်ကြီးများ ၏ တင်ပြလျှောက်ထားမှုများကို အတည်ပြုချက် ရယူသွားမည်ဖြစ်ကြောင်း သိရသည်။
ရွှေကျင်နိကာယ ဥပဥက္ကဋ္ဌ မဟာနာယက၊ တွဲဖက်ရွှေကျင်သာသနာပိုင် အဘိဓဇမဟာရဋ္ဌဂုရု ပါမောက္ခချုပ်ဆရာတော် ဒေါက်တာ ဘဒ္ဒန္တ နန္ဒမာလာဘိဝံသကလည်း ဖေဖော်ဝါရီ ၁ ရက်၌ ကျင်းပပြီးစီးခဲ့သော ၂၁ ကြိမ်မြောက် ရွှေကျင်နိကာယ သံဃာ့အစည်းအဝေးကြီးအား ပေးပို့သည့် သဝဏ်လွှာတွင် နိုင်ငံကြီးပွားတိုးတက်ရေးအတွက် တရားမျှတမှု၊ ညီညွတ်မှု၊ ငြိမ်းချမ်းမှုရှိရမည်ဖြစ်ကြောင်း ထည့်သွင်းမိန့်ကြားထားသည်။
ဓာတ်ပုံ – MOI