စစ်ကြောင်းပျက်တပ်ဆုတ်လာတဲ့ စစ်ကောင်စီတပ်ဖွဲ့ဝင်တွေ ထပ်မံတိုက်ခိုက်ခံရ (ရုပ်သံ)
ဖေဖော်ဝါရီ-၁၊ ၂၀၂၆။ ဒလပန်း/People’s Spring
ပဲခူတိုင်း၊ ပေါက်ခေါင်းမြို့နဲ့ အုတ်တွင်းမြို့ကို ဆက်သွယ်ထားတဲ့ လမ်းပိုင်းမှာ ကာကွယ်ရေးပူးပေါင်းတပ်တွေရဲ့ တိုက်ခိုက်မှုကြောင့် စစ်ကြောင်းပျက် တပ်ဆုတ်လာတဲ့ စစ်ကောင်စီတပ်ဖွဲ့ဝင်တွေကို ထပ်မံတိုက်ခိုက်ခဲ့တယ်လို့ ပဲခူးတိုင်းစစ်ဌာန၊အမှတ်(၂၁)ဗျူဟာ၊ ပြည်ခရိုင် တပ်ရင်း(၂)က ဇန်နဝါရီ ၃၁ ရက် မနေ့က ထုတ်ပြန်ပါတယ်။
ပြီးခဲ့တဲ့ ဇန်နဝါရီ ၂၈ ရက်မှာ ပြည်-ပေါက်ခေါင်းကနေ နယ်မြေရှင်းလင်းဖို့ ထွက်လာတဲ့ တိုင်းဗဟို ၆ အမြောက်တပ်က အင်အား ၁၅၀ ပါ စစ်ကောင်စီစစ်ကြောင်းကို အုတ်တွင်းမြို့နယ် အုတ်တွင်း-ပေါက်ခေါင်းလမ်း ပြောင်းချောင်းကျေးရွာအနီးမှာ တော်လှန်ရေးတပ်ဖွဲ့တွေက ဝင်ရောက်တိုက်ခိုက်ခဲ့တာပါ။
တိုက်ပွဲအတွင်း စစ်ကောင်စီတပ်ဖွဲ့ဝင် ၅၀ ဦးနီးပါးသေဆုံးခဲ့တဲ့အပြင် စစ်ကြောင်းပျက်ပြီး တပ်ဆုတ်ထွက်ပြေးသွားခဲ့ပါတယ်။
ဇန်နဝါရီ ၂၉ ရက်မှာ တပ်ဆုတ်ထွက်ပြေးလာတဲ့ အင်အား ၁၀၀ နီးပါးပါ စစ်ကောင်စီတပ်ဖွဲ့ဝင်တွေကို ပေါက်ခေါင်း-အုတ်တွင်းလမ်းပိုင်း အုတ်တွင်းမြို့နယ် တံခွန်တိုင်ပေါက်အနီးမှာ ဗျူဟာ(၂၁)ကွပ်ကဲမှူနဲ့ ဗျူဟာရုံးတိုက်ခိုက်ရေးတပ်ဖွဲ့ ၊ ပြည်ခရိုင်တပ်ရင်း (၁) တပ်ရင်းစစ် ကြောင်း ၊ ပြည်ခရိုင် တပ်ရင်း (၂) တပ်ခွဲ(၁)၊ တပ်ခွဲ(၃) တို့က မိုင်း(၂)ကွင်းနဲ့ မိုင်းဆွဲလိုက်နိုင်ပြီး လက်နက်ငယ်တွေနဲ့လည်း စောင့်ကြိုပစ်ခတ်တိုက်ခိုက်ရာ (၂၀)မိနစ်ခန့် တိုက်ပွဲဖြစ်ပွားခဲ့တယ်လို့ ပြည်ခရိုင် တပ်ရင်း (၂)က ထုတ်ပြန်ပါတယ်။
တိုက်ပွဲအတွင်း စစ်ကောင်စီဘက်က ထိခိုက်ဒဏ်ရာရရှိမှုတွေရှိသလိုအနည်းဆုံး (၁၀)ဦးခန့်သေဆုံးကာ MA-4 တစ်လက်၊၄၀မမအသီး(၁)လုံးသိမ်းဆည်းရရှိခဲ့တယ်လို့ ပြည်ခရိုင် တပ်ရင်း (၂)ရဲ့ ထုတ်ပြန်ချက်မှာ ဖော်ပြထားပါတယ်။
ကာကွယ်ရေးပူးပေါင်းတပ်တွေဘက်တော့ အထိခိုက်မရှိ ပြန်လည်ဆုတ်ခွာလာနိုင်တယ်လို့ ကာကွယ်ရေးအဖွဲ့တွေဆီက သိရပါတယ်။
ထပ်မံ တိုက်ခိုက်ခံခဲ့ရတဲ့ အင်အား(၁၀၀)ပါ စစ်ကောင်စီစစ်ကြောင်းဟာ ဇန်နဝါရီ ၃၀ ရက် ည ၆ နာရီခန့်အချိန်မှာ ပေါက်ခေါင်းမြို့နယ် ဘော်ဒါအထိုင်စခန်းကိုအင်အား (၆၀)ဝန်းကျင်ခန့်သာ ပြန်ရောက်လာခဲ့တယ်လို့ ကာကွယ်ရေးတပ်ဖွဲ့ဝင်တွေထံက သိရပါတယ်။
ဇန်နဝါရီ ၃၀ ရက် ညနေ ၅နာရီခွဲအချိန်မှာ ပေါက်ခေါင်းမြို့နယ်အခြေစိုက် ခလရ ၅၃ တပ်ရင်းထဲကို စစ်ကောင်စီတပ်က အင်အားဖြည့်တင်းတာတွေလုပ်ဆောင်ခဲ့ပါတယ်။
“ထူးခြားမှုအနေနဲ့ကတော့ ၃၀ ရက်နေ့ ညနေအချိန်မှာ ပြည်ဘက်ကနေပြီးတော့ ပေါက်ခေါင်း ခလရ ၅၃ ထဲကို ဖောကား ၅ စီးရောက်ရှိတယ်လို့ သိရတယ် “လို့ ပြည်ခရိုင် တပ်ရင်း (၂) သတင်းနဲ့ ပြန်ကြားရေးတာဝန်ခံ ရဲဘော် Red Star က ပြောပါတယ်။
ပြည်-ပေါက်ခေါင်းလမ်းပိုင်းမှာ အထိနာခဲ့တဲ့အတွက် စစ်ကောင်စီတပ်ဟာ အခုရက်ပိုင်းအတွင်း အင်အား ဖြည့်တင်းမှုတွေ လုပ်ဆောင်နေတာဖြစ်တယ်လို့ ကာကွယ်ရေးတပ်ဖွဲ့ဝင်တွေက ပြောပါတယ်။
ရုပ်သံ – ဗျူဟာ ၂၁